റിയാദ്: സൗദി അറേബ്യയും ഖത്തറും തമ്മിൽ അതിവേഗ ഇലക്ട്രിക് ട്രെയിൻ ശൃംഖല വഴി ബന്ധിപ്പിക്കുന്നതിനുള്ള കരാറിന് ഔദ്യോഗിക അംഗീകാരം. സൗദി മന്ത്രിസഭ യോഗത്തിലാണ് തീരുമാനം. ഇരു രാജ്യങ്ങളും തമ്മിലുള്ള ഗതാഗത സൗകര്യങ്ങൾ മെച്ചപ്പെടുത്തുന്നതിനും സാമ്പത്തിക-സാമൂഹിക സഹകരണം ശക്തമാക്കുന്നതിനുമുള്ള ചരിത്രപരമായ നീക്കമായാണ് ഈ പദ്ധതി വിലയിരുത്തപ്പെടുന്നത്. സൗദി ഭരണകൂടവും ഖത്തർ സർക്കാരും തമ്മിൽ ഇതുസംബന്ധിച്ച അന്തിമ ധാരണയിലെത്തിയതോടെ മേഖലയിലെ യാത്രാസൗകര്യങ്ങളിൽ വലിയ വിപ്ലവത്തിനാകും തുടക്കമാവുക. അതിവേഗ ട്രെയിൻ യാഥാർത്ഥ്യമാകുന്നതോടെ ഇരു രാജ്യങ്ങൾക്കുമിടയിലുള്ള യാത്രാസമയം ഗണ്യമായി കുറയുകയും വിനോദസഞ്ചാര, ചരക്കുനീക്ക മേഖലകളിൽ വലിയ പുരോഗതി ഉണ്ടാവുകയും ചെയ്യും. ജി.സി.സി റെയിൽവേ ശൃംഖലയുടെ ഭാഗമായി നടപ്പിലാക്കുന്ന ഈ പദ്ധതി പരിസ്ഥിതി സൗഹൃദമായ ഗതാഗത സംവിധാനമെന്ന നിലയിലും ഏറെ ശ്രദ്ധേയമാണ്.
നേരത്തെ സൗദി-ഖത്തർ ഏകോപന സമിതി യോഗത്തിന്റെ ഭാഗമായി റിയാദിൽ നടന്ന ചടങ്ങിൽ ഇരുരാജ്യങ്ങളിലെയും ഗതാഗത മന്ത്രിമാർ കരാറിൽ ഒപ്പുവെച്ചിരുന്നു. ഇതിനാണ് മന്ത്രിസഭ അംഗീകാരം നൽകിയത്.
റിയാദിനെയും ദോഹയെയും ബന്ധിപ്പിക്കുന്ന ഈ റെയിൽ പാതയ്ക്ക് 785 കിലോമീറ്റർ നീളമുണ്ടാകും. മണിക്കൂറിൽ 300 കിലോമീറ്ററിലേറെ വേഗതയിൽ സഞ്ചരിക്കുന്ന അത്യാധുനിക ഇലക്ട്രിക് ട്രെയിനുകളാണ് സർവീസിനായി ഉപയോഗിക്കുക. ഇതോടെ റിയാദിൽ നിന്ന് ദോഹയിലേക്കുള്ള യാത്രാസമയം വെറും രണ്ട് മണിക്കൂറായി ചുരുങ്ങും. കിഴക്കൻ പ്രവിശ്യയിലെ ഹുഫൂഫ്, ദമാം എന്നീ നഗരങ്ങളിലൂടെ കടന്നുപോകുന്ന പാത റിയാദിലെ കിംഗ് സൽമാൻ വിമാനത്താവളത്തെയും ദോഹയിലെ ഹമദ് അന്താരാഷ്ട്ര വിമാനത്താവളത്തെയും തമ്മിൽ നേരിട്ട് ബന്ധിപ്പിക്കും.
പദ്ധതിയുടെ പ്രധാന സവിശേഷതകൾ:
- തൊഴിലവസരം: 30,000-ത്തിലധികം പേർക്ക് പ്രത്യക്ഷമായും പരോക്ഷമായും തൊഴിൽ ലഭിക്കും.
- യാത്രക്കാർ: പ്രതിവർഷം ഒരു കോടിയിലധികം യാത്രക്കാർക്ക് പദ്ധതി പ്രയോജനപ്പെടും.
- സാമ്പത്തിക നേട്ടം: ഇരു രാജ്യങ്ങളുടെയും ജി.ഡി.പിയിൽ ഏകദേശം 115 ബില്യൺ റിയാലിന്റെ സാമ്പത്തിക വളർച്ച പദ്ധതിയിലൂടെ പ്രതീക്ഷിക്കുന്നു.
- നിർമ്മാണ കാലാവധി: അന്താരാഷ്ട്ര നിലവാരത്തിലുള്ള സ്മാർട്ട് എൻജിനീയറിങ് സാങ്കേതികവിദ്യ ഉപയോഗിച്ച് ആറ് വർഷത്തിനുള്ളിൽ പദ്ധതി പൂർത്തിയാക്കും.
പരിസ്ഥിതി സൗഹൃദമായ ഈ ട്രെയിൻ സർവീസ് കാർബൺ ബഹിർഗമനം കുറയ്ക്കുന്നതിനും മേഖലയിലെ ടൂറിസം, വ്യാപാര മേഖലകൾക്ക് പുതിയ കരുത്ത് പകരുന്നതിനും സഹായിക്കും. ജി.സി.സി രാജ്യങ്ങൾക്കിടയിലെ ഗതാഗത സംയോജനം കൂടുതൽ ശക്തമാക്കുന്ന ഈ പദ്ധതി മേഖലയിലെ ഏറ്റവും പ്രധാനപ്പെട്ട തന്ത്രപരമായ നീക്കങ്ങളിലൊന്നാണ്. റെയിൽ ഗതാഗതത്തിന് പുറമെ സുരക്ഷ, പ്രതിരോധം, സൈബർ സുരക്ഷ, ആരോഗ്യം, വിദ്യാഭ്യാസം തുടങ്ങിയ മേഖലകളിലും സഹകരണം ശക്തമാക്കാൻ ഏകോപന സമിതി യോഗത്തിൽ തീരുമാനമായി.