വാഷിംഗ്ടണ് – യു.എസ് പ്രസിഡന്റ് ഡൊണാള്ഡ് ട്രംപ് നിശ്ചയിച്ച ചില ചുവപ്പ് രേഖകള് അംഗീകരിക്കാന് ഇറാന് ഇപ്പോഴും തയ്യാറല്ലെന്ന് ജനീവയില് ഇരു രാജ്യങ്ങളും തമ്മിലുള്ള രണ്ടാം ഘട്ട ചര്ച്ചകള് അവസാനിച്ച് മണിക്കൂറുകള്ക്ക് ശേഷം നടത്തിയ പ്രസ്താവനയില് യു.എസ് വൈസ് പ്രസിഡന്റ് ജെ.ഡി വാന്സ് പറഞ്ഞു. ചില വശങ്ങളില് കാര്യങ്ങള് നന്നായി പോയി. ഇറാന് വീണ്ടും കൂടിക്കാഴ്ച നടത്താന് സമ്മതിച്ചു. എന്നാല് മറ്റ് വശങ്ങളില്, പ്രസിഡന്റ് നിശ്ചയിച്ച ചില ചുവപ്പ് രേഖകള് ഇറാനികള് ഇപ്പോഴും അംഗീകരിക്കാനും പരിഹരിക്കാനും തയ്യാറല്ലെന്ന് വ്യക്തമാണ്. ഇറാനികള്ക്ക് ആണവായുധം സ്വന്തമാക്കാന് കഴിയാത്ത നിലക്ക്, ഇറാന് ആണവ പ്രശ്നത്തിന് നയതന്ത്രപരമായ ഓപ്ഷനുകളിലൂടെയോ മറ്റോ പരിഹാരം കണ്ടെത്താന് അമേരിക്കന് പ്രസിഡന്റ് കഠിനമായി പരിശ്രമിക്കുന്നു. നയതന്ത്ര ശ്രമങ്ങള് അതിന്റെ സ്വാഭാവിക പരിസമാപ്തിയില് എത്തിയെന്ന് നിര്ണ്ണയിക്കാനുള്ള അവകാശം പ്രസിഡന്റ് നിലനിര്ത്തുന്നു. ഞങ്ങള് ആ ഘട്ടത്തിലെത്തില്ലെന്ന് ഞങ്ങള് പ്രതീക്ഷിക്കുന്നു. പക്ഷേ അങ്ങിനെ സംഭവിച്ചാല്, തീരുമാനം പ്രസിഡന്റിന്റേതായിരിക്കും.
ഇറാന് ആണവായുധം സ്വന്തമാക്കുന്നത് തടയുക എന്നതാണ് ഞങ്ങളുടെ പ്രധാന താല്പ്പര്യം. നമുക്ക് ആണവ വ്യാപനം വേണ്ട. ഇറാന് ആണവായുധം നേടിയാല്, മറ്റ് പല രാജ്യങ്ങളും അത് സ്വന്തമാക്കും. ഇക്കൂട്ടത്തില് ചില രാജ്യങ്ങള് സൗഹൃദ രാജ്യങ്ങളും മറ്റു ചിലത് സൗഹൃദപരമല്ലാത്ത രാജ്യങ്ങളുമാണ്. അത് അമേരിക്കന് ജനതക്ക് ഒരു ദുരന്തമായിരിക്കും. കാരണം അത് ഏറ്റവും അപകടകരമായ ആയുധങ്ങള് സ്വന്തമായുള്ള തീവ്രവാദ ഭരണകൂടങ്ങള് ലോകമെമ്പാടും സൃഷ്ടിക്കപ്പെടും.
അമേരിക്കന് ജനതയുടെ താല്പ്പര്യത്തിനനുസരിച്ചാണെന്ന് കരുതുന്നത് ട്രംപ് ചെയ്യും. താന് ബരാക് ഒബാമയല്ലെന്ന് അദ്ദേഹം വ്യക്തമാക്കിയിട്ടുണ്ട്. അമേരിക്കന് ദേശീയ സുരക്ഷയോട് അദ്ദേഹത്തിന് വളരെ വ്യത്യസ്തമായ സമീപനമുണ്ട്. അതിനെ പ്രതിരോധിക്കാന് അദ്ദേഹം കൂടുതല് സന്നദ്ധനാണ് – ഇറാനിലെ ഭരണമാറ്റമാണ് താന് ഇഷ്ടപ്പെടുന്നതെന്ന ട്രംപിന്റെ പ്രസ്താവനയെ കുറിച്ച് വാന്സ് പറഞ്ഞു.
ഇറാന് ലോകത്തിലെ ഏറ്റവും ശത്രുതാപരമായതും ഏറ്റവും യുക്തിരഹിതവുമായ ഭരണകൂടങ്ങളില് ഒന്നാണെന്ന് അമേരിക്കന് ജനത മനസ്സിലാക്കേണ്ടത് വളരെ പ്രധാനമാണെന്ന് ഞാന് കരുതുന്നു. മനുഷ്യരാശിക്ക് അറിയാവുന്ന ഏറ്റവും അപകടകരമായ ആയുധം കൈവശം വെക്കാന് അത്തരം ആളുകളെ നമുക്ക് അനുവദിക്കാനാവില്ല. അത് നമ്മുടെ സുരക്ഷക്കും നമ്മുടെ കുട്ടികളുടെ ഭാവിക്കും വിനാശകരമായിരിക്കും. അതാണ് അമേരിക്കന് പ്രസിഡന്റിന്റെ ലക്ഷ്യം. അത് സംഭവിക്കുന്നില്ലെന്ന് ഉറപ്പാക്കാന് അദ്ദേഹത്തിന് നിരവധി ഓപ്ഷനുകളും ഉപകരണങ്ങളും ഉണ്ട്. ഇറാന്റെ ബാലിസ്റ്റിക് മിസൈല് പദ്ധതി അടക്കം എല്ലാ കാര്യങ്ങളും ചര്ച്ച ചെയ്യും. ഇറാന് ഭീകരവാദത്തെ പിന്തുണക്കുന്നത് നിര്ത്തണമെന്ന് ഞങ്ങള് തീര്ച്ചയായും ആഗ്രഹിക്കുന്നു. ലോകത്ത് ഭീകരവാദത്തെ ഏറ്റവുമധികം പിന്തുണക്കുന്ന രാജ്യങ്ങളിലൊന്നാണ് ഇറാന്. യു.എസ് ദേശീയ സുരക്ഷയെ ഭീഷണിപ്പെടുത്തുന്ന നിരവധി മാര്ഗങ്ങളുണ്ട്. എന്നാല് ഏറ്റവും ഗുരുതരമായത് അവര് ആണവായുധം സ്വന്തമാക്കുന്നതാണ്. അതാണ് ചുവന്ന വര. തങ്ങള് ആണവായുധം തേടുന്നില്ലെന്ന് ഇറാനികള് പറയുന്നു. എന്നാല് വാസ്തവത്തില്, ഇത് ശരിയല്ലെന്ന് നമുക്കറിയാം. ആണവായുധം സ്വന്തമാക്കാനുള്ള ആഗ്രഹം സ്ഥിരീകരിക്കുന്ന നിരവധി കാര്യങ്ങള് അവര് തെളിയിച്ചിട്ടുണ്ട്. ഇത് സംഭവിക്കുന്നില്ലെന്ന് ഉറപ്പാക്കുക എന്നതാണ് ഞങ്ങളുടെ ലക്ഷ്യം. ഇത് സംഭവിക്കുന്നില്ലെന്ന് ഉറപ്പാക്കാന് പ്രസിഡന്റിന്റെ പക്കല് നിരവധി ഉപകരണങ്ങള് ഉണ്ട് – അമേരിക്കന് വൈസ് പ്രസിഡന്റ് പറഞ്ഞു.
ഇറാന് വിദേശ മന്ത്രി അബ്ബാസ് അറാഖ്ജിയുടെ നേതൃത്വത്തിലുള്ള ഇറാന് പ്രതിനിധി സംഘവും അമേരിക്കയുടെ പ്രത്യേക ദൂതന് സ്റ്റീവ് വിറ്റ്കോഫും ട്രംപിന്റെ മരുമകന് ജാരെഡ് കുഷ്നറും തമ്മില് ജനീവയില് ഒമാന്റെ മധ്യസ്ഥതയില് നടത്തിയ രണ്ടാം റൗണ്ട് പരോക്ഷ ചര്ച്ചകള് അന്തിമ കരാറോ സംയുക്ത പ്രസ്താവനയോ ഇല്ലാതെ അവസാനിച്ചു. മൂന്നാം ഘട്ട ചര്ച്ചകള്ക്ക് തീയതി നിശ്ചയിച്ചിട്ടില്ല. എന്നാല് ഇരുപക്ഷവും ചര്ച്ചകള് തുടരാന് സന്നദ്ധത പ്രകടിപ്പിച്ചു. ഇറാന്റെ ആണവ പദ്ധതി, ഉപരോധങ്ങള് എടുത്തുകളയല്, യുറേനിയം സമ്പുഷ്ടീകരണം പരിമിതപ്പെടുത്തല് എന്നിവയില് കേന്ദ്രീകരിച്ചാണ് ചര്ച്ചകള് നടന്നതെന്നും ചര്ച്ചകള് വളരെ ഗൗരവത്തായിരുന്നെന്നും പൊതു ലക്ഷ്യങ്ങള് തിരിച്ചറിയുന്നതില് നല്ല പുരോഗതി കൈവരിച്ചിട്ടുണ്ടെന്നും ഒമാന് വിദേശ മന്ത്രി ബദര് ബിന് ഹമദ് അല്ബൂസഈദി പറഞ്ഞു.