ബംഗളൂരു: കർണാടകയിൽ വോട്ടർ പട്ടിക പുതുക്കൽ (SIR) നടപടികൾക്കിടെ യോഗ്യരായ മുസ്‌ലിം വോട്ടർമാരെ ഒഴിവാക്കാൻ വ്യാജ അപേക്ഷകൾ നൽകിയതായി പരാതി. സമാനമായ വിഷയത്തിൽ മൂന്ന് എഫ്.ഐ.ആറുകളുടെ വിശദാംശങ്ങൾ മുഖ്യമന്ത്രി ഡി.കെ. ശിവകുമാർ പുറത്തുവിട്ടതിന് പിന്നാലെയാണ് കൂടുതൽ വെളിപ്പെടുത്തലുകൾ പുറത്തുവന്നത്.
ദക്ഷിണ കന്നഡ ജില്ലയിലെ ബെൽത്തങ്ങാടിയിൽ മാത്രം 16 പോളിംഗ് സ്റ്റേഷനുകളിലായി 279 ഫോം-7 അപേക്ഷകൾ നൽകിയതായി 2023-ലെ കോൺഗ്രസ് സ്ഥാനാർത്ഥി രക്ഷിത് ശിവറാം ആരോപിച്ചു. ബെൽത്തങ്ങാടിയിലെ ഉജിരെയിൽ മാത്രം 82 മുസ്‌ലിം വോട്ടർമാരെ ഒഴിവാക്കാനാണ് അപേക്ഷ നൽകിയത്.
“ഞങ്ങൾ ഞെട്ടിപ്പോയി” – അഹമ്മദ് ഷാ
ഉജിരെ നിവാസിയായ അഹമ്മദ് ഷായും കുടുംബവും വ്യാഴാഴ്ചയാണ് തങ്ങളുടെ പേരുകൾ നീക്കം ചെയ്യാൻ അപേക്ഷ നൽകിയിട്ടുണ്ടെന്ന വിവരമറിയുന്നത്. “എല്ലാ തിരഞ്ഞെടുപ്പിലും വോട്ട് ചെയ്യുന്ന സ്ഥിരം വോട്ടർമാരാണ് ഞങ്ങൾ. ഞങ്ങളുടെ എപിക് (EPIC) നമ്പറുകൾ വച്ച് മുൻകൂട്ടി അച്ചടിച്ച ഫോമുകൾ ബൂത്ത് ലെവൽ ഓഫീസർക്ക് (BLO) നൽകിയത് കണ്ട് ഞങ്ങൾ ഞെട്ടിപ്പോയി,” അഹമ്മദ് ഷാ പറഞ്ഞു.
എച്ച്.കെ. സുധാകർ, ഗീത, ബാലകൃഷ്ണ ഷെട്ടി എന്നിവരാണ് ഈ ഫോമുകൾ നൽകിയത്. സംഭവത്തിൽ പോലീസിൽ പരാതി നൽകാനാണ് വോട്ടർമാരുടെ തീരുമാനം.
തെളിവില്ലാത്ത അപേക്ഷകൾ തള്ളും: സി.ഇ.ഒ
സംസ്ഥാനത്തൊട്ടാകെ 84,900 ഫോം-7 അപേക്ഷകൾ ലഭിച്ചിട്ടുണ്ടെന്ന് ചീഫ് ഇലക്ട്രൽ ഓഫീസർ (CEO) അറിയിച്ചു. ഏറ്റവും കൂടുതൽ അപേക്ഷകൾ ലഭിച്ചത് ബിദാർ (5,915), ഷിമോഗ (5,760), ദക്ഷിണ കന്നഡ (4,746) ജില്ലകളിലാണ്.
സംഭവത്തിന് പിന്നിൽ ബി.ജെ.പി – ജെ.ഡി.എസ് പ്രവർത്തകരാണെന്ന് കോൺഗ്രസ് ആരോപിച്ചു. മുഖ്യമന്ത്രി ഡി.കെ. ശിവകുമാറും മന്ത്രിമാരും സി.ഇ.ഒ ഓഫീസിന് മുന്നിൽ പ്രതിഷേധിച്ചതിനെ തുടർന്ന്, കൃത്യമായ തെളിവുകളില്ലാത്ത അപേക്ഷകൾ സ്വീകരിക്കരുതെന്ന് എല്ലാ ഉദ്യോഗസ്ഥർക്കും സി.ഇ.ഒ നിർദ്ദേശം നൽകി. മരണ സർട്ടിഫിക്കറ്റോ ഇരട്ടിപ്പ് തെളിയിക്കുന്ന രേഖകളോ ഉണ്ടെങ്കിൽ മാത്രമേ ഇനി അപേക്ഷകൾ പരിഗണിക്കുകയുള്ളൂ.