റിയാദ്- സൗദി ജനതയ്ക്ക് ഭയമെന്തെന്നറിയില്ലെന്നും രാജ്യം നേരിടുന്ന ഏത് വെല്ലുവിളിയെയും നിശ്ചയദാർഢ്യത്തോടെ മറികടക്കുമെന്നും ഊർജമന്ത്രി അബ്ദുൽ അസീസ് ബിൻ സൽമാൻ രാജകുമാരൻ വ്യക്തമാക്കി. റിയാദിൽ 25-ാമത് ലോക പെട്രോളിയം കോൺഗ്രസ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
തങ്ങളുടെ പ്രാദേശിക സംസ്‌കാരമനുസരിച്ച് സൗദി നിഘണ്ടുവിൽ ‘ഭയം’ എന്ന വാക്കില്ലെന്ന് മന്ത്രി ഓർമ്മിപ്പിച്ചു. രാജ്യത്തിന്റെ ഭാവിക്കും വരുംതലമുറകൾക്കുമായി പ്രവർത്തിക്കാൻ പ്രതിജ്ഞാബദ്ധരാണ്. ചുരുങ്ങിയ സമയംകൊണ്ട് ചരിത്രത്തിൽ സമാനതകളില്ലാത്ത വലിയ പരിവർത്തനമാണ് രാജ്യം കൈവരിച്ചതെന്നും സ്വന്തം ഭാവി നിർണ്ണയിക്കാനുള്ള കഴിവ് സൗദി അറേബ്യയ്ക്കുണ്ടെന്നും അദ്ദേഹം കൂട്ടിച്ചേർത്തു.
എണ്ണ കയറ്റുമതി ശേഷി വർധിപ്പിക്കാൻ പദ്ധതി
ആഭ്യന്തര ഗ്യാസ് പൈപ്പ്ലൈൻ പുനരുപയോഗിച്ചും കിഴക്ക്- പടിഞ്ഞാറ് പൈപ്പ്ലൈൻ ശൃംഖലയിൽ നിക്ഷേപം നടത്തിയും ക്രൂഡ് ഓയിൽ കയറ്റുമതി ശേഷി പ്രതിദിനം ഒരു കോടി ബാരലായി വർധിപ്പിക്കാൻ സൗദി അറേബ്യ പദ്ധതിയിടുന്നതായി മന്ത്രി അറിയിച്ചു. ഗ്യാസ് പൈപ്പ്ലൈൻ താൽക്കാലികമായി മാറ്റി എണ്ണ ഗതാഗതത്തിനായി ഉപയോഗിക്കുന്നതിലൂടെ പ്രതിദിനം 12 ലക്ഷം ബാരലിന്റെ അധിക കയറ്റുമതി ശേഷി കൈവരിക്കാനാകും. കിഴക്കൻ തീരത്തുനിന്ന് പടിഞ്ഞാറൻ തീരത്തേക്ക് നീളുന്ന 1,200 കിലോമീറ്റർ പൈപ്പ്ലൈനിന് നേരെ കഴിഞ്ഞ മാസം ഡ്രോൺ ആക്രമണം ഉണ്ടായതിനെ തുടർന്ന് അത് താൽക്കാലികമായി അടച്ചിടാൻ നിർബന്ധിതമായിരുന്നു.
ഊർജ സുരക്ഷയും സുരക്ഷാ മുന്നറിയിപ്പും
ലോകമെമ്പാടുമുള്ള ഊർജ സംവിധാനങ്ങൾ കടുത്ത പരീക്ഷണഘട്ടത്തിലൂടെയാണ് കടന്നുപോകുന്നതെന്ന് മന്ത്രി ചൂണ്ടിക്കാട്ടി. വിതരണ ശൃംഖലകളും അടിസ്ഥാന സൗകര്യങ്ങളും ആക്രമിക്കപ്പെടുന്ന സാഹചര്യത്തിൽ ഊർജ സുരക്ഷ നിസ്സാരമായി കാണാനാകില്ല. കിംഗ് ഖാലിദ് അന്താരാഷ്ട്ര വിമാനത്താവളത്തിന് നേരെ ഹൂത്തി ആക്രമണങ്ങൾ ഉണ്ടായിട്ടും വേൾഡ് പെട്രോളിയം കോൺഗ്രസിൽ പങ്കെടുക്കാനെത്തിയ പ്രതിനിധികൾക്ക് അദ്ദേഹം നന്ദി അറിയിച്ചു. രാജ്യം സുരക്ഷിതമാണെന്നും എന്നാൽ സമീപകാല സംഭവങ്ങൾ ഗൗരവമുള്ളതാണെന്നും സൗദി അറേബ്യയുടെ പ്രതികരണവും അതിനനുസരിച്ചായിരിക്കുമെന്നും അബ്ദുൽ അസീസ് ബിൻ സൽമാൻ രാജകുമാരൻ മുന്നറിയിപ്പ് നൽകി.