ചണ്ഡിഗഢ്: ആദ്യം പഞ്ചാബ് ബാറ്റര്‍മാരെ ബൗളര്‍മാര്‍ അരിഞ്ഞുവീഴ്ത്തി. അതുകഴിഞ്ഞ് ബാറ്റര്‍മാര്‍ അതിവേഗം ലക്ഷ്യം മറികടന്നു. ഐ.പി.എല്‍ 18-ാം സീസണിലെ ആദ്യ ക്വാളിഫയര്‍ പോരാട്ടത്തില്‍ പഞ്ചാബ് കിങ്‌സിനെ തകര്‍ത്തു തരിപ്പണമാക്കി ഫൈനലിലേക്ക് മാര്‍ച്ച് ചെയ്ത് റോയല്‍ ചലഞ്ചേഴ്‌സ് ബംഗളൂരു.
ആദ്യം ബാറ്റ് ചെയ്ത പഞ്ചാബിനെ 101 എന്ന ടോട്ടലില്‍ ചുരുട്ടിക്കെട്ടിയ ശേഷം പത്താം ഓവറില്‍ എട്ടു വിക്കറ്റിനാണ് ബംഗളൂരു വിജയം കുറിച്ചത്. നാലാമത്തെ ഐ.പി.എല്‍ കലാശപ്പോരിനാണ് റോയല്‍ ചലഞ്ചേഴ്‌സ് യോഗ്യത നേടിയത്. അതും ഒന്‍പത് വര്‍ഷത്തെ ഇടവേളയ്ക്കുശേഷം.
പ്ലേഓഫിലെ ഏറ്റവും വലിയ വിജയം കൂടിയാണ് രജത് പട്ടിദാറും സംഘവും സ്വന്തം പേരിലാക്കിയത്. മൂന്ന് വിക്കറ്റ് വീതം പിഴുത സൂഷയ് ശര്‍മയും ജോഷ് ഹേസല്‍വുഡുമാണ് ബംഗളൂരു വിജയത്തില്‍ നിര്‍ണായക പങ്കുവഹിച്ചത്. ഫില്‍ സാള്‍ട്ട് അര്‍ധസെഞ്ച്വറിയുമായി(56*) ടീമിനെ ഫിനിഷിങ് ലൈനിലെത്തിക്കുകയും ചെയ്തു. തോല്‍വിയോടെ എലിമിനേറ്ററിലെ ജേതാക്കളുമായി ഞായറാഴ്ച പഞ്ചാബ് ഒരിക്കല്‍ കൂടി ഏറ്റുമുട്ടും.
മുല്ലന്‍പൂരിലെ മഹാരാജാ യധവീന്ദ്ര സിങ് സ്റ്റേഡിയത്തില്‍ ടോസ് മുതല്‍ സര്‍വവും ബംഗളൂരുവിന് അനുകൂലമായിരുന്നു. ആദ്യം ബൗളിങ് തിരഞ്ഞെടുത്ത നായകന്‍ രജത് പട്ടിദാറിന്റെ തീരുമാനം ശരിവയ്ക്കുന്ന തരത്തിലായിരുന്നു ബൗളിങ് യൂനിറ്റിന്റെ പ്രകടനം. അപകടകാരിയായ യുവതാരം പ്രിയാന്‍ഷ് ആര്യയെ രണ്ടാം ഓവറില്‍ തന്നെ മടക്കി യാഷ് ദയാലാണു വിക്കറ്റ് വേട്ടയ്ക്കു തുടക്കമിട്ടത്. ഭുവനേശ്വര്‍ കുമാര്‍ എറിഞ്ഞ തൊട്ടടുത്ത ഓവറില്‍ പ്രഭ്‌സിംറാന്‍ സിങ്ങും(18) മടങ്ങി.
പിന്നീടങ്ങോട്ട് പഞ്ചാബ് ഡഗ്ഗൗട്ടിലേക്ക് ബാറ്റര്‍മാരുടെ ഘോഷയാത്രയായിരുന്നു. മികച്ച ഫോമിലുളള ക്യാപ്റ്റന്‍ ശ്രേയസ് അയ്യര്‍(രണ്ട്), ഓസീസ് താരം ജോഷ് ഇംഗ്ലിസ്(നാല്), യുവതാരം നേഹാല്‍ വധേര(എട്ട്), വെടിക്കെട്ട് ഫിനിഷര്‍ ശശാങ്ക് സിങ്(മൂന്ന്) തുടങ്ങിയവരെല്ലാം ബംഗളൂരു ബൗളിങ് ആക്രമണത്തിനു മുന്നില്‍ അടിതെറ്റി ഒന്നിനു പിറകെ ഒന്നായി കൂടാരം കയറി. ബാറ്റിങ് തകര്‍ച്ചയെ തുടര്‍ന്ന് യുവതാരം മുഷീര്‍ ഖാനെ ഇംപാക്ട് സബ് ആയി ഇറക്കിയ പഞ്ചാബിന്റെ നീക്കവും പാളി. സംപൂജ്യനായാണു താരം മടങ്ങിയത്.
ഒരു ഘട്ടത്തില്‍ പ്ലേഓഫിലെ ഏറ്റവും ചെറിയ ടോട്ടല്‍ ഇന്നു കുറിക്കപ്പെടുമെന്നു പ്രവചിക്കപ്പെട്ടിടത്ത് മാര്‍ക്കസ് സ്റ്റോയിനിസ്(17 പന്തില്‍ 26) ആണ് പഞ്ചാബിന്റെ മാനം കാത്തത്. സ്‌റ്റോയിനിസിന്റെ കൗണ്ടര്‍ അറ്റാക്കും, വാലറ്റത്തില്‍ അഫ്ഗാന്‍ ഓള്‍റൗണ്ടര്‍ അസ്മത്തുല്ല ഒമര്‍സായിയുടെ(18) ഇന്നിങ്‌സും ചേര്‍ന്നാണ് പഞ്ചാബ് മൂന്നക്കം കടന്നത്.
മറുപടി ബാറ്റിങ്ങില്‍ എത്രയും വേഗം കളി തീര്‍ക്കാന്‍ തിടുക്കമുള്ളവരെപ്പോലെയായിരുന്നു ബംഗളൂരു. ചെറിയ ടോട്ടലാണു പിന്തുടരുന്നതെന്നതിന്റെ ഒരു ആലസ്യവുമില്ലാതെ പവര്‍പ്ലേയില്‍ ഫില്‍ സാള്‍ട്ട് അടിച്ചുതകര്‍ത്തു. 12 റണ്‍സുമായി വിരാട് കോഹ്ലിയും 19 റണ്‍സെടുത്ത് മായങ്ക് അഗര്‍വാളും പുറത്തായെങ്കിലും സാള്‍ട്ടും പട്ടിദാറും ചേര്‍ന്ന് അനായാസം ലക്ഷ്യം കാണുകയായിരുന്നു. സാള്‍ 27 പന്ത് നേരിട്ട് ആറ് ബൗണ്ടറിയും മൂന്ന് സിക്‌സറും പറത്തിയാണ് 56 റണ്‍സെടുത്തത്. പട്ടിദാര്‍ എട്ട് പന്തില്‍ 15 റണ്‍സുമായും പുറത്താകാതെ നിന്നു