മർക്കസ് നോളെജ് സിറ്റി സന്ദർശനം വ്യക്തിപരം, സംഘടനയുമായി ബന്ധമില്ല-മുസ്തഫൽ ഫൈസി

കോഴിക്കോട്- മർക്കസ് നോളേജ് സിറ്റി സന്ദർശിച്ചത് തികച്ചും സൗഹൃദ സന്ദർശനം ആയിരുന്നുവെന്നും മറ്റു കാര്യങ്ങൾക്ക് പ്രസക്തിയില്ലെന്നും പ്രമുഖ പണ്ഡിതൻ എം.പി മുസ്തഫൽ ഫൈസി വ്യക്തമാക്കി. സമൂഹമാധ്യമത്തിലൂടെയാണ് ഫൈസി ഇക്കാര്യം പറഞ്ഞത്. തന്റെ സന്ദർശനത്തെ സംഘടനകളുമായി ബന്ധപ്പെടുത്തിയുള്ള പ്രചാരണങ്ങൾക്ക് ഉപയോഗിക്കരുതെന്നും അദ്ദേഹം പറഞ്ഞു. കഴിഞ്ഞ ദിവസം മർക്കസ് നോളജ് സിറ്റിയിൽ മുസ്തഫൽ ഫൈസി സന്ദർശനം നടത്തിയിരുന്നു.

ഇ.കെ വിഭാഗം സമസ്ത നേതാവായ മുസ്തഫൽ ഫൈസി കാന്തപുരം അബൂബക്കർ മുസ്ലിയാർ നേതൃത്വം നൽകുന്ന സമസ്തയിലേക്ക് മാറുമെന്ന തരത്തിലാണ് വാർത്തകൾ പ്രചരിച്ചിരുന്നത്. എന്നാൽ ഇതിൽ വാസ്തവം ഇല്ലെന്നും സന്ദർശനം വ്യക്തിപരമായിരുന്നുവെന്നും വ്യക്തമാക്കി മുസ്തഫൽ ഫൈസി രംഗത്തെത്തി. സമസ്ത കേന്ദ്ര മുശാവറയിൽനിന്ന് ഈയിടെ മുസ്തഫൽ ഫൈസിയെ സമസ്ത നീക്കിയിരുന്നു.