തെൽഅവീവ് ദുബായിൽ നിന്ന് തെൽഅവീവിലേക്ക് 150-ലധികം ഇസ്രായേലി യാത്രക്കാരുമായി പറന്ന ഫ്ലൈ ദുബായ് വിമാനം വെടിവെച്ചിടാൻ ഇസ്രായേൽ നീക്കം നടത്തിയിരുന്നതായി റിപ്പോർട്ട്. കോക്ക്പിറ്റിൽ വെച്ച് ക്യാപ്റ്റന് നേരെ ആക്രമണമുണ്ടായതിനെ തുടർന്നാണ് ഇസ്രായേൽ ഇത്തരമൊരു നടപടിക്ക് ഒരുങ്ങിയതെന്ന് സി.ബി.എസ് ന്യൂസ് വ്യക്തമാക്കുന്നു. രണ്ട് ഇസ്രായേലി വൃത്തങ്ങളെ ഉദ്ധരിച്ചാണ് റിപ്പോർട്ട് പുറത്തുവന്നത്.
വിമാനത്തിന്റെ കോ-പൈലറ്റ്, ക്യാപ്റ്റനെ കുത്തിപ്പരിക്കേൽപ്പിക്കുകയും വിമാനത്തിന്റെ നിയന്ത്രണം ഏറ്റെടുക്കാൻ ശ്രമിക്കുകയും ചെയ്തതോടെ വിമാനം 14,000 അടിയോളം താഴേക്ക് കുത്തനെ പതിക്കുകയായിരുന്നു. തുടർന്ന് കോക്ക്പിറ്റുമായി ബന്ധപ്പെടാനുള്ള ശ്രമങ്ങൾ പരാജയപ്പെട്ടതോടെ ഇസ്രായേലി യുദ്ധവിമാനങ്ങൾ വിന്യസിക്കുകയും വ്യോമമേഖല അടയ്ക്കുകയും ചെയ്തു. 9/11 മാതൃകയിലുള്ള ഭീകരാക്രമണ സാധ്യത മുന്നിൽക്കണ്ട്, അസ്‌റിയേലി ടവറുകൾ, വിമാനത്താവളം തുടങ്ങിയ പ്രധാന കേന്ദ്രങ്ങളിൽ വിമാനം ഇടിച്ചുകയറുന്നത് തടയാനായിരുന്നു ഇസ്രായേലിന്റെ നീക്കം. രാജ്യത്തിന് ഭീഷണിയാകുന്ന വിമാനങ്ങൾ വെടിവെച്ചിടാനുള്ള പ്രത്യേക നടപടിക്രമത്തിന്റെ ഭാഗമായാണ് ഇത്.
എന്നാൽ, വിമാനം സൗദി അറേബ്യയുടെ ദിശയിലേക്ക് തിരിഞ്ഞതോടെ ഇസ്രായേലി യുദ്ധവിമാനങ്ങളെ തിരിച്ചുവിളിക്കുകയായിരുന്നു. സൗദി അറേബ്യയും തങ്ങളുടെ യുദ്ധവിമാനങ്ങൾ വിന്യസിച്ചിരുന്നു. ഒടുവിൽ ക്യാപ്റ്റനും യാത്രക്കാരും ചേർന്ന് കോ-പൈലറ്റിനെ കീഴ്പ്പെടുത്തിയതിനെ തുടർന്ന് വിമാനം സൗദി അറേബ്യയിലെ തബൂക്ക് വിമാനത്താവളത്തിൽ അടിയന്തരമായി ഇറക്കുകയായിരുന്നു.
ഏറ്റവും പുതിയ വാർത്തകൾ വാട്സാപ്പിൽ ലഭിക്കാൻ Join Our WhatsApp Group