റിയാദ്- സ്‌പോണ്‍സറുടെ മകന്റെ നിര്‍ദേശപ്രകാരം കടയിലെത്തിയ പാര്‍സല്‍ ഏറ്റുവാങ്ങി സൂക്ഷിച്ചതിന്റെ പേരില്‍ മയക്കുമരുന്ന് കേസില്‍ കുടുങ്ങി 20 വര്‍ഷത്തെ തടവുശിക്ഷ ലഭിച്ച ഇന്ത്യക്കാരന് കേളി കലാ സാംസ്‌കാരിക വേദി തുണയായി. മാസങ്ങള്‍ നീണ്ട നിയമപോരാട്ടത്തിനൊടുവില്‍ കോടതിയില്‍ നിരപരാധിത്വം തെളിയിക്കാനായതോടെ കുറ്റവിമുക്തനായി. അല്‍ഖര്‍ജ് മേഖലയില്‍ പിതാവും മകനും ചേര്‍ന്ന് നടത്തുന്ന ബക്കാലയിലാണ് സംഭവം നടന്നത്.
സ്‌പോണ്‍സറുടെ കടയില്‍ ജോലി ചെയ്തിരുന്ന ഉത്തര്‍പ്രദേശ് സ്വദേശി മുഹമ്മദ് ഷംസാണ് താനറിയാതെ മയക്കുമരുന്ന് കേസില്‍ പ്രതിയായത്. സ്‌പോണ്‍സറുടെ മൂത്ത മകന്‍ ഫോണില്‍ വിളിച്ച് കടയ്ക്കു മുന്നില്‍ ഒരു വാഹനം എത്തിയിട്ടുണ്ടെന്നും അതിലുള്ള സാധനങ്ങള്‍ സ്ഥാപനത്തിനുള്ളില്‍ ഇറക്കിവെക്കണമെന്നും പിന്നീട് വന്ന് എടുത്തുകൊള്ളാമെന്നും അറിയിക്കുകയായിരുന്നു. പരിചയമുള്ളവരുടെ നിര്‍ദേശമാണെന്ന വിശ്വാസത്തില്‍ തൊഴിലാളികള്‍ പാര്‍സല്‍ കടയ്ക്കുള്ളില്‍ ഇറക്കിവെച്ചു. എന്നാല്‍ വാഹനത്തില്‍ എത്തിച്ച സാധനങ്ങള്‍ മയക്കുമരുന്നായിരുന്നുവെന്ന കാര്യം ഇവര്‍ അറിഞ്ഞിരുന്നില്ല.
പിന്നീട് സ്ഥലത്തെത്തിയ സി ഐ ഡി സംഘം സാധനങ്ങള്‍ പരിശോധിച്ചപ്പോഴാണ് മയക്കുമരുന്നാണെന്ന് വ്യക്തമായത്. വാഹനത്തിലെ സാധനങ്ങള്‍ സ്‌പോണ്‍സറുടെ മകന്റെ നിര്‍ദേശപ്രകാരമാണ് ഏറ്റുവാങ്ങിയതെന്ന് തൊഴിലാളികള്‍ അന്വേഷണ ഉദ്യോഗസ്ഥരോട് വിശദീകരിച്ചു. നിര്‍ദേശം നല്‍കിയ നമ്പറിലേക്ക് തിരികെ വിളിക്കാന്‍ സി ഐ ഡി ആവശ്യപ്പെട്ടു. എന്നാല്‍ ഫോണില്‍ സംസാരിച്ചിരുന്നത് മൂത്ത മകനായിരുന്നില്ല, ഇളയ മകനായിരുന്നു. ഇയാളെ കസ്റ്റഡിയിലെടുത്ത് വീട്ടില്‍ നടത്തിയ പരിശോധനയില്‍ സമാനമായ വസ്തുക്കള്‍ കണ്ടെത്തി. ഇതോടെ കടയില്‍ ജോലി ചെയ്തിരുന്ന രണ്ടുപേരെയും കസ്റ്റഡിയിലെടുത്തു.
സംഭവസമയത്ത് പിതാവ് നാട്ടിലായിരുന്നു. വിവരം അറിഞ്ഞതോടെ അവധി റദ്ദാക്കി അദ്ദേഹം അടിയന്തരമായി സൗദിയിലെത്തി. മകന്‍ നിരപരാധിയാണെന്ന് ബോധ്യപ്പെടുത്താന്‍ ശ്രമിച്ചെങ്കിലും കോടതി 20 വര്‍ഷത്തെ തടവുശിക്ഷ വിധിച്ചതോടെ കുടുംബം പ്രതിസന്ധിയിലായി.
ഈ ഘട്ടത്തിലാണ് തടവിലായ പ്രവാസിയുടെ പിതാവ് അന്‍സാരി സഹായം തേടി കേളി കലാ സാംസ്‌കാരിക വേദിയെ സമീപിച്ചത്. കേളി ജീവകാരുണ്യ വിഭാഗം ജോയിന്റ് കണ്‍വീനര്‍ നാസര്‍ പൊന്നാനി വിഷയത്തില്‍ ഇടപെട്ടു. ഇന്ത്യന്‍ എംബസിയെ വിവരങ്ങള്‍ ധരിപ്പിച്ച് നിയമനടപടികളില്‍ ഇടപെടുന്നതിനും ജയിലില്‍ സന്ദര്‍ശനം നടത്തുന്നതിനുമുള്ള അനുമതിപത്രം ലഭ്യമാക്കി. തുടര്‍ന്ന് എട്ടുമാസത്തോളം കേസുമായി ബന്ധപ്പെട്ട രേഖകളും വിവരങ്ങളും ശേഖരിച്ച് നിയമസഹായത്തിനുള്ള ശ്രമങ്ങള്‍ തുടര്‍ന്നു.
അഭിഭാഷകനെ കണ്ടെത്തി കേസ് വിശദമായി അവതരിപ്പിച്ചു. പ്രതിയുടെ നിരപരാധിത്വം തെളിയിക്കുന്ന സാഹചര്യങ്ങള്‍ ചൂണ്ടിക്കാട്ടി അഭിഭാഷകന്‍ കോടതിയില്‍ ഹര്‍ജി സമര്‍പ്പിച്ചു. തുടര്‍ന്നുള്ള നാലുമാസത്തെ നിയമനടപടികള്‍ക്കൊടുവില്‍ കേസ് വീണ്ടും പരിഗണിക്കുകയും പ്രതി കുറ്റക്കാരനല്ലെന്ന് ബോധ്യപ്പെടുകയും ചെയ്തു. ഇതോടെ തടവിലായിരുന്ന ഇയാള്‍ക്ക് മോചനം ലഭിക്കുകയായിരുന്നു.