റിയാദ്- കെഎംസിസി പാലക്കാട് ജില്ലാ കമ്മിറ്റി സംഘടിപ്പിക്കുന്ന ഒന്നാമത് ഉബൈദ് ചങ്ങലീരി മെമ്മോറിയല്‍ ഫുട്‌ബോള്‍ ടൂര്‍ണമെന്റ് ആഗസ്റ്റ് 22,23,29,30 തിയതികളില്‍ സുലൈ മുതവ്വ സ്റ്റേഡിയത്തില്‍ നടക്കുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു.
ഹരിത രാഷ്രീയം നെഞ്ചിലേറ്റി നിസ്വാര്‍ഥമായ പൊതു പ്രവര്‍ത്തനത്തിലൂടെ ഒരു നാടിന്റെ സേവകനായി മാറി പുണ്യം തീര്‍ത്ത് ലോകത്തോട് വിട പറഞ്ഞ മര്‍ഹൂം ഉബൈദ് ചങ്ങലീരിയുടെ സ്മരണാര്‍ഥമാണ് ഈ ഫുട്‌ബോള്‍ ടൂര്‍ണമെന്റ് സംഘടിപ്പിക്കുന്നത്.
റിയാദ് ഇന്ത്യന്‍ ഫുട്‌ബോള്‍ അസോസിയേഷന്റെ സഹകരണത്തോടെ നടത്തുന്ന ടൂര്‍ണമെന്റില്‍ അസോസിയേഷനില്‍ രജിസ്റ്റര്‍ ചെയ്ത 16 പ്രമുഖ ടീമുകളാണ് മാറ്റുരക്കുന്നത്.
ടൂര്‍ണമെന്റിന്റെ ഉദ്ഘാടനം റിയാദ് കെ.എം.സി.സി സെന്‍ട്രല്‍ കമ്മിറ്റി പ്രസിഡണ്ട് സി.പി. മുസ്തഫ നിര്‍വ്വഹിക്കും. കെ.എം.സി.സി നാഷണല്‍ കമ്മിറ്റി, സെന്‍ട്രല്‍ കമ്മിറ്റി നേതാക്കള്‍, സൗഹൃദ പ്രതിനിധികളായി കേളി, ഒ.ഐ.സി.സി നേതാക്കളും ചടങ്ങളില്‍ സംബന്ധിക്കും.
ഈ ടൂര്‍ണമെന്റിന്റെ മുഖ്യ പ്രായോജകരായ അറേബ്യന്‍ ഫാംസ് സഹ, ഈസ്റ്റേണ്‍ കറി പൗഡര്‍, കതിര്‍ റൈസ് ബ്രാന്‍ഡ് ഉള്‍പ്പെടെയുള്ള വിവിധ ബിസിനസ് ബ്രാന്‍ഡുകള്‍ ടൂര്‍ണമെന്റുമായി സഹകരിക്കുന്നുണ്ട്. ഈ ടൂര്‍ണമെന്റിന്റെ ഫൈനല്‍ മത്സരം നടക്കുന്നത് സൗദി കെഎംസിസിയുടെ നാഷണല്‍ സോക്കര്‍ മെഗാ ഫൈനല്‍ നടക്കുന്ന നസ്രിയയിലെ റിയല്‍ മാന്‍ഡ്രിഡ് സ്റ്റേഡിയത്തിലാണ്.
വാര്‍ത്താ സമ്മേളനത്തില്‍ റിയാദ് കെ.എം.സി.സി പാലക്കാട് ജില്ലാ കമ്മിറ്റി ജനറല്‍ സെക്രട്ടറി ഷബീര്‍ കൊളത്തൂര്‍, ചെയര്‍മാന്‍ ഫായിസ് തോട്ടര, ഓര്‍ഗനൈസിങ്ങ് സെക്രട്ടറി ബാദുഷ ഷൊര്‍ണ്ണര്‍, വൈസ് പ്രസിഡണ്ട് മൊയ്തീന്‍ കുട്ടി തൃത്താല, ജോയിന്റ് സെക്രട്ടറി യൂനുസ് മണ്ണാര്‍ക്കാട് എന്നിവര്‍ സംബന്ധിച്ചു.
ഏറ്റവും പുതിയ വാർത്തകൾ വാട്സാപ്പിൽ ലഭിക്കാൻ Join Our WhatsApp Group