റിയാദ്: സൗദി അറേബ്യയിൽ ഭരണതലത്തിൽ സുപ്രധാന മാറ്റങ്ങൾ വരുത്തിക്കൊണ്ട് സൽമാൻ രാജാവ് പുതിയ രാജകീയ ഉത്തരവുകൾ പുറപ്പെടുവിച്ചു. മന്ത്രിസഭയുടെ പുനഃസംഘടനയ്ക്കു പുറമെ പ്രമുഖമായ രണ്ട് അതോറിറ്റികളുടെ അധ്യക്ഷസ്ഥാനങ്ങളിലും മാറ്റങ്ങൾ വരുത്തിയിട്ടുണ്ട്.
മന്ത്രിസഭാ പുനഃസംഘടന
കിരീടാവകാശിയും പ്രധാനമന്ത്രിയുമായ പ്രിൻസ് മുഹമ്മദ് ബിൻ സൽമാൻ ബിൻ അബ്ദുൽ അസിസിന്റെ നേതൃത്വത്തിലാണ് മന്ത്രിസഭ പുനഃസംഘടിപ്പിച്ചത്. നിലവിലുള്ള മന്ത്രിമാർ അവരുടെ സ്ഥാനങ്ങളിൽ തുടരും. മന്ത്രിസഭയുടെ കാലാവധി നാല് വർഷത്തിൽ കവിയാൻ പാടില്ലെന്നും, ആ കാലയളവിനുള്ളിൽ രാജകീയ ഉത്തരവിലൂടെ സഭ പുനഃസംഘടിപ്പിക്കണമെന്നും വ്യവസ്ഥ ചെയ്യുന്ന മന്ത്രിസഭാ നിയമത്തിലെ ഒമ്പതാം അനുച്ഛേദത്തിന്റെ അടിസ്ഥാനത്തിലാണ് ഈ തീരുമാനം.
പുതിയ നിയമനങ്ങളും മാറ്റങ്ങളും
ലോക്കൽ കണ്ടന്റ് ആൻഡ് ഗവർൺമെന്റ് പ്രൊക്യുർമെന്റ് അതോറിറ്റി: ബോർഡ് ഓഫ് ഡയറക്ടേഴ്സ് ചെയർമാൻ സ്ഥാനത്തുനിന്ന് ബന്ദർ അൽ-ഖോറയേഫിനെ ഒഴിവാക്കി. പകരം പ്രിൻസ് അബ്ദുൽ അസിസ് ബിൻ സൽമാൻ ബിൻ അബ്ദുൽ അസീസിനെ പുതിയ ചെയർമാനായി നിയമിച്ചു.
ക്യാപിറ്റൽ മാർക്കറ്റ് അതോറിറ്റി: ബോർഡ് ചെയർമാൻ സ്ഥാനത്തുണ്ടായിരുന്ന മുഹമ്മദ് അൽ-ഖുവൈസിനെ മാറ്റി. കാബിനറ്റ് പദവിയോടെ മസെൻ അൽ-സുദൈരിയെ ക്യാപിറ്റൽ മാർക്കറ്റ് അതോറിറ്റിയുടെ പുതിയ ബോർഡ് ചെയർമാനായി നിയമിച്ചു.