വിറ്റ സാധനങ്ങൾ തിരിച്ചെടുക്കില്ലെന്ന് ബോർഡ് വെച്ചാൽ 1,000 റിയാൽ പിഴ: സൗദി വാണിജ്യ മന്ത്രാലയം

ജിദ്ദ– വിറ്റ സാധനങ്ങൾ തിരിച്ചെടുക്കുകയോ മാറ്റി നൽകുകയോ ചെയ്യില്ല എന്ന് പരസ്യപ്പെടുത്തുന്ന സ്ഥാപനങ്ങൾക്കെതിരെ കർശന നടപടിയുമായി സൗദി വാണിജ്യ മന്ത്രാലയം. ഇത്തരത്തിൽ നോട്ടിസ് പതിക്കുന്ന സ്ഥാപനങ്ങൾക്ക് 1,000 റിയാൽ പിഴ ചുമത്തുമെന്ന് മന്ത്രാലയം വ്യക്തമാക്കി.

ഭക്ഷ്യവസ്തുക്കൾക്ക് മന്ത്രാലയമോ ബന്ധപ്പെട്ട അധികാരികളോ നിശ്ചയിച്ച തുകയേക്കാൾ കൂടുതൽ ഈടാക്കിയാൽ 1,00,000 റിയാൽ വരെ പിഴ ലഭിക്കും. വിൽപന വിലയും നിശ്ചിത വിലയും തമ്മിലുള്ള വ്യത്യാസം കണക്കാക്കി ഓരോ ഇനത്തിനും കുറഞ്ഞത് 5,000 റിയാൽ മുതൽ പരമാവധി 1,00,000 റിയാൽ വരെയാണ് പിഴ ഈടാക്കുക. നിയമലംഘനങ്ങൾ പരിഹരിക്കുന്നതിനായി നോട്ടീസ് നൽകിയ ശേഷം 14 ദിവസത്തെ സാവകാശം നൽകും.

മലയാളം ന്യൂസ് വാട്സാപ്പ് ചാനലിൽ ജോയിൻ ചെയ്യാൻ ഇവിടെ ക്ലിക്ക് ചെയ്യുക

വിവിധ നിയമലംഘനങ്ങളും പിഴ തുകയും:

• ബിൽ നൽകാതിരിക്കലും വില പ്രദർശിപ്പിക്കാതിരിക്കലും: ഉൽപന്നങ്ങളുടെ വില പ്രദർശിപ്പിക്കാതിരിക്കൽ, ബില്ലുകൾ നൽകാൻ വിസമ്മതിക്കൽ, പരസ്യപ്പെടുത്തിയ വിലയും അന്തിമ വിലയും തമ്മിലുള്ള പൊരുത്തക്കേടുകൾ എന്നിവയ്ക്ക് 200 മുതൽ 1,000 റിയാൽ വരെ പിഴ ചുമത്തും.
• ബാങ്ക് അക്കൗണ്ടുകൾ: സ്വന്തം ബാങ്ക് അക്കൗണ്ടുകൾ തുറക്കാത്ത സ്ഥാപനങ്ങൾക്ക് 1,000 മുതൽ 5,000 റിയാൽ വരെയാണ് പിഴ. ഇവർക്ക് പദവി ശരിയാക്കാൻ 30 ദിവസത്തെ സമയം അനുവദിക്കും.
• വ്യാജ/അജ്ഞാത ഉൽപന്നങ്ങൾ: അജ്ഞാത ഉറവിടങ്ങളിൽ നിന്നുള്ളതോ തെറ്റിദ്ധരിപ്പിക്കുന്ന വിവരങ്ങൾ അടങ്ങിയതോ ആയ സാധനങ്ങൾ കൈവശം വെക്കുകയോ പ്രദർശിപ്പിക്കുകയോ ചെയ്യുന്നത് ഗുരുതര നിയമലംഘനമായി കണക്കാക്കി 1,000 മുതൽ 5,000 റിയാൽ വരെ പിഴ ചുമത്തും.
• ഡിജിറ്റൽ പേയ്മെന്റ്: ഇലക്ട്രോണിക് പേയ്മെന്റ് രീതികൾ ഏർപ്പെടുത്താതിരുന്നാൽ 200 മുതൽ 1,000 റിയാൽ വരെയും, ഡിജിറ്റൽ പേയ്മെന്റ് സ്വീകരിക്കാൻ വിസമ്മതിച്ചാൽ 400 മുതൽ 2,000 റിയാൽ വരെയും പിഴ ഈടാക്കും.
• ഭക്ഷ്യവസ്തുക്കൾ പാഴാക്കൽ: അനുവദിച്ച് കിട്ടിയ ക്വാട്ടയുടെ 5 ശതമാനത്തിൽ കൂടുതൽ മൈദ, മാവ്, റൊട്ടി എന്നിവ പാഴാക്കിയാൽ 1,000 മുതൽ 5,000 റിയാൽ വരെയും, സബ്‌സിഡി മൈദ റീ-പാക്ക് ചെയ്ത് മറിച്ചുവിറ്റാൽ 2,000 മുതൽ 10,000 റിയാൽ വരെയും പിഴ ലഭിക്കും.
• ദേശീയ/മത ചിഹ്നങ്ങളുടെ ദുരുപയോഗം: ദേശീയ ചിഹ്നങ്ങളും ലോഗോകളും, മതപരവും വിഭാഗീയവുമായ ചിഹ്നങ്ങളും വാണിജ്യ ആവശ്യങ്ങൾക്ക് ദുരുപയോഗം ചെയ്യുന്നതിനും 200 മുതൽ 1,000 റിയാൽ വരെയാണ് പിഴ.

ആവർത്തിച്ചുണ്ടാകുന്ന നിയമലംഘനങ്ങൾക്കും വീഴ്ചകൾക്കും പിഴ തുക ഇരട്ടിയാക്കുമെന്നും മന്ത്രാലയം മുന്നറിയിപ്പ് നൽകി.