വാണിമേൽ(നാദാപുരം)- വീട്ടുമുറ്റത്ത് കുഞ്ഞിന് ഭക്ഷണം നൽകുന്നതിനിടെ തെങ്ങ് മുറിഞ്ഞ് ദേഹത്ത് വീണ് മരിച്ചത് ഖത്തർ പ്രവാസിയുടെ ഭാര്യ. പീടികയുള്ള പറമ്പത്ത് ജമാലിന്റെ മകൻ ജംഷിദിന്റെ ഭാര്യ ഫഹീമ (28) ആണ് മരിച്ചത്. നാദാപുരം വാണിമേൽ ചാമപ്പാലത്തിനടുത്ത് ഇന്ന് വൈകുന്നേരം അഞ്ചുമണിയോടെയാണ് അപകടം സംഭവിച്ചത്.
ഒന്നര വയസുള്ള കുട്ടിക്ക് ഭക്ഷണം വാരി കൊടുക്കുന്നതിനിടെ വീട്ടുപറമ്പിലെ ഇടിവെട്ടിയ തെങ്ങ് മുറിഞ്ഞ് മരത്തിൽ തട്ടിതെറിച്ച് യുവതിയുടെ ദേഹത്ത് പതിക്കുകയായിരുന്നു. അപകടം നടന്ന ഉടൻ പട്രോളിംഗ് നടത്തുകയായിരുന്ന പോലീസ് വാഹനത്തിൽ കല്ലാച്ചിയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഖത്തറിലുള്ള ഭർത്താവ് ജംഷിദ് വിവരമറിഞ്ഞ് നാട്ടിലേക്ക് തിരിച്ചിട്ടുണ്ട്. മുള്ളമ്പത്ത് സ്വദേശി നടുത്തറ പര്യയുടെ മകളാണ് ഫഹീമ. രണ്ട് കുട്ടികൾ ഉണ്ട്‌. മയ്യിത്ത് നിസ്ക്കാരം നാളെ കാലത്തെ 07 മണിക്ക് ഭൂമിവാതുക്കൽ താഴെ ജുമാ മസ്ജിദിൽ നടക്കും. മണ്ടോക്കണ്ടി പള്ളി ഖബർസ്ഥാനിൽ മറവ് ചെയ്യും