റൊസാരിയോ: അർജന്റീന ഫുട്ബോൾ ഇതിഹാസം ലയണൽ മെസിയുടെ പിതാവും ദീർഘകാല ഏജന്റുമായ ജോർജെ മെസി (68) അന്തരിച്ചു. ദീർഘനാളായി അസുഖബാധിതനായിരുന്ന അദ്ദേഹം ശനിയാഴ്ച പുലർച്ചെ അർജന്റീനയിലെ സ്വന്തം നാടായ റൊസാരിയോയിലെ ആശുപത്രിയിലായിരുന്നു അന്തരിച്ചത്. മെസിക്ക് 14 വയസ്സുള്ളപ്പോൾ മുതൽ അദ്ദേഹത്തിന്റെ ഏജന്റായി പ്രവർത്തിച്ചിരുന്നത് പിതാവ് ജോർജെയായിരുന്നു. മകന്റെ ഫുട്ബോൾ കരിയറിന്റെ വളർച്ചയിൽ നിർണായക പങ്കുവഹിച്ച വ്യക്തിയായിരുന്നു അദ്ദേഹം. മെസിയുടെ കരിയറിലെ പ്രധാന ഘട്ടങ്ങളിലെല്ലാം പിന്നിൽ ശക്തമായ പിന്തുണയുമായി ജോർജെ ഉണ്ടായിരുന്നു.
ഈ വർഷത്തെ ലോകകപ്പിനിടെ ജോർജെയുടെ ആരോഗ്യനിലയെക്കുറിച്ച് നിരവധി അഭ്യൂഹങ്ങൾ പ്രചരിച്ചിരുന്നു. തുടർന്ന് മെസിയുടെ കുടുംബം അദ്ദേഹം ആരോഗ്യവുമായി ബന്ധപ്പെട്ട ചില പ്രശ്നങ്ങൾ നേരിടുന്നുണ്ടെന്ന് സ്ഥിരീകരിച്ചിരുന്നെങ്കിലും രോഗവിവരങ്ങൾ പുറത്തുവിട്ടിരുന്നില്ല.
2022ലെ ഖത്തർ ലോകകപ്പിൽ അർജന്റീന കിരീടം നേടിയ ചരിത്രനിമിഷത്തിന് സാക്ഷിയാകാനും ജോർജെ മെസിയുണ്ടായിരുന്നു. അർജന്റീന മൂന്നാം ലോകകപ്പ് കിരീടം സ്വന്തമാക്കുന്നത് അദ്ദേഹം നേരിൽ കണ്ടു.
എട്ട് ബാലൺ ഡി ഓർ പുരസ്കാരങ്ങളും ബാഴ്സലോണയ്ക്കൊപ്പം നാല് ചാമ്പ്യൻസ് ലീഗ് കിരീടങ്ങളും 10 ലാ ലിഗ കിരീടങ്ങളും സ്വന്തമാക്കിയ മെസിയുടെ അസാധാരണ കരിയറിന്റെ വളർച്ചയിൽ പിതാവിന്റെ പങ്ക് നിർണായകമായിരുന്നു. റൊസാരിയോയിലെ ന്യൂവെൽസ് ഓൾഡ് ബോയ്സിന്റെ ആരാധകനായിരുന്ന ജോർജെയുടെ മകൻ ലയണൽ മെസി ഏഴാം വയസ്സിലാണ് ക്ലബിന്റെ അക്കാദമിയിൽ ചേർന്നത്. 2001 ഫെബ്രുവരിയിൽ 13-ാം വയസ്സിൽ ബാഴ്സലോണയുമായി കരാറായതിനെ തുടർന്ന് കുടുംബം സ്പെയിനിലേക്ക് താമസം മാറി. പിന്നീട് മാതാവും സഹോദരങ്ങളും റൊസാരിയോയിലേക്ക് മടങ്ങിയെങ്കിലും ജോർജെ മകനൊപ്പം ബാഴ്സലോണയിൽ തുടരുകയായിരുന്നു.
ലോകത്തിലെ എക്കാലത്തെയും മികച്ച താരത്തിന്റെ കരിയറിനെ കാഴ്ചപ്പാടോടെയും കർശനമായ പിന്തുണയോടെയും സ്നേഹത്തോടെയും മുന്നോട്ട് നയിച്ച തൂണായിരുന്നു ജോർജെ- ന്യൂവെൽസ് ഓൾഡ് ബോയ്സ് അനുശോചന സന്ദേശത്തിൽ പറഞ്ഞു. മെസിയുടെ ബാല്യകാലം മുതൽ ലോക ഫുട്ബോളിന്റെ ഉന്നതിയിലെത്തുന്നതുവരെയുള്ള ഓരോ ചുവടുവെപ്പിലും ജോർജെയുടെ പിന്തുണ നിർണായകമായിരുന്നെന്നും ക്ലബ് അനുസ്മരിച്ചു.
ബാഴ്സലോണയും ജോർജെ മെസിയുടെ വിയോഗത്തിൽ അനുശോചിച്ചു. ലയണൽ മെസിയുടെ ഫുട്ബോൾ കരിയറിന്റെ തുടക്കത്തിലും ബാഴ്സലോണയിലെ സുവർണകാലത്തും ക്ലബിൽ വിശ്വാസമർപ്പിച്ചതിന് ജോർജെയോട് നന്ദിയുണ്ടെന്ന് ക്ലബ് അറിയിച്ചു.
അർജന്റീന ഫുട്ബോൾ അസോസിയേഷനും ജോർജെയുടെ വിയോഗത്തിൽ ദുഃഖം രേഖപ്പെടുത്തി. ഞങ്ങളുടെ ക്യാപ്റ്റനും ഇതിഹാസ താരവുമായ ലയണൽ മെസിയുടെ പിതാവിന്റെ വിയോഗത്തിൽ അഗാധമായ ദുഃഖം രേഖപ്പെടുത്തുന്നു. ഈ ദുഃഖകരമായ സമയത്ത് കുടുംബത്തോടൊപ്പം ഞങ്ങൾ ഹൃദയപൂർവം നിലകൊള്ളുന്നു,” അസോസിയേഷൻ വ്യക്തമാക്കി.