അബുദാബി: യുഎഇ സ്വദേശിവൽക്കരണ പദ്ധതിയിൽ അർധവാർഷിക ലക്ഷ്യമായ 1% ജൂൺ 30 നകം പൂർത്തിയാക്കണമെന്ന് സ്വകാര്യ കമ്പനികൾക്ക് നിർദേശം നൽകി. 2022ൽ ആരംഭിച്ച സ്വദേശിവൽക്കരണ പദ്ധതിയായ ഇമറാത്തി ടാലന്റ് കോംപറ്റിറ്റീവ്നസ് കൗൺസിൽ പ്രോഗ്രാം (നാഫിസ്) അനുസരിച്ച് അൻപതോ അതിൽ കൂടുതലോ ജീവനക്കാരുള്ള കമ്പനികൾ പ്രതിവർഷം 2% സ്വദേശിവൽക്കരണം നടപ്പാക്കണമെന്നാണ് വ്യവസ്ഥ.
കമ്പനികളുടെ സൗകര്യാർഥം 6 മാസത്തിലൊരിക്കൽ (ജൂൺ, ഡിസംബർ മാസങ്ങളിൽ) 1% സ്വദേശികളെ നിയമിക്കാനും അനുമതി നൽകിയിരുന്നു. കഴിഞ്ഞ 2 വർഷങ്ങളിലെ 4 ശതമാനവും ഈ വർഷത്തെ 2 ശതമാനവും ചേർത്ത് ഡിസംബറോടെ മൊത്തം 6% സ്വദേശിവൽക്കരണം പൂർത്തിയാക്കണം. 2025, 2026 വർഷങ്ങളിലെ 2% വീതം ചേർത്ത് മൊത്തം 10% സ്വദേശികളെ നിയമിക്കാനാണ് മാനവശേഷി സ്വദേശിവൽക്കരണ മന്ത്രാലയത്തിന്റെ നിർദേശം. ഇതിനകം സ്വദേശിവൽക്കരണം നടപ്പാക്കിയ കമ്പനികളെ അഭിനന്ദിച്ച മന്ത്രാലയം അംഗീകൃത പെൻഷൻ ഫണ്ടിലും വേതന സുരക്ഷാ സംവിധാനത്തിലും (ഡബ്ല്യുപിഎസ്) സ്വദേശികളെ റജിസ്റ്റർ ചെയ്യാനും ആവശ്യപ്പെട്ടു.
സ്വദേശി ഉദ്യോഗാർഥികളെ നാഫിസ് പ്ലാറ്റ്ഫോമിലൂടെ തിരഞ്ഞെടുക്കാൻ അവസരമുണ്ടെന്നും അറിയിച്ചു.അതേസമയം സ്വദേശിവൽക്കരണം ഉറപ്പാക്കാൻ മന്ത്രാലയം പരിശോധന ഊർജിതമാക്കി. രണ്ടു വർഷത്തിനിടെ നടന്ന പരിശോധനയിൽ 1379 കമ്പനികൾ നിയമം ലംഘിച്ചതായി കണ്ടെത്തിയിരുന്നു. ഈ സ്ഥാപനങ്ങൾക്ക് പിഴ ചുമത്തുകയും കുറ‍ഞ്ഞ ഗ്രേഡിലേക്കു തരംതാഴ്ത്തുകയും ചെയ്തു.