വാഷിംഗ്ടണ് – ഇറാൻ യുദ്ധം ആഗോളതലത്തിൽ കടുത്ത വൈദ്യുതി പ്രതിസന്ധിക്ക് കാരണമാകുമെന്ന് ഖത്തർ ധനമന്ത്രി അലി ബിൻ അഹമ്മദ് അൽകുവാരി മുന്നറിയിപ്പ് നൽകി. വാഷിംഗ്ടണിൽ നടന്ന അന്താരാഷ്ട്ര നാണയ നിധിയുടെ (IMF) വസന്തകാല യോഗത്തിലാണ് അദ്ദേഹം ഈ ആശങ്ക പങ്കുവെച്ചത്. ഏതാനും മാസങ്ങൾക്കുള്ളിൽ ലോകം നേരിടാൻ പോകുന്ന ഊർജ്ജ പ്രതിസന്ധി ചില രാജ്യങ്ങളെ പൂർണ്ണമായി ഇരുട്ടിലാക്കാൻ സാധ്യതയുണ്ടെന്നും അദ്ദേഹം പറഞ്ഞു. ഇപ്പോൾ അനുഭവപ്പെടുന്ന ഇന്ധന വിലക്കയറ്റം വരാനിരിക്കുന്ന വലിയ വിപത്തുകളുടെ തുടക്കം മാത്രമാണെന്നും യഥാർത്ഥ പ്രത്യാഘാതങ്ങൾ ഇനിയും പ്രകടമാകാനിരിക്കുന്നതേയുള്ളൂ എന്നും അദ്ദേഹം കൂട്ടിച്ചേർത്തു.
ലോകത്തിലെ ഏറ്റവും പ്രധാനപ്പെട്ട ഊർജ്ജ പാതയായ ഹുർമുസ് കടലിടുക്കിലെ ഗതാഗത തടസ്സമാണ് പ്രധാന വെല്ലുവിളിയായി ഉയർത്തിക്കാട്ടുന്നത്. ഈ പാത അടച്ചിടുന്നത് എണ്ണയുടെയും വാതകത്തിന്റെയും വിതരണത്തെ മാത്രമല്ല, വളം, ഹീലിയം തുടങ്ങിയ തന്ത്രപ്രധാന ഉൽപ്പന്നങ്ങളുടെ ലഭ്യതയെയും ബാധിക്കും. ഇത് കൃഷി മുതൽ സൂക്ഷ്മ വ്യവസായങ്ങൾ വരെ നീളുന്ന ആഗോള വിപണികളെ തകിടം മറിക്കും. ഹുർമുസ് കടലിടുക്ക് വീണ്ടും തുറക്കാൻ വൈകുന്നത് വിപണിയിൽ വലിയ സമ്മർദ്ദമുണ്ടാക്കുകയും വിലകൾ ആർക്കും നിയന്ത്രിക്കാനാവാത്ത വിധം ഉയരുകയും ചെയ്യും.
കഴിഞ്ഞ മാർച്ചിൽ ഖത്തറിലെ റാസ് ലഫാൻ ദ്രവീകൃത പ്രകൃതിവാതക പ്ലാന്റിന് നേരെയുണ്ടായ ആക്രമണം വലിയ ആശങ്കയാണ് ഉണ്ടാക്കിയിരിക്കുന്നത്. ഈ പ്ലാന്റിലെ ഉൽപ്പാദന ശേഷി പൂർണ്ണമായും വീണ്ടെടുക്കാൻ ഏകദേശം അഞ്ച് വർഷം വരെ എടുത്തേക്കാം. കൂടാതെ, ആഗോളതലത്തിൽ ഹീലിയം വിതരണത്തിന്റെ 30 ശതമാനവും ഖത്തറിൽ നിന്നാണ് എത്തുന്നത്. യുദ്ധം കാരണം ഹീലിയം കയറ്റുമതി തടസ്സപ്പെടുന്നത് സെമികണ്ടക്ടർ നിർമ്മാണം ഉൾപ്പെടെയുള്ള സെൻസിറ്റീവ് വ്യവസായങ്ങളെ സാരമായി ബാധിക്കുമെന്നും അദ്ദേഹം മുന്നറിയിപ്പ് നൽകി. ഇത്തരത്തിൽ ഊർജ്ജ മേഖലയിലുണ്ടാകുന്ന ഓരോ തടസ്സവും ആഗോള സമ്പദ്വ്യവസ്ഥയെ വലിയ തകർച്ചയിലേക്ക് നയിച്ചേക്കാം.