ദുബായ്- ഇസ്ലാമിക കലണ്ടർ അനുസരിച്ചുള്ള പുതുവത്സരത്തോട് അനുബന്ധിച്ച് ഈ മാസം 27ന് യു.എ.ഇയിലെ സ്വകാര്യ മേഖലയിലെ ജീവനക്കാർക്ക് ശമ്പളത്തോടെയുള്ള അവധി പ്രഖ്യാപിച്ചു. ഹിജ്‌റ വർഷം 1447 ന്റെ ആരംഭം കുറിക്കുന്ന ഇസ്ലാമിക പുതുവത്സരത്തോട് അനുബന്ധിച്ചാണ് അവധി. ഞായറാഴ്ചയ്‌ക്കൊപ്പം ശനിയാഴ്ചയും വാരാന്ത്യമായി ലഭിക്കുന്ന ചില ജീവനക്കാർക്ക് ജൂൺ 27 മുതൽ ജൂൺ 29 വരെ നീണ്ട വാരാന്ത്യം ആസ്വദിക്കാനാകും. ഫലത്തിൽ അവർക്ക് മൂന്നു ദിവസത്തെ വാരാന്ത്യ അവധി ലഭിക്കും. പതിവ് പ്രവൃത്തി സമയം ജൂൺ 30 തിങ്കളാഴ്ച ആയിരിക്കും.
പൊതുമേഖലാ ജീവനക്കാർക്കും സമാനമായ അവധി ദിവസങ്ങൾ ലഭിക്കും. മാനവ വിഭവശേഷി, നടത്തിയ പ്രഖ്യാപനം രാജ്യത്തെ എല്ലാ സ്വകാര്യ മേഖലയിലെ ജീവനക്കാർക്കും ബാധകമാണ്. യുഎഇ കാബിനറ്റ് പുറപ്പെടുവിച്ച 2025 ലെ ഔദ്യോഗിക അവധി ദിവസങ്ങളുടെ അംഗീകൃത പട്ടികയ്ക്ക് അനുസൃതമായാണ് തീയതി സ്ഥിരീകരിച്ചത്.