തെഹ്റാന് – മുന് ഇറാന് വിദേശ മന്ത്രി കമാല് ഖറാസി ഏപ്രില് 1 ന് നടന്ന യു.എസ്-ഇസ്രായില് വ്യോമാക്രമണങ്ങളില് പരിക്കേറ്റ് ചികിത്സയിലിരിക്കെ മരിച്ചതായി ഇറാന് മാധ്യമങ്ങള് റിപ്പോര്ട്ട് ചെയ്തു. 81 കാരനായ കമാല് ഖറാസി ന്യൂയോര്ക്കില് ഐക്യരാഷ്ട്രസഭയിലെ ഇറാന്റെ അംബാസഡറായും പിന്നീട് 1997 മുതല് 2005 വരെ പരിഷ്കരണവാദിയായ പ്രസിഡന്റ് മുഹമ്മദ് ഖാതമിയുടെ കീഴില് വിദേശ മന്ത്രിയായും സേവനമനുഷ്ഠിച്ചിരുന്നു.
കുറച്ച് ദിവസങ്ങള്ക്ക് മുമ്പ് അമേരിക്കന്-സയണിസ്റ്റ് ശത്രു നടത്തിയ ഭീകരാക്രമണത്തില് പരിക്കേറ്റ മുതിര്ന്ന നയതന്ത്രജ്ഞന് ഇന്ന് രാത്രി രക്തസാക്ഷിത്വം വരിച്ചതായി മെഹര്, ഇസ്ന വാര്ത്താ ഏജന്സികള് ടെലിഗ്രാമില് റിപ്പോര്ട്ട് ചെയ്തു. തെഹ്റാനിലെ അവരുടെ വീട് ലക്ഷ്യമിട്ടുണ്ടായ വ്യോമാക്രമണത്തില് അദ്ദേഹത്തിന്റെ ഭാര്യ കൊല്ലപ്പെട്ടതായി ഇറാന് മാധ്യമങ്ങള് നേരത്തെ റിപ്പോര്ട്ട് ചെയ്തിരുന്നു. ഫെബ്രുവരി 28 ന് യു.എസ്-ഇസ്രായില് ആക്രമണങ്ങളോടെ മിഡില് ഈസ്റ്റ് സംഘര്ഷം ആരംഭിച്ചതിനുശേഷം ഇറാന് പരമോന്നത നേതാവ് ആയത്തുല്ല അലി ഖാംനഇയും മറ്റ് നിരവധി ഉന്നത സൈനിക, രാഷ്ട്രീയ നേതാക്കളും വ്യോമാക്രമണങ്ങളില് കൊല്ലപ്പെട്ടിട്ടുണ്ട്.