കേരളത്തിന്റെ ഉയിർത്തെഴുന്നേൽപ്പിന്റെ കാലം വരുന്നു, വി.ഡി സതീശൻ നയിക്കും; സാദിഖലി തങ്ങൾ​

മലപ്പുറം: കേരളത്തിന്റെ നഷ്ടപ്രതാപം വീണ്ടെടുക്കാനും മികച്ച ഭരണം കാഴ്ചവെക്കാനും വി.ഡി. സതീശന്റെ നേതൃത്വത്തിലുള്ള പുതിയ കാലം വരികയാണെന്ന് പാണക്കാട് സാദിഖലി ശിഹാബ് തങ്ങൾ. ജനങ്ങൾ ആഗ്രഹിച്ച ഭരണത്തിന് നേതൃത്വം നൽകാൻ അവർ ആഗ്രഹിച്ച ഒരാളെ തന്നെ പ്രഖ്യാപിച്ചിരിക്കുകയാണെന്നും അദ്ദേഹം ഫേസ്ബുക്കിൽ കുറിച്ചു.
​
കഴിഞ്ഞ പത്ത് വർഷമായി കേവലം പരസ്യവാചകം മാത്രമായി ഒതുങ്ങിയ ‘നമ്പർ വൺ കേരളം’ എന്ന ലക്ഷ്യം ഇനി നമുക്ക് യാഥാർത്ഥ്യമാക്കണമെന്നും അദ്ദേഹം പറഞ്ഞു. ഒറ്റക്കെട്ടായ പ്രവർത്തനം നമുക്ക് കരുത്താകും. വികസന സൂചികകളിൽ നഷ്ടമായ ഒന്നാം സ്ഥാനം തിരിച്ചുപിടിക്കാനും ദുർഭരണം വരുത്തിയ വിള്ളലുകൾ പരിഹരിക്കാനും സദ്ഭരണം വരുമെന്നും തങ്ങൾ പ്രത്യാശ പ്രകടിപ്പിച്ചു. ജനമിടിപ്പിനൊപ്പം ചേർന്ന് കേരളത്തിന്റെ ഉയിർപ്പ് സാധ്യമാക്കാൻ പുതിയ മുഖ്യമന്ത്രിക്ക് സാധിക്കട്ടെയെന്നും അദ്ദേഹം ആശംസിച്ചു.