ഭട്കലിൽ ഗണേശ വിഗ്രഹ നിമജ്ജന ഘോഷയാത്രയ്ക്കിടെ പള്ളിക്കും മദ്രസക്കും നേരെ കല്ലേറ്

കാർവാർ- കർണാടകയിലെ ഉത്തര കന്നഡ ജില്ലയിലുള്ള ഭട്കലിൽ ഗണേശ വിഗ്രഹ നിമജ്ജന ഘോഷയാത്രയ്ക്കിടെ പള്ളിക്കും മദ്രസക്കും നേരെ കല്ലേറുണ്ടായതിനെ തുടർന്ന് സ്ഥലത്ത് സംഘർഷാവസ്ഥ. ബുധനാഴ്ച രാത്രിയാണ് സംഭവം. താലാണ്ടിൽ നിന്നുള്ള ഗണപതി വിഗ്രഹ ഘോഷയാത്ര ഗുൽമി റെയിൽവേ സ്റ്റേഷൻ റോഡിലൂടെ കടന്നുപോകുമ്പോൾ അജ്ഞാതരായ ചിലർ ഇസ്മയിൽ സുന്നി ജാമിയ മസ്ജിദിനും സമീപത്തെ താജുസ്സുന്ന അറബിക് മദ്രസക്കും നേരെ കല്ലെറിയുകയായിരുന്നു.

കല്ലേറിൽ മസ്ജിദിന്റെയും മദ്രസയുടെയും ജനൽച്ചില്ലുകൾ തകർന്നു. അതേസമയം, ഘോഷയാത്രയ്ക്ക് നേരെയും കല്ലേറുണ്ടായതായും ആരോപണമുണ്ട്.
സംഭവവുമായി ബന്ധപ്പെട്ട് ഭട്കൽ ടൗൺ പോലീസ് സ്റ്റേഷനിൽ രണ്ട് എഫ്.ഐ.ആറുകൾ രജിസ്റ്റർ ചെയ്തു. നിയമവിരുദ്ധമായി ഒത്തുചേരൽ, കലാപശ്രമം തുടങ്ങിയ വകുപ്പുകൾ ചേർത്താണ് കേസെടുത്തിരിക്കുന്നത്. ഉത്തര കന്നഡ ജില്ലാ പോലീസ് സൂപ്രണ്ട് ദീപൻ എം.എൻ സ്ഥലം സന്ദർശിക്കുകയും കുറ്റക്കാർക്കെതിരെ കർശന നടപടിയുണ്ടാകുമെന്ന് ഉറപ്പുനൽകുകയും ചെയ്തു. ക്രമസമാധാന നില നിലനിർത്താൻ പ്രദേശത്ത് കൂടുതൽ പോലീസിനെ വിന്യസിച്ചിട്ടുണ്ട്.