ന്യൂയോർക്ക്: ഇസ്രായേലിന് പുറത്ത് ഏറ്റവും കൂടുതൽ ജൂത ജനസംഖ്യയുള്ള ന്യൂയോർക്ക് സിറ്റിയിൽ ഡെമോക്രാറ്റിക് പാർട്ടിയുടെ മേയർ സ്ഥാനാർത്ഥി തെരഞ്ഞെടുപ്പിൽ സയണിസ്റ്റ് അനുകൂലിയും മുൻ ഗവർണറുമായ ആൻഡ്ര്യൂ ക്വോമോയ്ക്ക് പരാജയം. 93% വോട്ടുകൾ എണ്ണിയപ്പോൾപുരോഗമനവാദിയും സോഷ്യലിസ്റ്റ് ആശയക്കാരനുമായ 33-കാരനായ സോഹ്റാൻ മംദാനി 43.5% വോട്ടോടെ ഒന്നാം സ്ഥാനത്തെത്തി. ഡെമോക്രാറ്റുകൾക്ക് ആധിപത്യമുള്ള നഗരത്തിൽ ആദ്യമായി മുസ്ലിം മേയർ ഉണ്ടാകാനുള്ള സാധ്യത ഇതോടെ ശക്തമായി.
ഇന്ത്യൻ-ഉഗാണ്ടൻ വംശജനായ മഹ്മൂദ് മംദാനിയുടെയും സംവിധായിക മീരാ നായരുടെയും മകനായ സോഹ്റാൻ ആഫ്രിക്കയിലാണ് ജനിച്ച് വളർന്നത്. ഗസ്സയിലെ ഇസ്രായേൽ ആക്രമണങ്ങളെ തുറന്നെതിർത്ത മംദാനി, ജനകീയ പ്രശ്നങ്ങൾ ഉയർത്തിക്കാട്ടി അടിത്തട്ടിൽ പ്രചാരണം നടത്തി. ബെർനി സാൻഡേഴ്സ് ഉൾപ്പെടെയുള്ള പ്രമുഖർ അദ്ദേഹത്തിന് അഭിനന്ദനവുമായി രംഗത്തെത്തി. “വൻ രാഷ്ട്രീയ-സാമ്പത്തിക ശക്തികൾക്കെതിരെ ജനങ്ങളോടൊപ്പം നിന്നാണ് മംദാനി ജയിച്ചത്” സാൻഡേഴ്സ് പറഞ്ഞു.
പരമ്പരാഗത ക്രിസ്ത്യൻ വോട്ടുകളും 10 ശതമാനത്തിലേറെയുള്ള ജൂത വോട്ടുകളും അനായാസം നേടുമെന്ന് കരുതിയ ക്വോമോയ്ക്ക്, മംദാനിയുടെ പുരോഗമന ആശയങ്ങളും യുവജനങ്ങളിലെ സ്വാധീനവുമാണ് തിരിച്ചടിയായത്. 11.3% വോട്ടോടെ മൂന്നാമതെത്തിയ ജൂത പുരോഗമനവാദി ബ്രാഡ് ലാൻഡർ മംദാനിക്ക് പിന്തുണ പ്രഖ്യാപിച്ചിരുന്നു. ലാൻഡറുടെ വോട്ടർമാർ ഭൂരിഭാഗവും മംദാനിക്ക് രണ്ടാം വോട്ട് നൽകിയതായാണ് സൂചന.
ന്യൂയോർക്കിന്റെ റാങ്ക്ഡ് ചോയ്സ് വോട്ടിങിൽ 50% വോട്ട് ലഭിക്കാത്ത പക്ഷം, രണ്ടാം വോട്ടുകൾ നിർണായകമാവും. ബിൽ ക്ലിന്റൺ, വൻകിട വ്യവസായികൾ തുടങ്ങിയവരുടെ പിന്തുണയുണ്ടായിരുന്ന ക്വോമോ, മംദാനിയുടെ ജനകീയ പ്രചാരണത്തിന് മുന്നിൽ പതറി. ജനങ്ങളുമായി നേരിട്ട് സംസാരിക്കുകയും നഗരത്തിൽ ഇറങ്ങി സഞ്ചരിക്കുകയും ചെയ്ത മംദാനി, ചെറുപ്പക്കാർക്ക് ഏറെ പ്രിയങ്കരനായിരുന്നു. അദ്ദേഹത്തിന്റെ പ്രചരണ സമൂഹമാധ്യമങ്ങളിലും തരംഗമായി. “മംദാനി യുവാക്കളെ വോട്ടുചെയ്യാൻ പ്രേരിപ്പിച്ചു; ഞാൻ അദ്ദേഹത്തെ ഹൃദയപൂർവം അഭിനന്ദിക്കുന്നു,” ക്വോമോ പറഞ്ഞു.
നഗരത്തിന്റെ ജീവിതച്ചെലവ് കുറയ്ക്കുമെന്ന മംദാനിയുടെ പ്രധാന വാഗ്ദാനവും ഗസ്സയിലെ ഇസ്രായിൽ നടപടികളോടുള്ള വിമർശനവും വോട്ടർമാരെ സ്വാധീനിച്ചു. ക്വോമോ അദ്ദേഹത്തെ ‘സെമിറ്റിക് വിരോധി’യെന്ന് മുദ്രകുത്താൻ ശ്രമിച്ചെങ്കിലും, “ഞാൻ ജൂതവിരോധിയല്ല, ഇസ്രായേലിന്റെ നയങ്ങളെയാണ് വിമർശിക്കുന്നത്” എന്ന് മംദാനി വ്യക്തമാക്കിയിരുന്നു. സമൂഹമാധ്യമങ്ങളിൽ വൈറലായ അദ്ദേഹത്തിന്റെ പ്രചാരണം, ഡെമോക്രാറ്റിക് പാർട്ടിയിലെ പുരോഗമനവാദികൾക്ക് ഊർജം പകർന്നേക്കും.