മലപ്പുറം: പി.വി അൻവർ എം.എൽ.എയുടെ ആരോപണത്തെ തുടർന്ന് സസ്‌പെൻഷനിലായ മലപ്പുറം മുൻ എസ്.പി സുജിത് ദാസിനെതിരെ ഗുരുതര ആരോപണവുമായി വീട്ടമ്മ. എസ്പിയും എസ്.എച്ച്.ഒ ആയിരുന്ന വിനോദും തന്നെ ബലാത്സംഗം ചെയ്‌തെന്നാണ് യുവതിയുടെ ആരോപണം. എന്നാൽ ആരോപണം നിഷേധിച്ച സുജിത് ദാസ് ഇതിന് പിന്നിൽ വലിയ ഗൂഢാലോചനയുണ്ടെന്നും വീട്ടമ്മയ്‌ക്കെതിരെ നിയമനടപടി സ്വീകരിക്കുമെന്നും അറിയിച്ചു. എസ്.പി സുജിത് ദാസും ഡിവൈ.എസ്.പി ബെന്നിയും എസ്.എച്ച്.ഒ വിനോദും പീഡിപ്പിച്ചുവെന്നാണ് യുവതിയുടെ പരാതി.
സുജിത് ദാസ് രണ്ടുതവണ ബലാത്സംഗം ചെയ്തു. മുഖ്യമന്ത്രി തന്റെ അങ്കിളാണെന്നും പരാതി പറയരുതെന്ന് ഭീഷണിപ്പെടുത്തിയതായും വീട്ടമ്മ പറഞ്ഞു. രണ്ടുവർഷം മുമ്പാണ് സംഭവം. പരാതിയുമായി രണ്ടു തവണ സുജിത് ദാസിനെ കണ്ടു. പിന്നീട് കുട്ടിയില്ലാതെ തനിച്ചു വരാൻ ആവശ്യപ്പെട്ടു. കോട്ടയ്ക്കയിലേക്ക് വരാനും പറഞ്ഞു. മറ്റൊരു നമ്പറിൽ നിന്നാണ് വിളിച്ചത്. എസ്.പി ഓഫീസിന് കുറച്ചകലെയായി മറ്റൊരു വീട്ടിലേക്ക് ഒരാൾ കൂട്ടിക്കൊണ്ടുപോവുകയും അവിടെ എസ്.പി ഉണ്ടായിരുന്നതായും വീട്ടമ്മ പറഞ്ഞു. അവിടെ വെച്ചാണ് പീഡിപ്പിച്ചത്. പിന്നീട് പലപ്പോഴായി വീഡിയോ കോൾ വിളിക്കുമായിരുന്നു. രണ്ടാഴ്ച്ച കഴിഞ്ഞ് വീണ്ടും വിളിച്ചു. കസ്റ്റംസിലുള്ള സുഹൃത്ത് വന്നെന്ന് പറഞ്ഞാണ് വിളിച്ചത്. അവിടെ പോയപ്പോൾ ഇരുവരും മദ്യപിക്കുകയായിരുന്നു. തനിക്ക് ജ്യൂസ് തരികയായിരുന്നു.
രണ്ടാമത്തെ തവണ ബലാത്സംഗം ചെയ്യുമ്പോൾ ഒരു ഉദ്യോഗസ്ഥൻ കൂടെയുണ്ടായിരുന്നു. അത് കസ്റ്റംസിലെ ഉയർന്ന ഉദ്യോഗസ്ഥനാണെന്നും അയാൾക്ക് കൂടി വഴങ്ങണമെന്നും ആവശ്യപ്പെട്ടു. എന്നാൽ, താൻ സമ്മതിച്ചില്ലെന്നും വീട്ടമ്മ വെളിപ്പെടുത്തി.
ഇന്നലെ പൊന്നാനിയിലെ സി.പി.എം നേതാവിന്റെ വീട്ടിലെത്തിയ പി.വി അൻവർ എം.എൽ.എയെ അവിടെ പോയി കണ്ടുവെന്നും അൻവറിന്റെ വെളിപ്പെടുത്തലോടെയാണ് താനും തുറന്നുപറയുന്നതെന്നും വീട്ടമ്മ മാധ്യമങ്ങളോട് പ്രതികരിച്ചു.