കൊല്ലം– ശാസ്താംകോട്ടയിലെ കോവൂര്‍ സ്‌കൂളില്‍ വിദ്യാര്‍ഥി ഷോക്കേറ്റ് മരിച്ചു. തേവലക്കര ബോയ്‌സ് ഹൈസ്‌കൂളിലെ എട്ടാം ക്ലാസ് വിദ്യാര്‍ത്ഥി വലിയപാടം മനുവിന്റെ മകന്‍ മിഥുന്‍ (13) ആണ് മരണപ്പെട്ടത്. സ്‌കൂള്‍ കെട്ടിടത്തിന് മുകളില്‍ വീണ ചെരുപ്പെടുക്കാന്‍ ശ്രമിക്കുന്നതിനിടെയാണ് അപകടമുണ്ടായത്. ഇന്ന് രാവിലെ ഒമ്പതരയോടെയാണ് സംഭവം. ക്ലാസ് തുടങ്ങുന്നതിന് മുമ്പ് കൂട്ടുകാര്‍ക്കൊപ്പം കളിച്ച് കൊണ്ട് നില്‍ക്കെ സ്‌കൂള്‍ ഷെഡിന് മുകളില്‍ വീണ ചെരുപ്പെടുക്കാന്‍ കയറിയപ്പോഴാണ് അപകടം. മതില്‍ വഴി ഷെഡിന് മുകളില്‍ കയറിയ കുട്ടിക്ക് അതിനു മുകളിലൂടെ പോയ ലൈനില്‍ നിന്നും ഷോക്കേല്‍ക്കുകയായിരുന്നു.
കുട്ടിയെ താഴത്ത് ഇറക്കി ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. സംഭവത്തില്‍ സ്‌കൂളിനെതിരെ പ്രതിഷേധവുമായി നാട്ടുകാര്‍ രംഗത്തെത്തി. അധികൃതരുടെ അനാസ്ഥയാണ് അപകടത്തിലേക്ക് വഴിവെച്ചതെന്ന് നാട്ടുകാര്‍ പരാതിപ്പെട്ടു. സംഭവത്തില്‍ വിദ്യാഭ്യാസ മന്ത്രി വി ശിവന്‍കുട്ടി അടിയന്തര അന്യേഷണത്തിന് ഉത്തരവിട്ടു. സ്‌കൂള്‍ കെട്ടിടത്തിന് മുകളിലൂടെ വൈദ്യുതി ലൈന്‍ പോകുന്നത് ശ്രദ്ധയില്‍പ്പെട്ടിരുന്നില്ല, പരിശോധിച്ച് ആവശ്യമായി നടപടി സ്വീകരിക്കുമെന്ന് കോവൂര്‍ കുഞ്ഞുമോന്‍ എംഎല്‍എ അറിയിച്ചു.