ദുബായിലേക്കുള്ള സ്‌പൈസ് ജെറ്റ് വിമാനങ്ങൾ 24 മണിക്കൂർ വൈകി; വിമാനത്താവളത്തിൽ യാത്രക്കാരുടെ പ്രതിഷേധം

ന്യൂഡൽഹി- ഡൽഹിയിൽ നിന്ന് ദുബായിലേക്ക് പുറപ്പെടേണ്ടിയിരുന്ന സ്‌പൈസ് ജെറ്റ് വിമാനങ്ങൾ 24 മണിക്കൂറിലേറെ വൈകിയതിനെ തുടർന്ന് ഡൽഹി വിമാനത്താവളത്തിൽ കുത്തിയിരുന്ന് പ്രതിഷേധിച്ച് യാത്രക്കാർ.
എസ്.ജി 5111, എസ്.ജി 5105 ഡൽഹി – ദുബായ് വിമാനങ്ങളാണ് വൈകിയത്. തിങ്കളാഴ്ച രാവിലെ 7:45ന് പുറപ്പെടേണ്ടിയിരുന്ന വിമാനം ഇന്ന് രാവിലെ 9 മണിയായിട്ടും പുറപ്പെട്ടിരുന്നില്ല. തുടർന്ന് ഈ സർവീസ് റദ്ദാക്കിയതായാണ് ഫ്‌ലൈറ്റ് റഡാർ വിവരങ്ങൾ വ്യക്തമാക്കുന്നത്.

തിങ്കളാഴ്ച വൈകുന്നേരം 6:45ന് പുറപ്പെടേണ്ട എസ്.ജി 2101 വിമാനം ബുധനാഴ്ച പുലർച്ചെ ഒരു മണിക്ക് പുറപ്പെടുമെന്നാണ് ഫ്‌ലൈറ്റ് റഡാർ ഡാറ്റ വ്യക്തമാക്കുന്നത്.
എയർലൈൻ ജീവനക്കാരെ സ്ഥലത്ത് കാണാത്തതിലും കൃത്യമായ വിവരങ്ങൾ നൽകാത്തതിലും പ്രതിഷേധിച്ച് യാത്രക്കാർ വിമാനത്താവളത്തിലെ തറയിൽ കുത്തിയിരുന്നു പ്രതിഷേധിച്ചു. തുടർന്ന് വിമാനത്താവള അധികൃതർ ഇടപെട്ടാണ് യാത്രക്കാർക്ക് ഭക്ഷണവും വെള്ളവും എത്തിച്ചുനൽകി.