റിയാദ്: സൗദി അറേബ്യയിലെ മലയാളി സമൂഹത്തിന് വേണ്ടി 2013 മുതൽ റിയാദ് ഇസ്‌ലാഹി സെന്റേഴ്‌സ് കോഡിനേഷൻ കമ്മിറ്റി (ആർ.ഐ.സി.സി) യുടെ ആഭിമുഖ്യത്തിൽ സംഘടിപ്പിക്കുന്ന ക്വുർആൻ ഹദീസ് ലേർണിംഗ് കോഴ്‌സ് (ക്വു.എച്ച്.എൽ.സി) പതിനൊന്നാം ഘട്ട ഫൈനൽ പരീക്ഷക്ക് തുടക്കമായി. രാവിലെ 6 മുതൽ രാത്രി 10 മണി വരെ ഓൺലൈൻ ആയി പരീക്ഷ എഴുതാൻ സാധിക്കും. കുട്ടികൾക്കും മുതിർന്നവർക്കും പ്രത്യേകം പരീക്ഷയാണ് നടക്കുക.
പ്രമുഖ ഇസ്‌ലാമിക പണ്ഡിതൻ മുഹമ്മദ് അമാനി മൗലവി രചിച്ച വിശുദ്ധ ക്വുർആൻ വിവരണത്തിലെ അൻകബൂത്ത്, റൂം, ലുക് മാൻ, സജദ എന്നീ അധ്യായങ്ങളും സ്വഹീഹുൽ ബുഖാരിയിലെ ‘കച്ചവടം’ എന്ന അധ്യായവുമാണ് പതിനൊന്നാം ഘട്ട പദ്ധതിയുടെ സിലബസ്.
സൗദി അറേബ്യയിലെ വിവിധ പ്രദേശങ്ങളിൽ ഇസ്‌ലാഹി സെന്ററുകളുടെ നേതൃത്വത്തിൽ കഴിഞ്ഞ ഒരു വർഷമായി ക്വു.എച്ച്.എൽ.സി പഠന സംരംഭം നടന്നു വരുന്നു. ഫൈനൽ പരീക്ഷയിൽ സൗദി അറേബ്യയിലെ വിവിധ പ്രദേശങ്ങളിൽ നിന്നും കേരളത്തിൽ നിന്നുമായി നൂറുകണക്കിന് പഠിതാക്കൾ പരീക്ഷ എഴുതും.
പദ്ധതിയുടെ ഭാഗമായി പ്രതിവാര പഠന ക്ലാസുകൾ, ഓൺലൈൻ വായനക്കൂട്ടം, പ്രതിമാസ പരീക്ഷകൾ, ഓപ്പൺ ബുക്ക് പരീക്ഷ , റമദാൻ ക്വിസ്സ്, ക്വുർആൻ ക്വിസ്സ്, അവാർഡ് ദാന സംഗമങ്ങൾ, പ്രതിനിധി സംഗമം, ഫാക്വൽറ്റി മീറ്റ് തുടങ്ങി വിവിധ പ്രവർത്തനങ്ങൾ സംഘടിപ്പിച്ചു.
ഫൈനൽ പരീക്ഷയുടെ ഒരുക്കങ്ങൾ പൂർത്തിയായതായി ക്വു.എച്ച്.എൽ.സി ഡയറക്ടർ സുഫ് യാൻ അബ്ദുസ്സലാം, ദേശീയ ഇസ്‌ലാഹി കോഡിനേഷൻ ജനറൽ സെക്രട്ടറി ഉമർ ശരീഫ്, മുനീർ പപ്പാട്ട്, ക്വു.എച്ച്.എൽ.സി ചെയർമാൻ നബീൽ പയ്യോളി, കൺവീനർ ഷാനിബ് അൽ ഹികമി തുടങ്ങിയവർ അറിയിച്ചു. പരീക്ഷയുമായി ബന്ധപ്പെട്ട അന്വേഷണങ്ങൾക്ക് 0501008905, 0533955686 എന്നീ നമ്പറുകളിൽ ബന്ധപ്പെടാവുന്നതാണ്.