അബുദാബി – അബുദാബി ഇന്ത്യൻ സ്കൂളിന്റെ ഗോൾഡൻ ജൂബിലി ആഘോഷങ്ങൾക്ക് വർണാഭമായ തുടക്കം. ചെയർമാൻ എം.എ യൂസുഫലിയുടെ സാന്നിധ്യത്തിൽ യു.എ.ഇ സഹിഷ്ണുതാ സഹവർത്തിത്വ മന്ത്രി ശൈഖ് നഹ്യാൻ ബിൻ മുബാറക്ക് അൽ നഹ്യാൻ ഗോൾഡൻ ജൂബിലി ആഘോഷങ്ങൾ ഉദ്ഘാടനം ചെയ്തു.
യു.എ.ഇയും ഇന്ത്യയും തമ്മിലെ മികച്ച ആത്മബന്ധത്തിന്റെ പ്രതീകമാണ് അബുദാബി ഇന്ത്യൻ സ്കൂളെന്നും, വിദ്യാഭ്യാസ മേഖലക്ക് ഏറ്റവും മികച്ച പിന്തുണയാണ് യു.എ.ഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് ആൽ നഹ്യാൻ നൽകുന്നതെന്നും അദ്ദേഹം പറഞ്ഞു. ഇന്ത്യയും യു.എ.ഇയും തമ്മിലുള്ള ചരിത്രപരമായ ബന്ധത്തിന്റെയും സൗഹൃദത്തിന്റെയും പ്രതിഫലനമാണ് അബൂദാബി ഇന്ത്യൻ സ്കൂൾ എന്ന് എം.എ യൂസുഫലി വ്യക്തമാക്കി. ലക്ഷക്കണക്കിന് വിദ്യാർഥികൾക്ക് അറിവിന്റെ വെളിച്ചമേകാൻ അവസരമേകി സ്കൂളിന് ഭൂമി അനുവദിച്ച യു.എ.ഇ രാഷ്ട്രപിതാവ് ശൈഖ് സായിദ് ബിൻ സുൽത്താൻ ആൽ നഹ്യാന്റെ വലിയ മനസ്സിനെ എക്കാലത്തും നന്ദിയോടെ പ്രവാസി സമൂഹം ഓർമിക്കുന്നുവെന്നും അദ്ദേഹം കൂട്ടിചേർത്തു.
സ്കൂൾ കാമ്പസിൽ നടന്ന ചടങ്ങിൽ വിദ്യാർഥികൾ, രക്ഷിതാക്കൾ, പൂർവവിദ്യാർഥികൾ, സാമൂഹികരംഗത്തെ പ്രമുഖർ ഉൾപ്പെടെയുള്ളവർ പങ്കെടുത്തു. ഇന്ത്യൻ എംബസി കൗൺസിലർ ഡോ. ബാലാജി രാമസ്വാമി, ഐ.ഐ.ടി ഡൽഹി-അബൂദബി എക്സിക്യൂട്ടിവ് ഡയറക്ടർ പ്രഫസർ ശാന്തനു റോയ്, സി.ബി.എസ്.ഇ ദുബൈ ഡയറക്ടർ ഡോ. രാം ശങ്കർ, ജഷൻമാൽ ഗ്രൂപ്പ് സ്ഥാപക ചെയർമാൻ മോഹൻ ജഷൻമാൽ, ലുലു ഫിനാൻഷ്യൽ ഹോൾഡിങ്സ് എം.ഡി അദീബ് അഹമ്മദ്, ലുലു സി.ഇ.ഒ സെയ്ഫി രൂപാവാല, പൂർവ വിദ്യാർത്ഥിയും ബോളിവുഡ് പിന്നണി ഗായകനുമായ ബെന്നി ദയാൽ, സ്കൂൾ വൈസ് ചെയർമാൻ ശരദ് ഭണ്ഡാരി, എജുക്കേഷൻ ഹെഡ് ഷബീർ എം.എം, പ്രിൻസിപ്പൽ ഋഷി പടേഗാവ്കർ തുടങ്ങിയവരും പങ്കെടുത്തു.