ന്യൂദൽഹി- ത്രിവർണ്ണ പതാകയേന്തി ജന്തർ മന്തറിൽ സമാധാനപരമായി പ്രതിഷേധിക്കുന്നത് കുറ്റമല്ലെന്നും അതിൻ്റെ പേരിൽ യുവാക്കളെ ജയിലിലടക്കുന്നത് ഭീരുത്വമാണെന്നും പ്രതിപക്ഷ നേതാവ് രാഹുൽ ഗാന്ധി. വിദ്യാർത്ഥികൾ, യുവാക്കൾ,. മാധ്യമപ്രവർത്തകർ, ഇന്ത്യാ മുന്നണി എന്നിവരുടെ കൊടികൾ വ്യത്യസ്തമാണെങ്കിലും ലക്ഷ്യം ഒന്നാണ്. എല്ലാ പ്രതിഷേധങ്ങളും ഒന്നുതന്നെയാണ്. തങ്ങളുടെ ഭരണഘടനാപരമായ അവകാശങ്ങളാണ് പൗരൻമാർ ആവശ്യപ്പെടുന്നത്. ജന്തർ മന്തർ ഇന്ത്യയിലെ ജനങ്ങൾക്ക് അവകാശപ്പെട്ടതാണ്. ഞങ്ങൾ അത് തിരിച്ചുപിടിക്കുമെന്നും രാഹുൽ ഗാന്ധി പറഞ്ഞു.
ജന്തർമന്തറിൽ അതിക്രമിച്ചുകടന്നുവെന്ന കേസിൽ മുൻകരുതൽ നടപടിയുടെ ഭാഗമായി അറസ്റ്റിലായ കോക്രോച്ച് ജനതാ പാർട്ടി (സി.ജെ.പി) നേതാക്കളായ സൗരവ് ദാസ്, അശുതോഷ് റങ്ക എന്നിവരെ അഞ്ച് ദിവസത്തെ ജുഡീഷ്യൽ കസ്റ്റഡിയിൽ വിട്ട പശ്ചാത്തലത്തിലാണ് രാഹുലിന്റെ പരാമർശം. ബോണ്ട് ലംഘനം, പൊതുഉദ്യോഗസ്ഥന്റെ കൃത്യനിർവ്വഹണം തടസ്സപ്പെടുത്തൽ തുടങ്ങിയ കുറ്റങ്ങളാണ് ഇവർക്കുമേൽ ചുമത്തിയിരിക്കുന്നത്. അജിങ്ക്യ ഷിൻഡെയും ഇവർക്കൊപ്പമുണ്ടായിരുന്നു.
ബുധനാഴ്ച രാവിലെ 8:00 മണിയോടെ ദൽഹിയിലെ മന്ദിർ മാർഗിലുള്ള മജിസ്‌ട്രേറ്റിന് മുന്നിലാണ് മൂന്ന് നേതാക്കളെയും ഹാജരാക്കിയത്. അശുതോഷ് റങ്കയെയും സൗരവ് ദാസിനെയും അഞ്ച് ദിവസത്തെ ജുഡീഷ്യൽ കസ്റ്റഡിയിൽ വിട്ടതായി സി.ജെ.പി സ്ഥാപകൻ അഭിജീത് ദീപകെ എക്സിലെ (X) ഒരു പോസ്റ്റിൽ അറിയിച്ചു. പ്രതിഷേധം അടിച്ചമർത്തുന്ന സർക്കാരിന്റെ നടപടിയെ അദ്ദേഹം രൂക്ഷമായി വിമർശിച്ചു.
Waving the Tricolour at Jantar Mantar in a peaceful protest is not a crime. Jailing youth for it is an act of cowardice. Students. Youth. Journalists. The INDIA bloc. Different banners, one cause. All protests are one: citizens demanding their constitutional rights. Jantar Mantar belongs to the people of India. We will reclaim it.
— Rahul Gandhi (@RahulGandhi) October 14, 2026
ആവർത്തിച്ചുള്ള കുറ്റകൃത്യങ്ങൾ എന്ന നിലയിൽ, തങ്ങൾ ഒപ്പിട്ടുനൽകിയ ബോണ്ടിന്റെ വ്യവസ്ഥകൾ ഇവർ ലംഘിക്കുകയായിരുന്നു. ഈ ലംഘനങ്ങൾ കണക്കിലെടുത്താണ് കോടതി ഇരുവർക്കും ജുഡീഷ്യൽ കസ്റ്റഡി വിധിച്ചതെന്ന് വൃത്തങ്ങൾ കൂട്ടിച്ചേർത്തു.
ചൊവ്വാഴ്ച രാവിലെ പോലീസ് ബാരിക്കേഡുകൾ മറികടന്ന് ജന്തർമന്തറിൽ പ്രവേശിച്ച് മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജി വെക്കണമെന്ന് ആവശ്യപ്പെട്ട് മുദ്രാവാക്യം വിളിച്ചതിനാണ് ഷിൻഡെ, ദാസ്, റങ്ക എന്നിവരെ കസ്റ്റഡിയിലെടുത്തത്.
അതേസമയം, അജിങ്ക്യയെ വ്യക്തിഗത ബോണ്ടിന്റെ അടിസ്ഥാനത്തിൽ വിട്ടയച്ചതായി സി.ജെ.പി നിയമസേവന വിഭാഗം മേധാവി രത്ന സിംഗ് എക്സിൽ അറിയിച്ചു.