കൊച്ചി- വെറുപ്പു പടർത്തുന്നവരെ തെല്ലുംവില കൽപ്പിക്കാത്ത മലയാളി താരമാണ് ഷെയ്ൻ നിഗം. താരത്തിന്റെ ഏറ്റവും പുതിയ ഇൻസ്റ്റഗ്രം സ്റ്റോറിയും വെറുപ്പു പ്രചരിപ്പിക്കുന്നവരെ പരിഗണിക്കുന്നേയില്ല എന്ന് വിളിച്ചുപറയുന്നതായി. എല്ലാ കണ്ണുകളും റഫയിലേക്ക് എന്ന് പോസ്റ്റിട്ടതിന്റെ പേരിൽ ചലച്ചിത്ര താരം ദുൽഖർ സൽമാനെ അടക്കം തീവ്രവാദിയായി ചിത്രീകരിച്ചതിന് എതിരെയാണ് ഇൻസ്റ്റയിൽ ഷെയിൻ നിഗം പ്രതികരിച്ചിരിക്കുന്നത്.
സുഡാപ്പി ഫ്രം ഇന്ത്യ എന്ന അടിക്കുറിപ്പോടെ തലയിൽ കെട്ടുമായുള്ള ചിത്രമാണ് ഷെയിൻ നിഗം പങ്കുവെച്ചിരിക്കുന്നത്. ഈ ചിത്രം സോഷ്യൽ മീഡിയയൽ വൈറലാകുകയും ചെയ്തു.
കഴിഞ്ഞ ദിവസമാണ് ലോകത്താകമാനമുള്ള സെലിബ്രിറ്റികളിൽ നിരവധി പേർ എല്ലാ കണ്ണുകളും റഫയിലേക്ക് എന്ന അടിക്കുറിപ്പുള്ള ചിത്രം സമൂഹമാധ്യമങ്ങളിൽ പങ്കുവെച്ചത്.
ഇന്ത്യക്ക് അകത്തും പുറത്തുമുള്ള നൂറുകണക്കിന് താരങ്ങൾ ക്യാംപയിനിൽ പങ്കാളിയായി. ഫലസ്തീനിലെ റഫയിൽ ഇസ്രായിൽ തുടരുന്ന കൊടുംക്രൂരതക്ക് എതിരായിട്ടായിരുന്നു ക്യാംപയിൻ. ആഗോളശ്രദ്ധ പിടിച്ചുപറ്റിയ ക്യാംപയിനിൽ ഇന്ത്യയിൽനിന്നുള്ള നിരവധി പേരും പങ്കാളികളായി. ഇതിൽ ദുൽഖർ സൽമാനെ മാത്രം കേന്ദ്രീകരിച്ചാണ് ചില കോണുകളിൽനിന്ന് വർഗീയ പരാമർശങ്ങളുണ്ടായത്. ഇതിനെതിരെയാണ് ഷെയിൻ നിഗം പോസ്റ്റിട്ടത്.