ശരീരത്തിനും മനസ്സിനും വലിയ പ്രയാസങ്ങൾ സൃഷ്ടിക്കുന്ന ഒന്നാണ് പെൽവിക് ആരോഗ്യപ്രശ്നങ്ങളും വിട്ടുമാറാത്ത മൂത്രച്ചോർച്ചയും. എന്നാൽ കൃത്യമായ ചികിത്സയിലൂടെ ഇത് പൂർണ്ണമായും പരിഹരിക്കാൻ സാധിക്കും. സാധാരണ ചികിത്സകൾ ഫലിക്കാതെ വരുന്ന 80 ശതമാനത്തിലധികം രോഗികളിലും സാക്രൽ ന്യൂറോമോഡുലേഷൻ (SNM) എന്ന നൂതന ‘പെൽവിക് പേസ്മേക്കർ’ ചികിത്സയിലൂടെ മികച്ച ഫലം ലഭിക്കുകയും ആത്മവിശ്വാസം വീണ്ടെടുക്കാൻ സാധിക്കുകയും ചെയ്യുന്നുണ്ട്.
ഇന്ത്യയിലെ ആകെ ജനസംഖ്യയുടെ 18 ശതമാനത്തെയും, 30 വയസ്സിനു മുകളിലുള്ള മൂന്നിലൊന്ന് സ്ത്രീകളെയും അനിയന്ത്രിതമായി മൂത്രം പോകുന്ന അവസ്ഥ (യൂറിനറി ഇൻകോണ്ടിനൻസ്) ബാധിക്കുന്നുണ്ടെന്നാണ് കണക്കുകൾ. എന്നാൽ സാമൂഹികമായ മടി കാരണം ഇതിനെക്കുറിച്ചുള്ള പൊതുജന അവബോധം ഇന്നും വളരെ കുറവാണ്.

(കൺസൾട്ടന്റ് യൂറോളജിക്കൽ സർജൻ, അമൃത ആശുപത്രി, കൊച്ചി)
പലരും ഇത് വാർദ്ധക്യസഹജമായ ഒരു സാധാരണ കാര്യമായി കണ്ട് വെള്ളം കുടിക്കുന്നത് കുറച്ചും ഡയപ്പറുകളെ ആശ്രയിച്ചുമാണ് മുന്നോട്ട് പോകുന്നത്. ഇത് ഉറക്കം തടസ്സപ്പെടുന്നതിനും, സന്ധിവാതമുള്ളവരിൽ വീഴാനുള്ള സാധ്യത വർദ്ധിപ്പിക്കുന്നതിനും, കടുത്ത മാനസികമായ ഒറ്റപ്പെടലിനും കാരണമാകുന്നു.
രോഗമുക്തി നേടിയ 72-കാരിയുടെ അനുഭവം
വർഷങ്ങളോളം കടുത്ത ഓവർ ആക്റ്റീവ് ബ്ലാഡർ (അമിതമായി പ്രവർത്തിക്കുന്ന മൂത്രസഞ്ചി) പ്രശ്നങ്ങളാൽ ബുദ്ധിമുട്ടിയിരുന്ന 72 വയസ്സുള്ള ഒരു രോഗിയുടെ അനുഭവം ഈ ചികിത്സാരീതിയുടെ വിജയത്തിന് മികച്ച ഉദാഹരണമാണ്. പകൽ 16 തവണയും രാത്രിയിൽ ആറ് തവണയും മൂത്രമൊഴിക്കാനായി എഴുന്നേൽക്കേണ്ടി വന്നിരുന്ന ഇവർക്ക്, കാൽമുട്ടിലെ സന്ധിവാതം കാരണം ഓരോ തവണ ബാത്ത്റൂമിൽ പോകുന്നതും അങ്ങേയറ്റം വേദനാജനകമായിരുന്നു.
15 വർഷമായി പ്രമേഹമുള്ള ഇവർക്ക് മുൻപ് ശസ്ത്രക്രിയയും, സാധാരണ മരുന്നുകളും, മൂത്രസഞ്ചിയിലേക്കുള്ള ബോട്ടോക്സ് കുത്തിവയ്പ്പും നൽകിയിരുന്നെങ്കിലും ആശ്വാസം താൽക്കാലികമായിരുന്നു. തുടർന്ന് ഞങ്ങൾ നടത്തിയ ‘മൾട്ടിചാനൽ യൂറോഡൈനാമിക്സ്’ എന്ന പ്രത്യേക പരിശോധനയിലൂടെ, സാധാരണ മരുന്നുകളോട് പ്രതികരിക്കാത്ത ‘റിഫ്രാക്ടറി അർജൻസി യൂറിനറി ഇൻകോണ്ടിനൻസ്’ എന്ന അവസ്ഥയാണെന്ന് സ്ഥിരീകരിച്ചു. തുടർന്നാണ് നൂതന ചികിത്സയായ SNM നിർദ്ദേശിച്ചത്. ചികിത്സയ്ക്ക് ശേഷം ഇവരുടെ ജീവിതത്തിൽ വലിയ മാറ്റങ്ങളാണുണ്ടായത്.
എന്താണ് SNM (പെൽവിക് പേസ്മേക്കർ)?
തലച്ചോറും നട്ടെല്ലിന്റെ താഴെ ഭാഗത്തുള്ള സാക്രൽ ഞരമ്പുകളും തമ്മിലുള്ള സിഗ്നലുകളെ ആശ്രയിച്ചാണ് മൂത്രസഞ്ചിയുടെ നിയന്ത്രണം നടക്കുന്നത്. ഈ സിഗ്നലുകൾ തകരാറിലാകുമ്പോൾ മൂത്രസഞ്ചിയിൽ അനിയന്ത്രിതമായ സങ്കോചങ്ങൾ ഉണ്ടാകുന്നു. ഞരമ്പുകളുടെ ആശയവിനിമയം പുനഃക്രമീകരിക്കുന്നതിനായി നേരിയ വൈദ്യുത സ്പന്ദനങ്ങൾ ഉപയോഗിച്ച് പ്രവർത്തിക്കുന്ന ഒരു ‘പെൽവിക് പേസ്മേക്കർ’ ആണ് SNM.
ആദ്യഘട്ടത്തിൽ 2 മുതൽ 4 ആഴ്ച വരെ നേർത്ത ഒരു വയർ വഴി സാക്രൽ ഞരമ്പുകളെ അരയിൽ ധരിക്കുന്ന ഒരു സ്റ്റിമുലേറ്ററുമായി ബന്ധിപ്പിക്കുന്നു. ഈ സമയത്ത് രോഗലക്ഷണങ്ങളിൽ പുരോഗതി ഉണ്ടെന്ന് ഉറപ്പാക്കിയാൽ, ചെറിയൊരു സ്റ്റിമുലേറ്റർ ശരീരത്തിനുള്ളിൽ സ്ഥിരമായി ഘടിപ്പിക്കുന്നു.
ശരീരത്തിൽ വലിയ മുറിവുകളുണ്ടാക്കാത്തതും (Minimally Invasive) സുരക്ഷിതവുമായ ഈ ചികിത്സയിലൂടെ രാത്രികാലങ്ങളിൽ ബാത്ത്റൂമിൽ പോകുന്നത് കുറയ്ക്കാനും, സാധാരണ ജീവിതത്തിലേക്ക് മടങ്ങാനും സാധിക്കും. വിട്ടുമാറാത്ത മൂത്രച്ചോർച്ച മൂലം ബുദ്ധിമുട്ടുന്നവർ മടി കൂടാതെ ഒരു യൂറോളജിസ്റ്റിനെ സമീപിച്ച് കൃത്യമായ ചികിത്സ തേടുകയാണ് വേണ്ടത്.



