റിയാദ് – യെമനിലെ ഹൂത്തി വിമതര്‍ സൗദി അറേബ്യയില്‍ നടത്തിയ ആക്രമണങ്ങളെ തുടര്‍ന്ന്, സിക്‌സ് കിംഗ്‌സ് സ്ലാം എന്ന എക്‌സിബിഷന്‍ ടെന്നീസ് ടൂര്‍ണമെന്റ് മാറ്റിവെച്ചതായി ജനറല്‍ എന്റര്‍ടൈന്‍മെന്റ് അതോറിറ്റി ചെയര്‍മാന്‍ തുര്‍ക്കി അല്‍ശൈഖ് അറിയിച്ചു.
നോവാക് ജോക്കോവിച്ച്, കാര്‍ലോസ് അല്‍കാരാസ്, അലക്‌സാണ്ടര്‍ സ്വെരെവ് എന്നിവര്‍ക്ക് പുറമെ ടെയ്ലര്‍ ഫ്രിറ്റ്സ്, ലേണര്‍ ടിയന്‍, അലക്‌സ് ഡി മിനോര്‍ എന്നിവരും റിയാദ് സീസണിന്റെ ഭാഗമായി അടുത്ത ആഴ്ച നടക്കാനിരുന്ന ഈ ടൂര്‍ണമെന്റില്‍ പങ്കെടുക്കേണ്ടതായിരുന്നു. ഒക്ടോബര്‍ 21 മുതല്‍ 24 വരെ നടക്കാനിരുന്നതും നെറ്റ്ഫ്‌ലിക്‌സ് വഴി തത്സമയം സംപ്രേക്ഷണം ചെയ്യാന്‍ തീരുമാനിച്ചിരുന്നതുമായ ഈ പരിപാടി, ഇനി ഡിസംബര്‍ 27 മുതല്‍ 30 വരെയായിരിക്കും നടക്കുക.
സാങ്കേതിക, ലോജിസ്റ്റിക്കല്‍ കാരണങ്ങളാല്‍ സിക്‌സ് കിംഗ്‌സ് സ്ലാം ടൂര്‍ണമെന്റ് മാറ്റിവെച്ചിരിക്കുന്നു, ഇത് ഇനി ഡിസംബര്‍ 27 ന് നടക്കും എന്ന് റിയാദ് സീസണ്‍ വിനോദ പ്രോഗ്രാമിന്റെ പ്രസ്താവന പങ്കുവെച്ചുകൊണ്ട് തുര്‍ക്കി അല്‍ശൈഖ് എക്‌സ് പ്ലാറ്റ്ഫോമില്‍ കുറിച്ചു. ഈ ആഴ്ച ആദ്യം, ക്രിസ്റ്റ്യാനോ റൊണാള്‍ഡോയുടെ അല്‍നസര്‍ ടീം ഉള്‍പ്പെടെയുള്ള സൗദി പ്രോ ലീഗ് ഫുട്‌ബോള്‍ മത്സരങ്ങളില്‍ മൂന്നെണ്ണവും മാറ്റിവെച്ചിരുന്നു.