നഗോയ- ജപ്പാനിലെ ഐച്ചി നഗോയയിൽ നടക്കുന്ന 2026 ഏഷ്യൻ ഗെയിംസിൽ മെഡൽ വേട്ട ആരംഭിച്ച് ഇന്ത്യ. വനിതകളുടെ 10 മീറ്റർ എയർ റൈഫിൾ ടീം ഇനത്തിൽ ഇന്ത്യൻ സഖ്യം വെള്ളി മെഡൽ സ്വന്തമാക്കി. ഇളവേനിൽ വാളറിവൻ, സോനം ഉത്തം മസ്കർ, വിഥർസ വിനോദ് എന്നിവരടങ്ങിയ ടീമാണ് ഇന്ത്യക്കായി ആദ്യ മെഡൽ നേടിയത്. ഈ ഇനത്തിൽ ചൈനയ്ക്കാണ് സ്വർണം.
മിക്സഡ് മാർഷ്യൽ ആർട്സ് വിഭാഗത്തിൽ സുചിക തരിയാൽ സെമി ഫൈനലിൽ പ്രവേശിച്ചതോടെ ഇന്ത്യ ഒരു വെങ്കല മെഡൽ കൂടി ഉറപ്പിച്ചു.
വനിതാ ഹോക്കി ഗ്രൂപ്പ് ഘട്ടത്തിലെ ആദ്യ മത്സരത്തിൽ ഉസ്ബെക്കിസ്ഥാനെ 19-0 എന്ന കൂറ്റൻ സ്കോറിന് തകർത്ത് ഇന്ത്യൻ കരുത്ത് കാട്ടി. ഇന്ത്യക്കായി ദീപിക 8 ഗോളുകൾ നേടി.
ഏഷ്യൻ ഗെയിംസിൽ വർണ്ണാഭമായി സൗദിയുടെ മാർച്ച്പാസ്റ്റ്
ടെക്ബോളിൽ വനിതാ സിംഗിൾസ്, മിക്സഡ് ഡബിൾസ് വെങ്കല മെഡൽ മത്സരങ്ങളിൽ ഇന്ത്യൻ താരങ്ങൾ പരാജയപ്പെട്ടു. പുരുഷന്മാരുടെ ചാങ്ക്വാൻ വുഷു ഫൈനലിൽ മത്സരിച്ച ഇന്ത്യയുടെ സൂരജ് സിങിന് 11-ാം സ്ഥാനത്തെത്താനേ കഴിഞ്ഞുള്ളൂ. നീന്തലിൽ പുരുഷന്മാരുടെ 100 മീറ്റർ ഫ്രീസ്റ്റൈൽ ഹീറ്റ്സിൽ ഇന്ത്യൻ താരങ്ങളായ ബെനഡിക്ഷൻ ബെനിസ്റ്റൺ (12ാം സ്ഥാനം), ആകാശ് മണി (23ാം സ്ഥാനം) എന്നിവർ പുറത്തായി..