തിരുവന്തപുരം– സംസ്ഥാനത്ത് പ്രവാസി പെന്‍ഷനും പ്രവാസി വെല്‍ഫയര്‍ അംഗത്വത്തിനും അപേക്ഷ നല്‍കുന്നവര്‍ കുറഞ്ഞത് ഒരു വര്‍ഷം കാത്തിരിക്കേണ്ട ഗതികേടെന്ന് പരാതി. സ്മാര്‍ട്ടായ സര്‍ക്കാര്‍ സേവനങ്ങള്‍ നല്‍കും എന്നത് വാക്കുകളില്‍ മാത്രമായി ഒതുങ്ങുകയാണ്. അപേക്ഷകള്‍ ഒച്ചിന്റെ വേഗതയിലാണ് എന്നും നിരവധി പ്രവാസികള്‍ വ്യക്തമാക്കി. ദീര്‍ഘകാലം പ്രവാസിയായി ജീവിതം നയിച്ച പൊന്നാനി എരമംഗലം സ്വദേശിയുള്‍പ്പെടെ നിരവധിപേരുടെ അപേക്ഷയാണ് അവഗണിക്കപ്പെടുന്നത്. കേരള പ്രവാസി വെല്‍ഫെയര്‍ ബോര്‍ഡിന്റെ അംഗമായി കൃത്യമായി മാസാന്ത അംശദായം അടച്ച് എല്ലാ നടപടി ക്രമങ്ങളും പൂര്‍ത്തിയാക്കി പെന്ഷന് അപേക്ഷ സമര്‍പ്പിച്ച് ഒരു വര്‍ഷത്തോളം കാത്തിരുന്നിട്ടും ഇതുവരെ പലരുടെയും അപേക്ഷ അപ്രൂവ് ചെയ്തിട്ടില്ല.
ഇക്കാര്യം ചൂണ്ടിക്കാട്ടി ബോര്‍ഡ് സി.ഇ.ഒക്ക് കത്തയച്ചപ്പോള്‍ രേഖകള്‍ പരിശോധിച്ച് പെന്ഷന് അനുവദിക്കുന്നതിന് കാലതാമസമെടുക്കുമെന്നാണ് മറുപടി നല്‍കിയത്. ഒരു വര്‍ഷമായിട്ടും അപേക്ഷ പരിശോധിച്ച് പൂര്‍ത്തിയായില്ല എന്ന് പറയുമ്പോള്‍ എത്ര കാലമാണ് പ്രവാസികള്‍ കാത്തിരിക്കേണ്ടത് എന്ന ചോദ്യവും ഉയരുന്നുണ്ട്. വിഷയത്തില്‍ ഇടപെടല്‍ ആവശ്യപ്പെട്ടുകൊണ്ട് വെല്‍ഫെയര്‍ കുവൈത്ത് സമിതി മുഖ്യമന്ത്രിക്ക് പരാതി അയച്ചു. തുടര്‍ നടപടിക്കായി പരാതി കേരള വെല്‍ഫെയര്‍ ബോര്‍ഡ് സി.ഇ.ഒക്ക് കൈമാറി.
അപേക്ഷ അപ്രൂവായാല്‍ പെന്ഷന് യോഗ്യത നേടിയ തീയതി മുതലുള്ള തുക ഒരുമിച്ചു നല്‍കുമെന്ന് ബോര്‍ഡ് അറിയിച്ചു. പെന്ഷന് തുക വര്‍ധിപ്പിക്കണമെന്ന ആവശ്യവും വ്യാപകമായി ഉയരുന്നുണ്ട്. പദ്ധതി തുടങ്ങി 16 വര്‍ഷമായിട്ടും പെന്ഷന് തുക ഇപ്പോഴും എത്തി നില്‍ക്കുന്നത് 3500 രൂപ മാത്രം.അനുദിനം നിത്യോപയോഗ സാധനങ്ങള്‍ക്ക് വില വര്‍ദ്ധിക്കുന്ന കാലത്ത് നാടിന്റെ സമ്പദ് നട്ടെല്ലായി പ്രവര്‍ത്തിച്ച പ്രവാസികള്‍ക്ക് വീണ്ടും അവഗണന തന്നെയെന്ന് ബഹ്റൈന്‍ കെഎംസിസി സംസ്ഥാന വൈസ് പ്രസിഡന്റും സാമൂഹിക പ്രവര്‍ത്തകനുമായ എ. പി ഫൈസല്‍ വില്യാപ്പള്ളി പറഞ്ഞു.
‘എല്ലാ മാസവും തീയ്യതി പതിനഞ്ചാവുന്നതിനുള്ളില്‍ ആവുന്നതിനുള്ളില്‍ ലഭിക്കുന്ന പ്രവാസി പെന്ഷന് ഈ മാസം 18 ആയിട്ടും ലഭിച്ചിട്ടില്ല. ഏതൊരു ക്ഷേമ പെന്‍ഷനേക്കാളും ഉയര്‍ന്ന അംശാദായം അടച്ചുകൊണ്ടാണ് പ്രവാസികള്‍ അവരുടെ യോഗ്യത നിലനിര്‍ത്തുന്നത്. അതുകൊണ്ടുതന്നെ ഇത് സര്‍ക്കാറിന്റെ ഔദാര്യമല്ല, പ്രവാസികളുടെ അവകാശമാണ്. പ്രവാസി പെന്ഷന് അവകാശികള്‍ക്ക് എത്രയും പെട്ടെന്ന് ലഭിക്കാന്‍ സര്‍ക്കാര്‍ നടപടിയുണ്ടാവണം. മറ്റു ക്ഷേമനിധികള്‍ക്കു പൂര്‍ണ്ണമായും ഫൈന്‍ ഒഴിവാക്കുമ്പോള്‍ പ്രവാസി ക്ഷേമനിധി പൂര്‍ണ്ണമായും ഒഴിവാക്കിയില്ല. മാത്രമല്ല 60 വയസ്സ് കഴിഞ്ഞവരുടേത് ഫൈന്‍ ഒഴിവാക്കില്ല എന്നാണ് അറിഞ്ഞത്. 5000 രൂപ മിനിമം പെന്ഷന് ആക്കുമെന്ന് സര്‍ക്കാര്‍ വാഗ്ദാനം നല്‍കിയത് ഇപ്പോഴും പ്രഖ്യാപനം മാത്രമാണ്.’ എ.പി ഫൈസല്‍ വ്യക്തമാക്കി.