ജിദ്ദ: സൗദി കേബിൾ കമ്പനിയിലെ മലയാളി ജീവനക്കാരുടെ കൂട്ടായ്മയായ എസ്.സി.സി.എം.എസ്.കെ. (SCCMSK) നാലാം വാർഷികാഘോഷവും വിരമിച്ച ജീവനക്കാർക്കുള്ള യാത്രയയപ്പ് ചടങ്ങും ഹറാസാത്തിലെ വില്ലയിൽ നടന്നു. ദീർഘകാലത്തെ പ്രവാസ ജീവിതം അവസാനിപ്പിച്ചു മടങ്ങുന്ന എച്ച്.ആർ. ഡിപ്പാർട്ട്മെന്റ് ഉദ്യോഗസ്ഥൻ ടി.പി. മുഹമ്മദ് ഇഖ്ബാൽ (ഇഖ്ബാൽ മാഷ്), പ്ലാനിങ് ഡിപ്പാർട്ട്മെന്റിൽ നിന്ന് വിരമിച്ച കെ.കെ. മുസ്തഫ എന്നിവർക്ക് യാത്രയയപ്പ് നൽകി. 28 വർഷത്തെ സേവനത്തിനുശേഷമാണ് ഇഖ്ബാൽ മാഷും, 24 വർഷത്തെ സേവനത്തിനുശേഷം മുസ്തഫയും പ്രവാസം അവസാനിപ്പിക്കുന്നത്.
കൂട്ടായ്മ പ്രസിഡന്റ് സിറാജ് കൂടാട്ടിന്റെ അദ്ധ്യക്ഷതയിൽ ചേർന്ന യോഗത്തിൽ സെക്രട്ടറി റിയാസ് പിലാക്കൽ സ്വാഗതവും ട്രഷറർ ഷിജു ചാക്കോ റിപ്പോർട്ടും അവതരിപ്പിച്ചു. ബാബു ജസീൻ, ഇഖ്ബാൽ (ഷിപ്പിങ്), മുഷ്താഖ് അഹമ്മദ്, കെ. അബ്ദുൽ കരീം എന്നിവർ ആശംസകൾ നേർന്നു. തുടർന്ന് നടന്ന ഗാനനിശയിൽ ജിദ്ദയിലെ പ്രശസ്ത ഗായകരായ സോഫിയ സുനിൽ, ഹകീം അരിമ്പ്ര, കൂട്ടായ്മ അംഗം മുസാഫിർ എന്നിവർ ആലപിച്ച ഗാനങ്ങൾ സദസ്സിന് സംഗീതവിരുന്നായി.
വാർഷികാഘോഷത്തിന്റെ ഭാഗമായി മുതിർന്നവർക്കായി ഫുട്ബോൾ, കമ്പവലി, ഷൂട്ടൗട്ട് മത്സരങ്ങളും കുട്ടികൾക്കായി വിവിധ കലാ-കായിക മത്സരങ്ങളും സംഘടിപ്പിച്ചു. ആവേശകരമായ ഷൂട്ടൗട്ട് മത്സരത്തിൽ ഇഖ്ബാൽ മാഷ് ട്രോഫി കരസ്ഥമാക്കി. വിജയികൾക്കുള്ള ട്രോഫികളും മെഡലുകളും ചടങ്ങിൽ വിതരണം ചെയ്തു. സംഗമത്തിൽ പങ്കെടുത്ത കുടുംബിനികൾക്ക് പ്രത്യേക ഉപഹാരങ്ങളും നൽകി.
ചടങ്ങിൽ കൂട്ടായ്മയുടെ പുതിയ എക്സിക്യൂട്ടീവ് കമ്മിറ്റിയെ തിരഞ്ഞെടുത്തു. സിറാജ്, റിയാസ്, ഷിജു, അർഷദ്, ജലീൽ, നിഷാദ്, ഫസൽ, സമീർ, ഹൈദർ, മുസാഫിർ, ഷബീർ, മുജീബ് എന്നിവരാണ് പുതിയ കമ്മിറ്റി അംഗങ്ങൾ.