തൃശൂർ– തൃശൂർ വാടാനപ്പള്ളിയിൽ ബിജെപി പ്രവർത്തകർ കിറ്റ് വിതരണം ചെയ്യാൻ ശ്രമിച്ചത് എൽഡിഎഫ്-യുഡിഎഫ് പ്രവർത്തകർ തടഞ്ഞു. വാടാനപ്പള്ളിക്ക് സമീപമുള്ള ആത്മാവ് ജംഗ്ഷനിലെ ഒരു സൂപ്പർമാർക്കറ്റിന് മുന്നിലായിരുന്നു സംഘർഷാവസ്ഥയുണ്ടായ ഈ സംഭവം. യുവമോർച്ച നേതാവിന്റെ നേതൃത്വത്തിൽ രണ്ടായിരത്തോളം കിറ്റുകൾ വിതരണത്തിനായി എത്തിച്ചുവെന്നാണ് എൽഡിഎഫ് ആരോപിക്കുന്നത്. ബിജെപി കിറ്റ് രാഷ്ട്രീയം കളിക്കുകയാണെന്നും കഴിഞ്ഞ ദിവസം മാത്രം ആയിരത്തഞ്ഞൂറോളം കിറ്റുകൾ ഇത്തരത്തിൽ വിതരണം ചെയ്തതായും ഇരുമുന്നണികളിലെയും പ്രവർത്തകർ മാധ്യമങ്ങളോട് പറഞ്ഞു.
തിരഞ്ഞെടുപ്പിന് മുന്നോടിയായി ബിജെപി പണം നൽകി ജനാധിപത്യത്തെ വിലയ്ക്കുവാങ്ങാൻ ശ്രമിക്കുകയാണെന്ന് യുഡിഎഫ് സ്ഥാനാർത്ഥി ടി.എൻ. പ്രതാപൻ കുറ്റപ്പെടുത്തി. ഇതിനെതിരെ ശക്തമായ പ്രതിഷേധം സംഘടിപ്പിക്കുമെന്ന് എൽഡിഎഫ് സ്ഥാനാർത്ഥി പ്രൊഫസർ സി. രവീന്ദ്രനാഥും വ്യക്തമാക്കി. നാട്ടുകാർ നൽകിയ വിവരത്തിന്റെ അടിസ്ഥാനത്തിലാണ് തങ്ങൾ സ്ഥലത്തെത്തിയതെന്ന് പ്രതിഷേധക്കാർ പറഞ്ഞു.
നേരത്തെ തൃശൂർ ഒളരിയിലെ ഒരു സൂപ്പർമാർക്കറ്റിലും സമാനമായ രീതിയിൽ ബിജെപി പ്രവർത്തകർ കിറ്റ് വിതരണം നടത്തിയിരുന്നു. ആ സംഭവത്തിൽ പോലീസ് കേസെടുക്കുകയും ആ കട സീൽ ചെയ്യുകയും ചെയ്തിരുന്നു. അതിന്റെ തുടർച്ചയായാണ് ഇപ്പോൾ വാടാനപ്പള്ളിയിലും കിറ്റ് വിതരണത്തെച്ചൊല്ലി രാഷ്ട്രീയ പാർട്ടികൾ തമ്മിൽ വലിയ തർക്കവും പ്രതിഷേധവും ഉണ്ടായത്. നിലവിൽ പ്രദേശത്ത് സംഘർഷ സാധ്യത കണക്കിലെടുത്ത് കനത്ത ജാഗ്രത തുടരുകയാണ്.