ന്യൂഡല്‍ഹി– ഇസ്രായില്‍-ഇറാന്‍ സംഘര്‍ഷവുമായി ബന്ധപ്പെട്ട് യാത്രക്കാര്‍ക്ക് മാര്‍ഗനിര്‍ദേശങ്ങളുമായി വിമാനക്കമ്പനികള്‍. ഇന്‍ഡിഗോ, എയര്‍ ഇന്ത്യ വിമാനക്കമ്പനികളാണ് മുന്നറിയിപ്പ് നല്‍കിയിരിക്കുന്നത്. ഇറാനു ചുറ്റുമുള്ള വ്യോമപാത ലഭ്യമാകാത്ത സാഹചര്യത്തില്‍ പലവിമാനങ്ങളുടെയും പാത മാറ്റേണ്ടി വരുമെന്നാണ് ഇന്‍ഡിഗോയുടെ അറിയിപ്പ്. യാത്ര വൈകാനും ദൈര്‍ഘ്യം കൂടാനും ഇത് കാരണമാകുമെന്ന് ഇന്‍ഡിഗോ അറിയിച്ചു. യാത്രക്ക് മുമ്പ് ഫ്‌ളൈറ്റ് സ്റ്റാറ്റസ് നിരന്തരം പരിശോധിക്കണമെന്നും ഇന്‍ഡിഗോ ആവശ്യപ്പെട്ടു.
ഇറാന്റെ ചുറ്റുമുള്ള വ്യോമപാതകള്‍ അടച്ച സാഹചര്യത്തില്‍ മറ്റു റൂട്ടുകളിലൂടെയാണ് വിമാനം സഞ്ചരിക്കുന്നതെന്ന് മാര്‍ഗ നിര്‍ദേശത്തില്‍ പറയുന്നുണ്ട്. യാത്രക്കാരുടെയും ജീവനക്കാരുടെയും സുരക്ഷ പരമപ്രധാനമാണ്. ആവശ്യമെങ്കില്‍ ഹെല്‍പ് ലൈന്‍ നമ്പറില്‍ ബന്ധപ്പെടാമെന്നും യാത്രക്കാര്‍ക്ക് ബുദ്ധിമുട്ട് കുറയ്ക്കാന്‍ പരമാവധി ശ്രമിക്കുന്നുണ്ടെന്നും എയര്‍ ഇന്ത്യ അറിയിച്ചു.