ജിദ്ദ- ആഗോള തലത്തിൽ മുൻനിരയിലുള്ള ചൈനീസ് സ്റ്റേഷനറി ബ്രാൻഡായ ഡെലി സൗദി അറേബ്യയിൽ പ്രവർത്തനം വിപുലീകരിക്കുന്നു. സൗദിയിലെ പ്രമുഖ സ്റ്റേഷനറി വിതരണ കമ്പനിയായ മോഡേൺ അറേബ്യയുമായി കൈകോർത്താണ് സാന്നിധ്യം ശക്തിപ്പെടുത്തുന്നത്. സൗദിയിലുടനീളം ഡെലി ഷോറൂമുകളും വിതരണ ശൃംഖലയും സ്ഥാപിക്കാൻ കരാറിലെത്തിയതായി ഇരു കമ്പനികളുടേയും പ്രതിനിധികൾ അറിയിച്ചു. ഡെലിയുടെ പതിനായിരത്തിലധികം ഉൽപ്പന്നങ്ങളാണ് ഇതുവഴി സൗദി വിപണിയിൽ ലഭ്യമാക്കുക.
ഈ സംയുക്ത സംരംഭത്തിന്റെയും നൂതന ഉൽപ്പന്നങ്ങളുടെയും ഔദ്യോഗിക പ്രഖ്യാപനവും ഉൽപ്പന്നങ്ങളുടെ വിപുലമായ പ്രദർശനവും തിങ്കളാഴ്ച (ജൂലൈ 6) ജിദ്ദയിലെ മദീനാ റോഡിലുള്ള മാരിയറ്റ് ഹോട്ടലിൽ നടക്കും. രാവിലെ ഒമ്പതിന് എക്സിബിഷൻ ആരംഭിക്കും. സൗദിയിലുടനീളം ഡെലിയുടെ സ്വന്തം ഷോറൂമുകൾ ആരംഭിക്കുന്നതിനൊപ്പം ശക്തമായ ഹോൾസെയിൽ, റീറ്റെയ്ൽ വിതരണ ശൃംഖലയും കമ്പനി വികസിപ്പിക്കും.
1981-ൽ സ്ഥാപിതമായ ഡെലി ഗ്രൂപ്പ്, ഉൽപ്പാദനശേഷിയിൽ നിലവിൽ ലോകത്തിലെ തന്നെ ഏറ്റവും വലിയ സ്റ്റേഷനറി നിർമ്മാതാക്കളാണ്. 150ലധികം രാജ്യങ്ങളിൽ സാന്നിധ്യമുള്ള ഡെലിക്ക് വിവിധ ഏഷ്യൻ രാജ്യങ്ങളിൽ അത്യാധുനിക ഫാക്ടറികളുണ്ട്. ഓഫിസ്, സ്കൂൾ സ്റ്റേഷനറി ഉൽപ്പന്നങ്ങളാണ് ഡെലി പ്രധാനമായും വിപണിയിലെത്തിക്കുന്നത്. സ്കൂൾ വിദ്യാർത്ഥികൾ, പ്രൊഫഷനലുകൾ, ആർട്ടിസ്റ്റുകൾ എന്നിവർക്കായി 24 വിഭാഗങ്ങളിലായി ഇരുപതിനായിരത്തിലധികം വൈവിധ്യമാർന്ന ഉൽപ്പന്നങ്ങളുണ്ട്. പേനകൾ, ഡെസ്ക്ടോപ്പ് ഓഫീസ് സപ്ലൈസ്, കാൽക്കുലേറ്ററുകൾ, വൈറ്റ് ബോർഡുകൾ, ഓഫീസ് അപ്ലയൻസസ് എന്നിവയ്ക്ക് പുറമെ പ്രീമിയം ആർട്ട് ലൈനുകളും കായിക പ്രേമികൾക്കായുള്ള ‘അഗ്നൈറ്റ്’ സ്പോർട്സ് ബ്രാൻഡും ഇതിൽ ഉൾപ്പെടുന്നു.
സൗദി അറേബ്യയുടെ ‘വിഷൻ 2030’ പദ്ധതികളുടെ ഭാഗമായി രാജ്യത്തെ വർദ്ധിച്ചുവരുന്ന ബിസിനസ്സ്, വിദ്യാഭ്യാസ ആവശ്യങ്ങൾക്കായി മികച്ചതും ചെലവ് കുറഞ്ഞതുമായ ഓഫീസ്, സ്കൂൾ ഉൽപ്പന്നങ്ങൾ ലഭ്യമാക്കാൻ ഈ പങ്കാളിത്തത്തിലൂടെ സാധിക്കുമെന്ന് കമ്പനി വക്താക്കൾ അറിയിച്ചു. പ്രാദേശിക വിപണിയിലെ മോഡേൺ അറേബ്യയുടെ അനുഭവസമ്പത്തും, ഡെലിയുടെ ആഗോള ഉൽപ്പാദന ക്ഷമതയും ഒത്തുചേരുമ്പോൾ സൗദിയിലെ സ്റ്റേഷനറി വിപണിയിൽ ഇതൊരു പുതിയ മുന്നേറ്റമായിരിക്കുമെന്ന് ഡെലി മിഡിൽ ഈസ്റ്റ് മാനേജർ അബ്ദുൽ ഷാക്കിർ പറഞ്ഞു. വാർത്ത സമ്മേളനത്തിൽ മോഡേൺ അറേബ്യ പ്രതിനിധി ഉസാം അൽ ഗാംദി,ഡെലി, ഡെലി പ്രതിനിധി കാർട്ടർ എന്നിവരും പങ്കെടുത്തു.