ജിസാന്‍– ഇന്ന് അവധിക്ക് നാട്ടില്‍ പോകാനിരിക്കെ മലയാളി സൗദി റോഡപകടത്തില്‍ മരിച്ചു. സൗദി, ജിസാനില്‍ ജോലി നോക്കുന്ന മഞ്ചേരി, പാണായി മുള്ളമ്പാറ സ്വദേശി അബ്ബ മന്‍സിലില്‍ റിയാസ്ബാബു കോര്‍മത്താണ് (47) വാഹനമിടിച്ച് മരിച്ചത്. മുഹമ്മദ് കോര്‍മത്തിന്റെയും സുഹ്റയുടെയും മകനാണ്. സാഹിനയാണ് ഭാര്യ. മക്കളായ ഹാനിയ, ഹനാന്‍, ഹന എന്നിവര്‍ നാട്ടില്‍ വിദ്യാര്‍ത്ഥികളാണ്.
ജിസാന്‍ നഗരത്തില്‍ നിന്ന് 35 കിലോമീറ്റര്‍ അകലെ അബൂഅരീഷിന് സമീപമുള്ള അല്‍വാസലിയില്‍ താമസസ്ഥലത്തിനടുത്ത് വെച്ച് ഇന്നലെ രാത്രി പതിനൊന്നരയോടെയായിരുന്നു അപകടം. റോഡിലൂടെ താമസ്ഥലത്തേക്ക് നടന്നു പോകുകയായിരുന്ന റിയാസിനെ പിന്നില്‍ നിന്നു വന്ന കാര്‍ ഇടിക്കുകയായിരുന്നുവെന്ന് സുഹൃത്തുക്കള്‍ അറിയിച്ചു. അപകടത്തില്‍ തലയ്ക്കും ശരീരത്തിനും ഗുരുതരമായി പരിക്കേറ്റ റിയാസിലെ സംഭവസ്ഥലത്തെത്തിയ പോലീസ് ഉടന്‍ തന്നെ അബൂഅരീഷ് കിംഗ്ഫഹദ് സ്‌പെഷ്യലിറ്റി ആശുപത്രിയിലെ തീവ്രപരിചരണ വിഭാഗത്തില്‍ എത്തിച്ചെങ്കിലും പുലര്‍ച്ചെ മൂന്നു മണിയോടെ അന്ത്യം സംഭവിച്ചു.
കഴിഞ്ഞ 18 വര്‍ഷമായി ജിസാനിലുള്ള റിയാസ് അല്‍വാസലിയില്‍ സൂപ്പര്‍മാര്‍ക്കറ്റ് ജീവനക്കാരനായിരുന്നു. എട്ടു മാസം മുമ്പാണ് അവസാനമായി നാട്ടില്‍ പോയിവന്നത്. ജിസാന്‍ എയര്‍പോര്‍ട്ടില്‍ നിന്ന് എയര്‍അറേബ്യ വിമാനത്തില്‍ വെള്ളിയാഴ്ച്ച വൈകുന്നേരം അഞ്ചു മണിക്ക് ഷാര്‍ജ വഴി കോഴിക്കോട്ടേക്ക് പോകാനിരുന്നതാണ്. കടയില്‍ നിന്ന് രണ്ടുദിവസം മുമ്പ് ജോലി അവസാനിപ്പിച്ച് നാട്ടില്‍ പോകുന്നതിനുള്ള തയ്യാറെടുപ്പുകള്‍ നടത്തിയിരുന്നു. അപകട വിവരമറിഞ്ഞ് ജിസാന്‍ ആര്‍ട്ട് ലവേഴ്സ് അസോസിയേഷന്‍ (ജല) കേന്ദ്ര കമ്മിറ്റി ഭാരവാഹികളായ സലാം കൂട്ടായി, സണ്ണി ഓതറ, സലിം മൈസൂര്‍ യൂണിറ്റ് ഭാരവാഹികളായ വിപിന്‍, അഷറഫ് പാണ്ടിക്കാട്, ബാബു മഞ്ചേരി എന്നിവര്‍ സഹായങ്ങളുമായി ആശുപത്രിയില്‍ എത്തിയിരുന്നു.
അബൂഅരീഷ് കിംഗ്ഫഹദ് ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം ജിസാനില്‍ ഖബറടക്കുന്നതിനുള്ള നിയമനടപടികളുമായി ‘ജല’ പ്രവര്‍ത്തകര്‍ രംഗത്തുണ്ട്. നിയമനടപടികള്‍ക്കായി നാട്ടില്‍ നിന്ന് ബന്ധുക്കള്‍ സഹപ്രവര്‍ത്തകനായ സമീര്‍ കൊടുവള്ളിയുടെ പേരില്‍ മുക്ത്യാര്‍ പത്രം അയച്ചിട്ടുണ്ട്. ‘ജല’യുടെ യൂണിറ്റ് പ്രവര്‍ത്തകനായിരുന്ന റിയാസ് സാമൂഹിക പ്രവര്‍ത്തങ്ങളില്‍ സജീവമായിരുന്നുവെന്ന് സംഘടനാ ഭാരവാഹികള്‍ വ്യക്തമാക്കി.