ജറുസലേം- ഇസ്രായേൽ തീവ്ര വലതുപക്ഷ ഭരണകൂടത്തെ വെല്ലുവിളിച്ചുകൊണ്ട് അറബ് ജനതയുടെ അവകാശങ്ങൾക്കായി ശക്തമായി വാദിക്കുന്ന മുതിർന്ന പലസ്തീൻ-ഇസ്രായേലി രാഷ്ട്രീയ നേതാവും ഡോക്ടറുമായ അഹമ്മദ് തിബി.
‘അറബ് മൂവ്മെന്റ് ഫോർ റിന്യൂവൽ’ (താഅൽ – Ta’al) പാർട്ടിയുടെ ചെയർമാനായ അഹമ്മദ് തിബി, ഇസ്രായേൽ പാർലമെന്റായ നെസെറ്റിന്റെ (Knesset) നേതാവാണ് തിബി. ഇസ്രായേലിലെ പലസ്തീൻ പൗരന്മാരെ ദീർഘകാലമായി പ്രതിനിധീകരിക്കുന്ന ഈ മുതിർന്ന നിയമസഭാംഗത്തിന് വലിയൊരു നാഴികക്കല്ലാണ് ഈ പദവി. സമീപവർഷങ്ങളിൽ ഇസ്രായേൽ ഭരണകൂടത്തിന് നേതൃത്വം നൽകിയതോ ഭാഗമായതോ ആയ തീവ്ര വലതുപക്ഷ പാർട്ടികൾക്കെതിരെയുള്ള വിജയമായാണ് ഈ നേട്ടത്തെ വിശേഷിപ്പിച്ചത്. “11 സീറ്റുകൾ നേടിയ ജോയിന്റ് ലിസ്റ്റിന് (അറബ് ഭൂരിപക്ഷ പാർട്ടികളുടെ സഖ്യം) അർഹതപ്പെട്ട നേട്ടമാണിത്,” അദ്ദേഹം പറഞ്ഞു. പ്രധാനമന്ത്രി ബെഞ്ചമിൻ നെതന്യാഹുവിന്റെ ലിക്കുഡ് പാർട്ടിയെയും തീവ്ര വലതുപക്ഷ ദേശീയ സുരക്ഷാ മന്ത്രി ഇറ്റാമർ ബെൻ-ഗ്വിറിനെയും പരാമർശിച്ചുകൊണ്ട്, “എന്റെ തിരഞ്ഞെടുപ്പ് തടയാൻ ലിക്കുഡും ബെൻ-ഗ്വിറും ശ്രമിച്ചെങ്കിലും, അവരുടെ പ്രകോപനപരമായ നീക്കങ്ങളെ അതിജീവിച്ച് ഞങ്ങൾ വിജയിച്ചു” എന്നും അദ്ദേഹം കൂട്ടിച്ചേർത്തു.
യാസർ അറാഫത്തിന്റെ ഉപദേഷ്ടാവ്
1948-ലെ നക്ബ (പലസ്തീൻ പലായനം) കാലത്ത് ജാഫയിൽ നിന്ന് കുടിയിറക്കപ്പെട്ട ഒരു കുടുംബത്തിൽ, 1958 ഡിസംബർ 19-ന് തായ്ബെ നഗരത്തിലാണ് അഹമ്മദ് തിബി ജനിച്ചത്. തുടക്കത്തിൽ വൈദ്യശാസ്ത്ര പഠനത്തിലാണ് അദ്ദേഹം ശ്രദ്ധ കേന്ദ്രീകരിച്ചത്. 1983-ൽ ജറുസലേമിലെ ഹീബ്രു സർവ്വകലാശാലയിൽ നിന്ന് ഉന്നത വിജയത്തോടെ മെഡിക്കൽ ബിരുദം നേടി. എന്നാൽ പിന്നീട് അദ്ദേഹത്തിന്റെ രാഷ്ട്രീയ പ്രവർത്തനങ്ങൾ വൈദ്യശാസ്ത്ര ജീവിതത്തിന് മുകളിലായി.
1984-ൽ, പലസ്തീൻ ലിബറേഷൻ ഓർഗനൈസേഷനെ (PLO) ഇസ്രായേൽ നിയമങ്ങൾ “ഭീകരസംഘടന”യായി മുദ്രകുത്തിയിരുന്ന കാലത്ത്, നിയമം ലംഘിച്ച് ടുണീഷ്യയിലെ ടുണിസിൽ വെച്ച് അദ്ദേഹം പി.എൽ.ഒ നേതാവ് യാസർ അറാഫത്തുമായി കൂടിക്കാഴ്ച നടത്തി. തിരിച്ചെത്തിയപ്പോൾ ഇസ്രായേൽ പോലീസ് അദ്ദേഹത്തെ ചോദ്യം ചെയ്തെങ്കിലും ഔദ്യോഗികമായി കുറ്റം ചുമത്തിയിരുന്നില്ല. പിന്നീട് 1993 മുതൽ 1999 വരെ യാസർ അറാഫത്തിന്റെ രാഷ്ട്രീയ ഉപദേഷ്ടാവായി തിബി സേവനമനുഷ്ഠിച്ചു. 1998-ൽ അമേരിക്കയിലെ മേരിലാൻഡിൽ നടന്ന വൈ റിവർ (Wye River) ഉച്ചകോടിയിൽ പലസ്തീൻ പ്രതിനിധി സംഘത്തിന്റെ വക്താവായും അദ്ദേഹം പ്രവർത്തിച്ചു.
ഇസ്രായേലിൽ ഏറ്റവും കൂടുതൽ കാലം പ്രധാനമന്ത്രിയായിരുന്ന ബെഞ്ചമിൻ നെതന്യാഹുവിന്റെ ആദ്യ ഭരണകാലമായിരുന്നു അത്. അധിനിവേശ വെസ്റ്റ് ബാങ്കിന്റെ ചില ഭാഗങ്ങളിൽ നിന്ന് സൈന്യത്തെ പിൻവലിക്കാൻ ഇസ്രായേലും, പലസ്തീൻ പ്രതിരോധ പ്രസ്ഥാനത്തിലെ സായുധ വിഭാഗങ്ങൾക്കെതിരെ കർശന നടപടിയെടുക്കാൻ പലസ്തീൻ അതോറിറ്റിയും (PA) ആ ഉച്ചകോടിയിൽ സമ്മതിച്ചിരുന്നു. എന്നാൽ മറ്റ് ഇസ്രായേൽ-പലസ്തീൻ കരാറുകളെപ്പോലെ തന്നെ വൈ റിവർ കരാറും ഇസ്രായേൽ ഉടൻ ഉപേക്ഷിച്ചു.
പാർലമെന്റിലെ പോരാട്ടങ്ങൾ
1996-ൽ ‘താഅൽ’ പാർട്ടി സ്ഥാപിച്ച തിബി, 1999-ലാണ് ആദ്യമായി നെസെറ്റിലേക്ക് തിരഞ്ഞെടുക്കപ്പെടുന്നത്. “ഇസ്രായേൽ പൗരത്വമുള്ള ഒരു അറബ് പലസ്തീനി” എന്ന് സ്വയം വിശേഷിപ്പിക്കുന്ന അദ്ദേഹം, ദ്വിരാഷ്ട്ര പരിഹാരത്തിനും പലസ്തീൻ അഭയാർത്ഥികളുടെ തിരിച്ചുവരവിനുള്ള അവകാശത്തിനും വേണ്ടി ശക്തമായി നിലകൊള്ളുന്നു. ഇസ്രായേലിനെ ഒരു “ജൂത രാഷ്ട്രം” എന്ന് നിർവചിക്കുന്നതിനെ നിരന്തരം എതിർക്കുന്ന അദ്ദേഹം, ഇസ്രായേൽ ഒരു “വർണ്ണവിവേചന രാഷ്ട്രം” (Apartheid state) ആണെന്നും “എല്ലാ പൗരന്മാർക്കും അവകാശമുള്ള രാഷ്ട്രമാണ്” വേണ്ടതെന്നും വാദിക്കുന്നു.
തുറന്നടിച്ചുള്ള നിലപാടുകളും താഴെത്തട്ടിലുള്ള സജീവ ഇടപെടലുകളും കാരണം ഇസ്രായേൽ ഭരണകൂടത്തിന്റെയും തീവ്ര വലതുപക്ഷ പ്രവർത്തകരുടെയും നോട്ടപ്പുള്ളിയായി അദ്ദേഹം പലപ്പോഴും മാറിയിട്ടുണ്ട്. 2000 സെപ്റ്റംബറിലെ രണ്ടാം ഇൻതിഫാദയുടെ സമയത്ത്, അൽ-അഖ്സ പള്ളി വളപ്പിലേക്ക് പ്രകോപനപരമായി അതിക്രമിച്ചു കയറിയ ഏരിയൽ ഷാരോണിനെ (തൊട്ടടുത്ത വർഷം ഇദ്ദേഹം പ്രധാനമന്ത്രിയായി) തടയാൻ ശ്രമിക്കുന്നതിനിടെ തിബിയുടെ വലതുകൈ ഒടിഞ്ഞിരുന്നു. 2002-ൽ സൈനിക ആക്രമണം നടക്കുന്നതിനിടെ ജെനിൻ അഭയാർത്ഥി ക്യാമ്പിൽ പ്രവേശിക്കുകയും സൈനികരെ ചോദ്യം ചെയ്യുകയും ചെയ്തതിനെത്തുടർന്ന് ഇസ്രായേൽ അദ്ദേഹത്തിന്റെ പാർലമെന്ററി പരിരക്ഷ എടുത്തുകളഞ്ഞു.
പാർലമെന്റിനുള്ളിലെ നാടകീയമായ പ്രതിഷേധങ്ങളിലൂടെയും തിബി പ്രശസ്തനാണ്. ജറുസലേമിലും അധിനിവേശ പലസ്തീൻ പ്രദേശങ്ങളിലും ഉച്ചഭാഷിണികൾ നിരോധിക്കാൻ ലക്ഷ്യമിട്ടുള്ള ഇസ്രായേലി ബില്ലിനെതിരെ പ്രതിഷേധിച്ച്, 2016-ൽ അദ്ദേഹം നെസെറ്റ് ചേംബറിനുള്ളിൽ വെച്ച് ഇസ്ലാമിക ബാങ്ക് വിളി (അസാൻ) മുഴക്കിയത് വലിയ വാർത്തയായിരുന്നു.



