റിയാദ്- സൗദി അറേബ്യ വിട്ടുപോവുകയും പുതിയ വിസയിൽ തിരിച്ചെത്തുകയും ചെയ്ത പ്രവാസികൾക്ക് ഡ്രൈവിംഗ് സ്കൂളുകൾ സന്ദർശിക്കാതെ തന്നെ തങ്ങളുടെ മുൻപത്തെ സൗദി ഡ്രൈവിംഗ് ലൈസൻസുകൾ പുതുക്കാനും വീണ്ടും ലഭിക്കാനും സൗകര്യമൊരുക്കുന്ന പുതിയ സേവനം ‘അബ്ഷീർ’ (Absher) പ്ലാറ്റ്‌ഫോം ആരംഭിച്ചു. സ്വകാര്യ(പ്രൈവറ്റ്) സൗദി ഡ്രൈവിംഗ് ലൈസൻസ് ഉള്ളവർക്കാണ് ഈ സേവനം ലഭ്യമാകുക.
Replacement of a Previous Saudi Driver’s License for a Resident എന്ന സേവനത്തിലൂടെ ഉപയോക്താവിന് തങ്ങളുടെ മുൻപത്തെ ലൈസൻസ് തിരഞ്ഞെടുക്കാനും, പുതുക്കേണ്ട കാലാവധി നിശ്ചയിക്കാനും, ഡെലിവറി വിലാസം നൽകാനും, സേവന ഫീസ് ഇലക്ട്രോണിക് രീതിയിൽ അടയ്ക്കാനും സാധിക്കും. തുടർന്ന് ലൈസൻസ് നൽകുകയും ഉപയോക്താവിന് എത്തിച്ചുനൽകുകയും ചെയ്യും.
അപേക്ഷ സമർപ്പിക്കുന്ന തീയതി മുതൽ 3 മുതൽ 7 പ്രവൃത്തിദിവസങ്ങൾക്കുള്ളിൽ നടപടിക്രമങ്ങൾ പൂർത്തിയാകുമെന്നാണ് അബ്ഷീർ കണക്കാക്കുന്നത്. വാറ്റും (VAT) ബാധകമായ സർക്കാർ ഫീസും ഉൾപ്പെടെ 57.5 സൗദി റിയാലാണ് സേവന ഫീസ്.