ബെയ്റൂത്ത് – ദക്ഷിണ ലെബനോനിൽ ഇസ്രായേൽ അതിർത്തിക്ക് സമീപമുണ്ടായ സ്ഫോടനത്തിൽ രണ്ട് യുഎൻ സമാധാന സൈനികർ കൂടി കൊല്ലപ്പെട്ടു. കഴിഞ്ഞ 24 മണിക്കൂറിനിടെ സമാധാന സേനാംഗങ്ങൾ കൊല്ലപ്പെടുന്ന രണ്ടാമത്തെ ദാരുണമായ സംഭവമാണിത്. ബനീ ഹയ്യാന് സമീപം സൈനികർ സഞ്ചരിച്ചിരുന്ന വാഹനത്തിന് നേരെ അജ്ഞാത കേന്ദ്രത്തിൽ നിന്നുണ്ടായ സ്ഫോടനത്തിലാണ് ഇവർ മരിച്ചത്. കൊല്ലപ്പെട്ട രണ്ട് സൈനികരും ഇന്തോനേഷ്യൻ പൗരന്മാരാണെന്ന് യുഎൻ അണ്ടർ സെക്രട്ടറി ജനറൽ ജീൻ പിയറി ലാക്രോയിക്സ് സ്ഥിരീകരിച്ചു. ഈ അപകടത്തിൽ മറ്റ് രണ്ട് സൈനികർക്ക് കൂടി പരിക്കേറ്റിട്ടുണ്ട്, ഇതിൽ ഒരാളുടെ നില ഗുരുതരമാണ്. സംഭവത്തെക്കുറിച്ച് യുഎൻ സമാധാന സേന (UNIFIL) അന്വേഷണം ആരംഭിച്ചു.
തിങ്കളാഴ്ചയും സമാധാന സേനയുടെ വാഹനത്തിന് നേരെ ശക്തമായ സ്ഫോടനം ഉണ്ടായതായും ഇതിൽ ഏതാനും സൈനികർക്ക് പരിക്കേറ്റതായും വക്താവ് കാന്റിസ് ആർഡെൽ അറിയിച്ചു. മേഖലയിൽ മതിയായ സുരക്ഷാ ഉറപ്പുകൾ ഇല്ലാത്തതിനാൽ പരിക്കേറ്റ എല്ലാവരെയും ഉടൻ തന്നെ ആശുപത്രിയിലേക്ക് മാറ്റാൻ സാധിച്ചില്ല. പിന്നീട് ലെബനീസ്, ഇസ്രായേൽ അധികൃതരുമായി ആശയവിനിമയം നടത്തിയ ശേഷമാണ് രക്ഷാപ്രവർത്തനം പൂർത്തിയാക്കിയത്. സമാധാന സേനാംഗങ്ങൾ തുടർച്ചയായി ആക്രമിക്കപ്പെടുന്നത് അതീവ ഗൗരവകരമായ സാഹചര്യമാണെന്ന് യുഎൻ വക്താക്കൾ വ്യക്തമാക്കി.
സമാധാന സേനയ്ക്ക് നേരെയുണ്ടാകുന്ന ഇത്തരം ആക്രമണങ്ങളെ ഫ്രഞ്ച് വിദേശകാര്യ മന്ത്രി ജീൻ നോയൽ ബാരറ്റ് ശക്തമായി അപലപിച്ചു. തുടർച്ചയായ ആക്രമണങ്ങളുടെ പശ്ചാത്തലത്തിൽ യുഎൻ രക്ഷാസമിതിയുടെ അടിയന്തര യോഗം വിളിക്കണമെന്ന് ഫ്രാൻസ് ആവശ്യപ്പെട്ടു. യുഎൻ കേന്ദ്രങ്ങൾക്ക് നേരെയുള്ള ആക്രമണങ്ങൾ ഒരു തരത്തിലും അംഗീകരിക്കാനാവില്ലെന്നും ഇക്കാര്യത്തിൽ സമഗ്രമായ അന്വേഷണം വേണമെന്നും അദ്ദേഹം പറഞ്ഞു. ദക്ഷിണ ലെബനോനിലെ നാഖൂറയിൽ ഫ്രഞ്ച് ബറ്റാലിയന് നേരെയുണ്ടായ പ്രകോപനങ്ങളിലും ഫ്രാൻസ് പ്രതിഷേധം അറിയിച്ചു. പാരീസിലെ ഇസ്രായേൽ അംബാസഡറെ നേരിട്ട് വിളിച്ച് ഫ്രാൻസ് തങ്ങളുടെ ശക്തമായ വിയോജിപ്പ് രേഖപ്പെടുത്തിയിട്ടുണ്ട്.