റിയാദ്: അവസാന നിമിഷം ലഭിച്ച പെനാൽറ്റി ക്രിസ്റ്റ്യാനോ റൊണാൾഡോ പാഴാക്കി, കിംഗ്സ് കപ്പിൽനിന്ന് അൽ നസർ പുറത്തായി. അൽ-താവൂണിനോട് 1-0 ന് തോറ്റാണ് അൽ-നസർ കിംഗ്സ് കപ്പിൽ നിന്ന് പുറത്തായത്. രണ്ടുവർഷം മുമ്പ് അൽ നസറിൽ ചേർന്ന ക്രിസ്റ്റ്യാനോക്ക് ഇതേവരെ സൗദിയിൽ ഒരു പ്രധാന കിരീടം ചൂടാനായിട്ടില്ല.
അൽ താവൂണിന് വേണ്ടി എഴുപതാമത്തെ മിനിറ്റിൽ വലീദ് അൽ അഹമ്മദാണ് ഗോൾ നേടിയത്. രണ്ടാം പകുതിയുടെ ഇൻജുറി ടൈമിൽ ലഭിച്ച പെനാൽറ്റി ക്രിസ്റ്റ്യാനോ ബാറിന് മുകളിലൂടെ പുറത്തേക്കടിച്ചു. ഇറ്റാലിയൻ താരം ലൂയിസ് കാസ്ട്രോയുടെ പിൻഗാമിയായി സ്റ്റെഫാനോ പിയോളി അൽ നസറിന്റെ പരിശീലകനായ ശേഷമുള്ള ടീമിന്റെ ആദ്യ തോൽവിയാണിത്.
സാങ്കേതികമായി ഞങ്ങൾ മികച്ച പ്രകടനം നടത്തിയെങ്കിലും ജയിക്കാൻ കഴിഞ്ഞില്ലെന്ന് പരിശീലകൻ പിയോളി പറഞ്ഞു.
കിംഗ്സ് കപ്പിൽ നിന്ന് പുറത്തായതിൽ ഞങ്ങൾക്ക് നിരാശ തോന്നുന്നു. എന്നാൽ ഞങ്ങൾക്ക് ഇനിയും രണ്ട് ടൂർണമെന്റുകൾ കൂടിയുണ്ട്. ഏറ്റവും മികച്ച പ്രകടനം പുറത്തെടുക്കുമെന്നും അദ്ദേഹം പറഞ്ഞു.