ന്യൂയോർക്ക്: മിഡിൽ ഈസ്റ്റ് മേഖല അതിന്റെ ചരിത്രത്തിലെ ഏറ്റവും അപകടകരമായ ഘട്ടങ്ങളിലൂടെയാണ് നിലവിൽ കടന്നുപോകുന്നതെന്ന് ഖത്തർ അമീർ ശൈഖ് തമീം ബിൻ ഹമദ് അൽഥാനി. ഐക്യരാഷ്ട്രസഭ പൊതുസഭയുടെ 81-ാമത് സമ്മേളനത്തിൽ സംസാരിക്കുകയായിരുന്നു അദ്ദേഹം. സമാധാനപരമായ നയതന്ത്ര പരിഹാരങ്ങൾ കണ്ടെത്താനുള്ള അവസരങ്ങൾ ലോകരാഷ്ട്രങ്ങൾ നഷ്ടപ്പെടുത്തരുതെന്നും അദ്ദേഹം ആഹ്വാനം ചെയ്തു.
സംഘർഷങ്ങൾക്ക് സമാധാനപരമായ പരിഹാരം കാണാനുള്ള കൂട്ടായ സുരക്ഷാ സംവിധാനങ്ങളുടെ അഭാവമാണ് മിഡിൽ ഈസ്റ്റിലെ നിലവിലെ പ്രതിസന്ധികൾക്ക് കാരണം. വർഷങ്ങളോളമുള്ള കാലതാമസവും യാഥാർത്ഥ്യബോധമില്ലാത്ത നയങ്ങളുമാണ് ഇപ്പോഴത്തെ അവസ്ഥയിലേക്ക് നയിച്ചത്. ചർച്ചകളിലൂടെയും സംഭാഷണങ്ങളിലൂടെയും മാത്രമേ തർക്കങ്ങൾക്ക് ശാശ്വതമായ പരിഹാരം കാണാൻ സാധിക്കൂ എന്നും ഖത്തർ അമീർ വ്യക്തമാക്കി.
ഗാസയിലേത് വംശഹത്യ; ഇസ്രായേൽ ആക്രമണം അവസാനിപ്പിക്കണം
ഗാസയിൽ നടക്കുന്നത് എല്ലാ അർത്ഥത്തിലും വംശഹത്യയാണെന്ന് വിമർശിച്ച അമീർ, സൈനിക നടപടികൾ പൂർണ്ണമായി അവസാനിപ്പിച്ച് ഗാസ മുനമ്പിൽ നിന്ന് പിന്മാറാനും ഉപരോധം നീക്കാനും ഇസ്രായേലിനോട് ആവശ്യപ്പെട്ടു. ഗാസ നിവാസികളെ കുടിയിറക്കുന്നതിനെ ‘എമിഗ്രേഷൻ’ എന്ന് വിശേഷിപ്പിച്ചുകൊണ്ട് അത് ഏറ്റവും അനുയോജ്യമായ പരിഹാരമാണെന്ന് ഇസ്രായേൽ നേതാക്കൾ പരസ്യമായി പ്രഖ്യാപിക്കുകയാണ്. ഗാസയിലെ ജനങ്ങളുടെ ജീവിതം പുനഃസൃഷ്ടിക്കുന്നതിന് ഇത്തരം നിലപാടുകൾ വലിയ തടസ്സമാകുമെന്ന് അദ്ദേഹം ആശങ്ക പ്രകടിപ്പിച്ചു. ഇസ്രായേലിന്റെ ആക്രമണങ്ങൾ സിറിയ ഉൾപ്പെടെയുള്ള അയൽ രാജ്യങ്ങളിലേക്ക് വ്യാപിക്കുന്നത് മേഖലയുടെ മൊത്തത്തിലുള്ള സുരക്ഷയ്ക്ക് വൻ ഭീഷണിയാണ് സൃഷ്ടിക്കുന്നത്.
ഗാസയിൽ സ്ഥിരമായ വെടിനിർത്തൽ ഉറപ്പാക്കാനും ശാശ്വത സമാധാനം പുനഃസ്ഥാപിക്കാനുമുള്ള ശ്രമങ്ങൾ ഖത്തർ തുടരുമെന്നും അമീർ വ്യക്തമാക്കി.
ലെബനനും യെമനും പിന്തുണ
ലെബനന്റെ പരമാധികാരത്തിനും ഭരണഘടനാ സ്ഥാപനങ്ങൾക്കും ഖത്തറിന്റെ പൂർണ്ണ പിന്തുണ അദ്ദേഹം പ്രഖ്യാപിച്ചു. ലെബനനിലെ വെടിനിർത്തൽ കരാറുകൾ പാലിക്കില്ലെന്ന ഇസ്രായേലിന്റെ പരസ്യ പ്രസ്താവനകളെ അദ്ദേഹം വിമർശിച്ചു.
ഇതിനുപുറമെ, യെമനിൽ സമഗ്രമായ രാഷ്ട്രീയ ഒത്തുതീർപ്പ് ലക്ഷ്യമിട്ടുള്ള ഐക്യരാഷ്ട്രസഭയുടെ പ്രവർത്തനങ്ങൾക്കും ലിബിയയിലെ രാഷ്ട്രീയ അനുരഞ്ജന ശ്രമങ്ങൾക്കും സർക്കാർ സ്ഥാപനങ്ങളുടെ ഏകീകരണത്തിനും ഖത്തറിന്റെ പൂർണ്ണ പിന്തുണയുണ്ടാകുമെന്നും ശൈഖ് തമീം ബിൻ ഹമദ് അൽഥാനി കൂട്ടിച്ചേർത്തു.