റിയാദ് – അമേരിക്കന്‍ പ്രസിഡന്റ് തെരഞ്ഞെടുപ്പില്‍ ചരിത്ര വിജയം നേടിയ ഡോണൾഡ് ട്രംപിനെ തിരുഗേഹങ്ങളുടെ സേവകന്‍ സല്‍മാന്‍ രാജാവ് അനുമോദിച്ചു. ട്രംപിനെ തന്റെ ആത്മാര്‍ഥമായ അഭിനന്ദനങ്ങള്‍ അറിയിച്ച് കമ്പി സന്ദേശം അയച്ച സല്‍മാന്‍ രാജാവ് ഏറ്റവും ഭംഗിയായി കൃത്യനിര്‍വഹണം നടത്താന്‍ പ്രസിഡന്റിന് സാധിക്കട്ടെയെന്നും അമേരിക്കന്‍ ജനതക്ക് കൂടുതല്‍ പുരോഗതിയും അഭിവൃദ്ധിയും കൈവരിക്കാന്‍ കഴിയട്ടെയെന്നും ആശംസിച്ചു.
സൗദി അറേബ്യയും അമേരിക്കയും തമ്മിലും ഇരു രാജ്യങ്ങളിലെയും ജനങ്ങളും തമ്മിലുമുള്ള ചരിത്രപരവും ശക്തവുമായ ബന്ധങ്ങളെ രാജാവ് പ്രശംസിച്ചു. സര്‍വമേഖലകളിലും ഉഭയകക്ഷി സഹകരണം കൂടുതല്‍ ശക്തമാക്കാനാണ് എല്ലാവരും ശ്രമിക്കുന്നതെന്നും സല്‍മാന്‍ രാജാവ് പറഞ്ഞു. ഡൊണാള്‍ഡ് ട്രംപിനെ അനുമോദിച്ച് കിരീടാവകാശിയും പ്രധാനമന്ത്രിയുമായ മുഹമ്മദ് ബിന്‍ സല്‍മാന്‍ രാജകുമാരനും കമ്പി സന്ദേശമയച്ചു.