- രാജാക്കന്മാരുടെ അന്തപുരങ്ങളിൽ പരിചാരകമാരായി എത്തിയ സ്ത്രീകളുടെ പിന്മുറക്കാരാണ് തെലുങ്കർ എന്നായിരുന്നു നടിയുടെ പരാമർശം.
ചെന്നൈ: തെലുങ്ക് ജനതയ്‌ക്കെതിരായ അധിക്ഷേപ പരാമർശത്തിൽ നടി കസ്തൂരിക്ക് മുൻകൂർ ജാമ്യമില്ല. നടിയുടെ മുൻകൂർ ജാമ്യാപേക്ഷ മദ്രാസ് ഹൈക്കോടതി തള്ളി.
തമിഴ്‌നാട്ടിൽ ബ്രാഹ്മണരുടെ സുരക്ഷ ഉറപ്പാക്കണമെന്നാവശ്യപ്പെട്ട് ഹിന്ദു മക്കൾ കക്ഷിയുടെ പരിപാടിയിലാണ് തെലുങ്ക് ജനതയ്‌ക്കെതിരെ നടിയും തമിഴ്‌നാട്ടിലെ ബി.ജെ.പി നേതാവുമായ കസ്തൂരി വിവാദ പരാമർശം നടത്തിയത്. 300 വർഷങ്ങൾക്ക് മുമ്പ് രാജാവിന്റെ അന്തപുരത്തിൽ സേവ ചെയ്യാനായി എത്തിയ സ്ത്രീകളുടെ പിന്തുടർച്ചക്കാരാണ് തമിഴ്‌നാട്ടിൽ തെലുങ്ക് സംസാരിക്കുന്ന ആളുകളെന്നായിരുന്നു നടിയുടെ പരാമർശം.
കസ്തൂരിക്കെതിരെ വിവിധ വനിത സംഘടനകൾ പോലീസിൽ പരാതി നൽകിയതോടെ നടി വീട് പൂട്ടി ഒളിവിൽ കഴിയുകയാണ്. ഫോൺ സ്വിച്ച് ഓഫ് ചെയ്ത നിലയിലാണെന്നും പ്രതിക്കായി അന്വേഷണം തുടരുകയാണെന്നും പോലീസ് പറഞ്ഞു.
പരാമർശം പിൻവലിച്ച് കസ്തൂരി മാപ്പ് പറയണമെന്ന് തമിഴ്‌നാടിന്റെ ചുമതലയുള്ള ബി.ജെ.പി നേതാവ് സുധാകർ റെഡ്ഢി ആവശ്യപ്പെട്ടിരുന്നു. എന്നാൽ താൻ വസ്തുതകളാണ് പറഞ്ഞതെന്നും തമിഴ് പറഞ്ഞു വോട്ടു തേടുന്നവരുടെ ചരിത്രം ഓർമിപ്പിക്കുക മാത്രമേ ചെയ്തുള്ളൂവെന്നുമാണ് കസ്തൂരിയുടെ വാദം. എന്നാൽ, സംഭവം കൂടുതൽ വിവാദമായതോടെ താൻ തെലുങ്കരെ അപമാനിക്കാൻ ശ്രമിച്ചിട്ടില്ലെന്നും തന്റെ പരാമർശത്തെ ചിലർ വളച്ചൊടിക്കുകയാണുണ്ടായതെന്നും ഇവർ ആരോപിച്ചു.
