മക്ക – ഇന്തോനേഷ്യന്‍ തീര്‍ഥാടകക്ക് വിശുദ്ധ ഹറമിന്റെ മുറ്റത്ത് സുഖപ്രസവം. ഹറമിന്റെ തെക്കു ഭാഗത്തെ മുറ്റത്താണ് തീര്‍ഥാടകക്ക് ഇന്ന് രാവിലെ പ്രസവവേദന ആരംഭിച്ചത്. ഇത സംബന്ധിച്ച് രാവിലെ 9.21 ന് റെഡ് ക്രസന്റ് കണ്‍ട്രോള്‍ റൂമില്‍ വിവരം ലഭിച്ചു. ഉടന്‍ തന്നെ റെഡ് ക്രസന്റ് സംഘം സ്ഥലത്തെത്തുകയും അംഗീകൃത മെഡിക്കല്‍ പ്രോട്ടോകോള്‍ പ്രകാരം സംഭവസ്ഥലത്തു വെച്ച് വിജയകരമായി പ്രസവ പ്രക്രിയ നടത്തുകയും ചെയ്തു.
കൂടുതല്‍ പരിചരണത്തിനായി അമ്മയെയും നവജാതശിശുവിനെയും അടുത്തുള്ള ആശുപത്രിയിലേക്ക് മാറ്റി. ഇരുവരുടെയും ആരോഗ്യനില ഭദ്രമാണ്. ഇത്തരം അടിയന്തിര സാഹചര്യങ്ങളില്‍ 997 എന്ന നമ്പറില്‍ വിളിച്ചോ അസ്അഫ്നി ആപ്ലിക്കേഷന്‍ വഴിയോ തവക്കല്‍നാ ആപ്ലിക്കേഷനിലെ ദുരിത കോള്‍ ഫീച്ചര്‍ ഉപയോഗിച്ചോ ആംബുലന്‍സ് സേവനങ്ങള്‍ ആവശ്യപ്പെടാമെന്ന് അധികൃതർ അറിയിച്ചു. ഇത് ഉയര്‍ന്ന കൃത്യതയോടെ സ്ഥലം നിര്‍ണയിക്കുന്നതിനും ആംബുലന്‍സ്-ആരോഗ്യ സംഘങ്ങൾക്ക് ഉടനടി സ്ഥലത്ത് എത്താൻ സഹായിക്കുമെന്നും അതോറിറ്റി അറിയിച്ചു.