അബുദാബി- യു.എ.ഇയിൽ അറഫാ ദിനവും ബലിപെരുന്നാളും പ്രമാണിച്ച് സ്വകാര്യ മേഖലയിലെ ജീവനക്കാർക്ക് നാല് ദിവസത്തെ ശമ്പളത്തോടെയുള്ള അവധി പ്രഖ്യാപിച്ചു. മാനവവിഭവശേഷി സ്വദേശിവൽക്കരണ മന്ത്രാലയമാണ് ഇക്കാര്യം അറിയിച്ചത്. മെയ് 26 ചൊവ്വാഴ്ച മുതൽ മെയ് 29 വെള്ളിയാഴ്ച വരെയാണ് സ്വകാര്യ മേഖലയ്ക്ക് അവധി ലഭിക്കുക. ഇതിനുശേഷം ജൂൺ 1 തിങ്കളാഴ്ച മുതൽ സ്ഥാപനങ്ങൾ സാധാരണ രീതിയിൽ പ്രവർത്തിച്ചുതുടങ്ങും.
ഫെഡറൽ അതോറിറ്റി ഫോർ ഗവൺമെന്റ് ഹ്യൂമൻ റിസോഴ്സസ് യു.എ.ഇയിലെ പൊതുമേഖലാ ജീവനക്കാർക്ക് അഞ്ച് ദിവസത്തെ ശമ്പളത്തോടെയുള്ള അവധി നേരത്തെ തന്നെ പ്രഖ്യാപിച്ചിരുന്നു. മെയ് 25 തിങ്കളാഴ്ച ആരംഭിക്കുന്ന ഈ പൊതുമേഖലാ അവധി മെയ് 29 വെള്ളിയാഴ്ച വരെ നീണ്ടുനിൽക്കും. സർക്കാർ മേഖലയിലുള്ളവർക്കും ജൂൺ 1 തിങ്കളാഴ്ച മുതലായിരിക്കും ജോലി പുനരാരംഭിക്കുക.
ഇത്തവണ യു.എ.ഇയിലെ വിദ്യാർത്ഥികൾക്ക് കൂടുതൽ ദിവസത്തെ പെരുന്നാൾ അവധി ലഭിക്കുന്നുണ്ടെന്ന് വിദ്യാഭ്യാസ മന്ത്രാലയം സ്ഥിരീകരിച്ചു. മൂന്നാം ടേമിലെ മധ്യവേനൽ അവധിയായി മെയ് 25 മുതൽ മെയ് 29 വരെയുള്ള ദിവസങ്ങൾ പ്രഖ്യാപിച്ചതോടെ സ്കൂളുകൾക്ക് ഒമ്പത് ദിവസം വരെയാണ് അവധി ലഭിക്കുക. ജൂൺ 1 ന് ക്ലാസുകൾ വീണ്ടും തുടങ്ങും. ദുബായിലെ സ്വകാര്യ സ്കൂളുകൾ ഇതേ രീതി പിന്തുടരുമ്പോൾ, വാരാന്ത്യ ദിനങ്ങൾ കൂടി ഉൾപ്പെടുന്നതിനാൽ ഷാർജയിലെ സ്വകാര്യ സ്കൂളുകൾക്ക് 10 ദിവസത്തെ അവധി ലഭിക്കും.
അതേസമയം, ഒമാനിലും അറഫാ ദിനവും ബലിപെരുന്നാളും പ്രമാണിച്ച് പൊതു-സ്വകാര്യ മേഖലകൾക്ക് ഒമാൻ ന്യൂസ് ഏജൻസി അഞ്ച് ദിവസത്തെ അവധി പ്രഖ്യാപിച്ചിട്ടുണ്ട്. ഒമാനിൽ മെയ് 26 ചൊവ്വാഴ്ചയാണ് അവധി ആരംഭിക്കുന്നത്. പെരുന്നാൾ അവധിക്ക് ശേഷം മെയ് 31 ഞായറാഴ്ച മുതൽ രാജ്യത്ത് ഔദ്യോഗിക പ്രവൃത്തി സമയം പുനരാരംഭിക്കുമെന്നും അധികൃതർ അറിയിച്ചു.