മക്ക- വരാനിരിക്കുന്ന ഹജ് നാളുകളിൽ കടുത്ത ചൂട് അനുഭവപ്പെടാൻ സാധ്യതയുള്ളതിനാൽ തീർഥാടകർ അതീവ ജാഗ്രത പുലർത്തണമെന്ന് സൗദി ഹജ്-ഉംറ മന്ത്രാലയം ആവശ്യപ്പെട്ടു. ഈ ദിവസങ്ങളിൽ താപനില 45 ഡിഗ്രി സെൽഷ്യസിനും മുകളിലേക്ക് ഉയരാൻ സാധ്യതയുണ്ട്. അതിനാൽ ഹജ് കർമ്മങ്ങൾ നിർവഹിക്കുന്ന വേളയിൽ സ്വന്തം സുരക്ഷ ഉറപ്പാക്കാൻ ആവശ്യമായ എല്ലാ മുൻകരുതലുകളും തീർഥാടകർ സ്വീകരിക്കണം. തീവ്രമായ സൂര്യപ്രകാശം നേരിട്ട് ഏൽക്കുന്നത് സൂര്യാഘാതത്തിനും കടുത്ത ചൂട് മൂലമുണ്ടാകുന്ന മറ്റ് ഗുരുതരമായ ആരോഗ്യ പ്രശ്നങ്ങൾക്കും കാരണമായേക്കാം. പബ്ലിക് ഹെൽത്ത് അതോറിറ്റിയുമായി (വിഖായ) സഹകരിച്ച് നടത്തുന്ന ‘ഹയ്യാകുമുല്ലാ’ ബോധവൽക്കരണ കാമ്പെയ്നിന്റെ ഭാഗമായി പുറത്തിറക്കിയ ഇൻഫോഗ്രാഫിക് വഴിയാണ് മന്ത്രാലയം ഈ ജാഗ്രതാ നിർദ്ദേശങ്ങൾ വിശദീകരിച്ചിരിക്കുന്നത്.
തീർഥാടകർക്ക് നല്ല ആരോഗ്യത്തോടെയും സുരക്ഷിതമായും ഹജ് കർമ്മങ്ങൾ പൂർത്തിയാക്കാൻ പ്രധാനമായും മൂന്ന് പ്രതിരോധ മാർഗ്ഗങ്ങളാണ് മന്ത്രാലയം മുന്നോട്ട് വെക്കുന്നത്. ചൂട് ഏറ്റവും അധികം കൂടുന്ന രാവിലെ 10:00 മണി മുതൽ വൈകുന്നേരം 4:00 മണി വരെയുള്ള സമയങ്ങളിൽ അത്യാവശ്യ കാര്യങ്ങൾക്കൊഴികെ പുറത്തിറങ്ങുന്നത് പരമാവധി ഒഴിവാക്കുകയാണ് ആദ്യ പടി. പുറത്തിറങ്ങേണ്ടി വരുന്ന സാഹചര്യങ്ങളിൽ സൂര്യപ്രകാശം നേരിട്ട് ശരീരത്ത് അടിക്കാതിരിക്കാൻ എപ്പോഴും കുട ഉപയോഗിക്കണം. ശരീരത്തിലെ ജലാംശം നിലനിർത്താനും നിർജലീകരണം പോലുള്ള ആരോഗ്യപ്രശ്നങ്ങൾ ഒഴിവാക്കാനും കൃത്യമായ ഇടവേളകളിൽ വെള്ളം കുടിച്ചുകൊണ്ടിരിക്കണമെന്നും മന്ത്രാലയം ഓർമ്മിപ്പിക്കുന്നു.
തീർഥാടകരുടെ ആരോഗ്യ സംരക്ഷണവും സുരക്ഷയും ഉറപ്പാക്കുന്നതിനായി ഹജ് സേവന സംവിധാനങ്ങൾ നടത്തിവരുന്ന വിപുലമായ ബോധവൽക്കരണ ശ്രമങ്ങളുടെ ഭാഗമായാണ് ഈ പുതിയ മുന്നറിയിപ്പുകൾ. ഇസ്ലാമിന്റെ അഞ്ചാമത്തെ സ്തംഭമായ പരിശുദ്ധ ഹജ് കർമ്മം എല്ലാ തീർഥാടകർക്കും ഏറെ എളുപ്പത്തിലും മനസ്സമാധാനത്തോടെയും ഭക്തിസാന്ദ്രമായും നിർവഹിക്കാൻ ഈ ജാഗ്രതാ നിർദ്ദേശങ്ങൾ പാലിക്കുന്നത് വഴി സാധ്യമാകുമെന്നും അധികൃതർ പ്രത്യാശ പ്രകടിപ്പിച്ചു.