മക്ക -വിശുദ്ധ ഹറമില് ഉംറ തീര്ഥാടകന്റെ സാഹസികമായ നമസ്കാരം. സ്വന്തം ജീവന് അപകടത്തിലാകും വിധം ഹറമിന്റെ മുകള് നിലയില് ഏതാനും ഇഞ്ചുകള് മാത്രം വീതിയുള്ള ചില്ല് ബാരിക്കേഡിന്റെ മുകളിലെ പാനലില് കയറിനിന്നാണ് തീര്ഥാടകന് തറാവീഹ് നമസ്കാരം നിര്വഹിച്ചത്. ബാലന്സ് തെറ്റിയാല് തീര്ഥാടകന് താഴേക്ക് വീണ് ജീവന് അപകടത്തിലാകുമായിരുന്നു. ഇതിന്റെ ദൃശ്യങ്ങള് അടങ്ങിയ വീഡിയോ ദൃക്സാക്ഷികളില് ഒരാള് ചിത്രീകരിച്ച് സാമൂഹികമാധ്യമങ്ങളിലൂടെ പുറത്തുവിട്ടു.
നിര്ദേശങ്ങളും ക്രമീകരണങ്ങളും ലംഘിച്ച് സ്വന്തം ജീവന് അപകടത്തിലാക്കും വിധം തീര്ഥാടകന് ഹറമില് നമസ്കാരം നിര്വഹിച്ച സംഭവത്തില് ഹജ്, ഉംറ സുരക്ഷാ സേന ഇടപെട്ട് തീര്ഥാടനെ അവിടെ നിന്ന് അകറ്റിനിര്ത്തി നമസ്കാരം നിര്വഹിക്കാന് നിശ്ചയിച്ച സ്ഥലത്തേക്ക് മാറ്റിയതായി പൊതുസുരക്ഷാ വകുപ്പ് പറഞ്ഞു. വിശുദ്ധ ഹറമില് നിര്ദേശങ്ങളും ചട്ടങ്ങളും പാലിക്കേണ്ടതും പ്രത്യേകം നിശ്ചയിച്ച സ്ഥലങ്ങളില് നമസ്കാരങ്ങള് നിര്വഹിക്കേണ്ടതും പ്രധാനമാണ്. ഇത് ഹറം സന്ദര്ശകരുടെ സുരക്ഷ കാത്തുസൂക്ഷിക്കാന് സഹായിക്കുമെന്ന് പൊതുസുരക്ഷാ വകുപ്പ് പറഞ്ഞു.