ദോഹ– ഖത്തര് എന്ന പ്രവാസ ലോകത്തിന്റെ സാംസ്കാരിക വേദികളിലെ നിറ സാന്നിധ്യമായ നാടന് പാട്ടു കൂട്ടായ്മയായ കനല് ഖത്തര് സംഘടിപ്പിച്ച ‘വാമൊഴിയാട്ടം 2026’ ശ്രദ്ധേയമായി. ഖത്തറിലെ വിവിധ ഇന്ത്യന് സ്കൂളുകളിലെ വിദ്യാര്ത്ഥികള്ക്കായി നടത്തിയ ഇന്റര് സ്കൂള് നാടന്പാട്ട് മത്സരവും അവാര്ഡ് ദാന ചടങ്ങുമായിരുന്നു മുഖ്യപരിപാടികള്. പലതരം സംസ്കാരങ്ങളെ വിളിച്ചോതുന്ന നാടന്പാട്ടുകള് മനോഹരമായി അവതരിപ്പിച്ച് വിദ്യാര്ത്ഥികള് കൈയ്യടി നേടി.
കനല് ഖത്തര് പ്രസിഡന്റ് ശിഹാബ് തൂണേരി അധ്യക്ഷതയില് നടന്ന ചടങ്ങ് ഇന്ത്യന് കള്ച്ചറല് സെന്റര് സെക്രട്ടറി എബ്രഹാം ജോസഫ് ഉദ്ഘാടനം ചെയ്തു. പ്രശസ്ത സാഹിത്യകാരന് ശിഹാബുദ്ദീന് പൊയ്ത്തുംകടവ് മുഖ്യാഥിതിയായിരുന്നു. കനല് ഖത്തര് പ്രതിഭാ പുരസ്കാരം നേടിയ നാടന്പാട്ട് മേഖലയിലെ പ്രഗത്ഭ കലാകാരന് റംഷി പട്ടുവം ശിഹാബുദ്ദീന് പൊയ്ത്തുംകടവില് നിന്ന് ആദരവ് എറ്റുവാങ്ങി. അവാര്ഡ് തുക മീഡിയപെന് ഡയറക്ടര് ബിനുകുമാര് ജേതാവിന് കൈമാറി. ഇന്ത്യന് കള്ച്ചറല് സെന്റര് വനിതാ വിഭാഗം പ്രതിനിധിയും ഭവന്സ് സ്കൂള് ഡയരക്ടറുമായ അഞ്ജന മേനോന് പ്രശസ്തിപത്രം കൈമാറി. ഐസിബിഎഫ് സെക്രട്ടറി ജാഫര് തയ്യില്, സംസ്കൃതി പ്രസിഡന്റ് സാബിത് സഹീര്, ഇന്കാസ് ഭാരവാഹി ബോബന്, ഗഫൂര് കാലിക്കറ്റ്, അബ്ദുല് റൗഫ് കൊണ്ടോട്ടി, പ്രേമ ശരത്ചന്ദ്രന് തുടങ്ങിയവര് സംബന്ധിച്ചു. പ്രോഗ്രാം ഡയറക്ടര് ഷൈജു ധമനി സ്വാഗതവും സുധീര്ബാബു നന്ദിയും പറഞ്ഞു.
ഖത്തറിലെ മറ്റൊരു പ്രശസ്തമായ കൈതോല നാടന്പാട്ട് സംഘത്തെ കനല് ഖത്തര് ആദരിച്ചു. സ്കൂള് വിദ്യാര്ത്ഥികള്ക്കായി നടത്തിയ വാശിയേറിയ നാടന്പാട്ട് മത്സരത്തില് ഭവന്സ് പബ്ലിക് സ്കൂള് ഒന്നാം സ്ഥാനവും ഒലിവ് ഇന്റര്നാഷണല് സ്കൂള് രണ്ടാം സ്ഥാനവും നേടി. മൂന്നാം സ്ഥാനം നേടിയതും ഭവന്സ് സ്കൂള് തന്നെയാണ്. കനല് മേളം സമിതിയുടെ മനോഹരമായ ചെണ്ടമേളവും കനല് ഖത്തര് കലാകാരന്മാരും അവാര്ഡ് ജേതാവ് റംഷി പട്ടുവവും ചേര്ന്ന് കൊണ്ടുള്ള നാട്ടുപാട്ടുകളും കാണികളുടെ മനം കവര്ന്നു.