പട്‌ന– 2025 അവസാനത്തില്‍ സംസ്ഥാന തെരഞ്ഞെടുപ്പിന് തയാറെടുക്കുന്ന ബീഹാറില്‍ സാമൂഹിക സുരക്ഷാ പെന്‍ഷന്‍ ഒറ്റയടിക്ക് ഉയര്‍ത്തി നിതീഷ് കുമാര്‍. 400 രൂപയില്‍ നിന്ന് 1100 രൂപയായിട്ടാണ് ക്ഷേമപെന്‍ഷന്‍ ഉയര്‍ത്തിയത്. സംസ്ഥാന സര്‍ക്കാര്‍ തെരഞ്ഞെടുപ്പ് മുന്നില്‍ കണ്ടാണ് ക്ഷേമപെന്‍ഷന്‍ വര്‍ധിപ്പിച്ചതെന്ന് പ്രതിപക്ഷ കക്ഷികളടക്കം വിമര്‍ശിച്ചു. നിലവില്‍ ബി.ജെ.പി അടക്കമുള്ള സഖ്യകക്ഷികളുമായി ചേര്‍ന്നാണ് നിതീഷ് കുമാറിന്റെ ജനതാദള്‍ (യു) ബീഹാര്‍ ഭരിക്കുന്നത്. 243 നിയമസഭാ സീറ്റുകളില്‍ ഈ സഖ്യത്തിന് 206 സീറ്റുകളുണ്ട്. 2025 ഒക്ടോബര്‍-നവംബര്‍ മാസങ്ങളില്‍ തെരഞ്ഞെടുപ്പ് നടക്കാന്‍ സാധ്യതയുണ്ട്.
സാമൂഹിക സുരക്ഷാ പെന്‍ഷന്‍ ഉയര്‍ത്തി കാര്യം മുഖ്യമന്ത്രി നിതീഷ് കുമാര്‍ പ്രഖ്യാപിച്ചത്. ഗുണഭോക്താക്കള്‍ക്ക് ജൂലൈ മുതല്‍ വര്‍ധിപ്പിച്ച ക്ഷേമപെന്‍ഷന്‍ ലഭിച്ചു തുടങ്ങും. എല്ലാ മാസവും അക്കൗണ്ടില്‍ തുക ലഭിക്കും. പ്രായമായവര്‍ക്ക് മാന്യമായ ജീവിതം ഉറപ്പാക്കുക എന്നതാണ് ഞങ്ങളുടെ മുന്‍ഗണനയെന്നും സംസ്ഥാന സര്‍ക്കാര്‍ ഈ ദിശയില്‍ ശ്രമങ്ങള്‍ തുടരുമെന്നും മുഖ്യമന്ത്രി അറിയിച്ചു.