ദമാസ്‌കസ് – തെക്കന്‍ സിറിയന്‍ ഗ്രാമമായ ബെയ്ത്ത് ജിനില്‍ ഇസ്രായില്‍ സൈന്യം നടത്തിയ ആക്രമണത്തില്‍ 13 പേര്‍ കൊല്ലപ്പെടുകയും 24 പേര്‍ക്ക് പരിക്കേല്‍ക്കുകയും ചെയ്തു. സിറിയന്‍ ആക്രമണത്തെ സിറിയന്‍ വിദേശ മന്ത്രാലയം യുദ്ധക്കുറ്റമെന്ന് വിശേഷിപ്പിച്ച് അപലപിച്ചു. പുലര്‍ച്ചെ മൂന്ന് മണിക്ക് വെടിവെപ്പ് കേട്ട് തങ്ങള്‍ ഉണരുകയായിരുന്നെന്ന് പരിക്കേറ്റ ഗ്രാമവാസിയായ ഇയാദ് താഹിര്‍ സിറിയന്‍ തലസ്ഥാനത്തെ അല്‍മുവാസാത്ത് ആശുപത്രിയില്‍ എ.എഫ്.പിയോട് പറഞ്ഞു. എന്താണ് സംഭവിക്കുന്നതെന്ന് കാണാന്‍ ഞങ്ങള്‍ വീട്ടില്‍ നിന്ന് പുറത്തിറങ്ങി. ഗ്രാമത്തില്‍ ഇസ്രായില്‍ സൈനികരെയും ടാങ്കുകളും കണ്ടു. പിന്നീട് അവര്‍ പിന്‍വാങ്ങി. വ്യോമസേന വന്നു, ഷെല്ലുകള്‍ പതിക്കാന്‍ തുടങ്ങി. എന്റെ കഴുത്തില്‍ കഷ്ണങ്ങള്‍ പതിച്ചു – ഇയാദ് താഹിര്‍ പറഞ്ഞു.
മൂന്ന് പേരെ പിടികൂടാന്‍ ഇസ്രായില്‍ സൈന്യം ഗ്രാമം റെയ്ഡ് ചെയ്തതായി പ്രാദേശിക ഉദ്യോഗസ്ഥന്‍ എ.എഫ്.പിയോട് പറഞ്ഞു. ഇത് ഏറ്റുമുട്ടലിന് കാരണമായി. ഏറ്റുമുട്ടലുകളെ തുടര്‍ന്ന് ഇസ്രായില്‍ സേന പീരങ്കികളും ഡ്രോണുകളും ഉപയോഗിച്ച് പ്രദേശത്തേക്ക് ഷെല്ലാക്രമണം നടത്തിയതായി ഗ്രാമ ഉദ്യോഗസ്ഥന്‍ അബ്ദുറഹ്മാന്‍ അല്‍ഹംറാവി പറഞ്ഞു.
സ്വയം പ്രതിരോധിക്കാനും അവര്‍ ഞങ്ങളെ പിടികൂടുന്നത് തടയാനുമാണ് ഇസ്രായില്‍ സേനക്ക് നേരെ വെടിയുതിര്‍ത്തത്. “എന്റെ സഹോദരന്‍ കൊല്ലപ്പെട്ടു. എനിക്ക് പരിക്കേറ്റു” ആശുപത്രിയില്‍ വെച്ച് അഹ്മദ് കമാല്‍ എ.എഫ്.പിയോട് പറഞ്ഞു. അയല്‍ രാജ്യമായ ലെബനോന്‍ ആസ്ഥാനമായി പ്രവര്‍ത്തിക്കുന്ന, ഫലസ്തീന്‍ സായുധ ഗ്രൂപ്പായ ഹമാസുമായി സഖ്യത്തിലുള്ള ജമാഅ ഇസ്‌ലാമിയ ഗ്രൂപ്പിലെ അംഗങ്ങളെ ഓപ്പറേഷനില്‍ അറസ്റ്റ് ചെയ്തതായി ഇസ്രായില്‍ സൈന്യം അവകാശപ്പെട്ടു.
റെയ്ഡ് നടത്തിയ സൈന്യത്തിനു നേരെ വെടിവെപ്പുണ്ടായി. തുടര്‍ന്ന് വ്യോമ പിന്തുണയോടെ സൈന്യം വെടിയുതിര്‍ത്തു. ഏറ്റുമുട്ടലില്‍ ആറ് സൈനികര്‍ക്ക് പരിക്കേറ്റതായും ഇസ്രായില്‍ സൈന്യം പറഞ്ഞു. ലക്ഷ്യമിട്ട എല്ലാ സംശയിക്കപ്പെടുന്നവരെയും കസ്റ്റഡിയിലെടുത്തതായും ഏതാനും തീവ്രവാദികള്‍ കൊല്ലപ്പെട്ടതായും സൈന്യം അവകാശപ്പെട്ടു. കൂടാതെ പ്രദേശത്ത് ഇപ്പോഴും സൈനികരെ വിന്യസിച്ചിട്ടുണ്ടെന്നും ഇസ്രായില്‍ പ്രതിരോധ സേന കൂട്ടിച്ചേര്‍ത്തു.
2025 ല്‍ സിറിയയിലുടനീളം ഇസ്രായില്‍ നിരന്തരം ആക്രമണം നടത്തി. ദമാസ്‌കസിന്റെ പ്രാന്തപ്രദേശങ്ങളിലും രാജ്യത്തിന്റെ തെക്കന്‍ പ്രദേശങ്ങളിലുമുള്ള ലക്ഷ്യങ്ങള്‍ ആക്രമിച്ചു. ഇസ്രായിലിനെതിരായ ഭീഷണികള്‍ തകര്‍ക്കാനും അതിര്‍ത്തിക്കടുത്തുള്ള ഡ്രൂസ് സമൂഹത്തെ സംരക്ഷിക്കാനുമുള്ള ശ്രമങ്ങളുടെ ഭാഗമായാണിതെന്ന് അവര്‍ പറയുന്നു. ഇസ്രായിലുമായി ശത്രുതയുള്ളതായി കരുതുന്ന സായുധ ഗ്രൂപ്പുകള്‍ക്കെതിരെയാണ് നടപടിയെടുക്കുന്നതെന്ന് ഇസ്രായില്‍ പറയുന്നു. എന്നാല്‍ ആക്രമണങ്ങളില്‍ സൈനികര്‍ കൊല്ലപ്പെട്ടതായി സിറിയന്‍ അധികൃതര്‍ പറഞ്ഞു.
2024 ഡിസംബറില്‍ ബശാര്‍ അസദിന്റെ പതനത്തിനും ദമാസ്‌കസില്‍ പുതിയ ഇസ്‌ലാമിക നേതൃത്വം അധികാരത്തില്‍ വന്നതിനും ശേഷം, ഇസ്രായില്‍ സിറിയയില്‍ നൂറുകണക്കിന് ആക്രമണങ്ങള്‍ നടത്തിയിട്ടുണ്ട്. 1974 മുതല്‍ ഗോലാന്‍ കുന്നുകളിലെ ഇസ്രായിലി, സിറിയന്‍ സൈന്യങ്ങളെ വേര്‍തിരിക്കുന്ന ഐക്യരാഷ്ട്രസഭയുടെ പട്രോളിംഗ് ബഫര്‍ സോണിലേക്ക് ഇസ്രായില്‍ സൈന്യത്തെ അയച്ചു. 1967 മുതല്‍ ഇസ്രായില്‍ സിറിയയുടെ ഗോലാന്‍ കുന്നുകള്‍ കൈവശപ്പെടുത്തി. 1981 ല്‍ അന്താരാഷ്ട്ര സമൂഹം അംഗീകരിക്കാത്ത നീക്കത്തിലൂടെ അതിനെ ഇസ്രായിലില്‍ കൂട്ടിച്ചേര്‍ത്തു.
സിറിയയുടെ പരമാധികാരം, സ്വാതന്ത്ര്യം, പ്രദേശിക സമഗ്രത, ദേശീയ ഐക്യം എന്നിവക്കുള്ള ശക്തമായ പിന്തുണ നവംബര്‍ 6 ന് പാസാക്കിയ പ്രമേയത്തില്‍ യു.എന്‍ രക്ഷാ സമിതി ആവര്‍ത്തിച്ച് വ്യക്തമാക്കി. കഴിഞ്ഞ വേനല്‍ക്കാലത്ത്, ഫ്രാന്‍സിന്റെയും അമേരിക്കയുടെയും സഹായത്തോടെ ഇസ്രായില്‍, സിറിയന്‍ ഉദ്യോഗസ്ഥര്‍ തമ്മില്‍ ഉന്നതതല ആശയവിനിമയങ്ങള്‍ നടന്നു. ഇസ്രായിലിന്റെ ആക്രമണത്തെ സിറിയക്കായുള്ള ഐക്യരാഷ്ട്രസഭയുടെ ഡെപ്യൂട്ടി പ്രതിനിധി നജാത്ത് റോച്ച്ഡി അപലപിക്കുകയും സിറിയയുടെ പരമാധികാരത്തിന്റെയും പ്രദേശിക സമഗ്രതയുടെയും ഗുരുതരമായതും അസ്വീകാര്യവുമായ ലംഘനമാണ് ആക്രമണമെന്ന് വിശേഷിപ്പിക്കുകയും ചെയ്തു.